മഹാഭാരതം മൂലം/സഭാപർവം/അധ്യായം54

വിക്കിഗ്രന്ഥശാല സംരംഭത്തിൽ നിന്ന്
മഹാഭാരതം മൂലം/സഭാപർവം
രചന:വ്യാസൻ
അധ്യായം54

1 [യ്]
     മത്തഃ കൈതവകേനൈവ യജ് ജിതോ ഽസ്മി ദുരോദരം
     ശകുനേ ഹന്ത ദീവ്യാമോ ഗ്ലഹമാനാഃ സഹസ്രശഃ
 2 ഇമേ നിഷ്കസഹസ്രസ്യ കുണ്ഡിനോ ഭരിതാഃ ശതം
     കോശോ ഹിരണ്യം അക്ഷയ്യം ജാതരൂപം അനേകശഃ
     ഏതദ് രാജൻ ധനം മഹ്യം തേന ദീവ്യാമ്യ് അഹം ത്വയാ
 3 [വ്]
     ഇത്യ് ഉക്തഃ ശകുനിഃ പ്രാഹ ജിതം ഇത്യ് ഏവ തം നൃപം
 4 [യ്]
     അയം സഹസ്രസമിതോ വൈയാഘ്രഃ സുപ്രവർതിതഃ
     സുചക്രോപസ്കരഃ ശ്രീമാൻ കിങ്കിണീജാലമണ്ഡിതഃ
 5 സംഹ്രാദനോ രാജരഥോ യ ഇഹാസ്മാൻ ഉപാവഹത്
     ജൈത്രോ രഥവരഃ പുണ്യോ മേഘസാഗര നിഃസ്വനഃ
 6 അഷ്ടൗ യം കുരരച് ഛായാഃ സദശ്വാ രാഷ്ട്രസംമതാഃ
     വഹന്തി നൈഷാം ഉച്യേത പദാ ഭൂമിം ഉപസ്പൃശൻ
     ഏതദ് രാജൻ ധനം മഹ്യം തേന ദീവ്യാമ്യ് അഹം ത്വയാ
 7 [വ്]
     ഏതച് ഛ്രുത്വാ വ്യവസിതോ നികൃതിം സമുപാശ്രിതഃ
     ജിതം ഇത്യ് ഏവ ശകുനിർ യുധിഷ്ഠിരം അഭാഷത
 8 [യ്]
     സഹസ്രസംഖ്യാ നാഗാ മേ മത്താസ് തിഷ്ഠന്തി സൗബല
     ഹേമകക്ഷാഃ കൃതാപീഡാഃ പദ്മിനോ ഹേമമാലിനഃ
 9 സുദാന്താ രാജവഹനാഃ സർവശബ്ദക്ഷമാ യുധി
     ഈഷാ ദന്താ മഹാകായാഃ സർവേ ചാഷ്ട കരേണവഃ
 10 സർവേ ച പുരഭേത്താരോ നഗമേഘനിഭാ ഗജാഃ
    ഏതദ് രാജൻ ധനം മഹ്യം തേന ദീവ്യാമ്യ് അഹം ത്വയാ
11 [വ്]
    തം ഏവം വാദിനം പാർഥം പ്രഹസന്ന് ഇവ സൗബലഃ
    ജിതം ഇത്യ് ഏവ ശകുനിർ യുധിഷ്ഠിരം അഭാസത
12 [യ്]
    ശതം ദാസീ സഹസ്രാണി തരുണ്യോ മേ പ്രഭദ്രികാഃ
    കംബുകേയൂര ധാരിണ്യോ നിഷ്കകന്ഥ്യഃ സ്വലം കൃതാഃ
13 മഹാർഹമാല്യാഭരണാഃ സുവസ്ത്രാശ് ചന്ദനോക്ഷിതാഃ
    മണീൻ ഹേമച ബിഭ്രത്യഃ സർവാ വൈ സൂക്ഷ്മവാസസഃ
14 അനുസേവാം ചരന്തീമാഃ കുശലാ നൃത്യസാമസു
    സ്നാതകാനാം അമാത്യാനാം രാജ്ഞാം ച മമ ശാസനാത്
    ഏതദ് രാജൻ ധനം മഹ്യം തേന ദീവ്യാമ്യ് അഹം ത്വയാ
15 [വ്]
    ഏതച് ഛ്രുത്വാ വ്യവസിതോ നികൃതിം സമുപാശ്രിതഃ
    ജിതം ഇത്യ് ഏവ ശകുനിർ യുധിഷ്ഠിരം അഭാഷത
16 [യ്]
    ഏതാവന്ത്യ് ഏവ ദാസാനാം സഹസ്രാണ്യ് ഉത സന്തി മേ
    പ്രദക്ഷിണാനുലോമാശ് ച പ്രാവാര വസനാഃ സദാ
17 പ്രാജ്ഞാ മേധാവിനോ ദക്ഷാ യുവാനോ മൃഷ്ടകുണ്ഡലാഃ
    പാത്രീ ഹസ്താ ദിവാരാത്രം അതിഥീൻ ഭോജയന്ത്യ് ഉത
    ഏതദ് രാജൻ ധനം മഹ്യം തേന ദീവ്യാമ്യ് അഹം ത്വയാ
18 [വ്]
    ഏതച് ഛ്രുത്വാ വ്യവസിതോ നികൃതിം സമുപാശ്രിതഃ
    ജിതം ഇത്യ് ഏവ ശകുനിർ യുധിഷ്ഠിരം അഭാഷത
19 [യ്]
    രഥാസ് താവന്ത ഏവേമേ ഹേമഭാണ്ഡാഃ പതാകിനഃ
    ഹയൈർ വിനീതൈഃ സമ്പന്നാ രഥിഭിശ് ചിത്രയോധിഭിഃ
20 ഏകൈകോ യത്ര ലഭതേ സഹസ്രപരമാം ഭൃതിം
    യുധ്യതോ ഽയുധ്യതോ വാപി വേതനം മാസകാലികം
    ഏതദ് രാജൻ ധനം മഹ്യം തേന ദീവ്യാമ്യ് അഹം ത്വയാ
21 [വ്]
    ഇത്യ് ഏവം ഉക്തേ പാർഥേന കൃതവൈരോ ദുരാത്മവാൻ
    ജിതം ഇത്യ് ഏവ ശകുനിർ യുധിഷ്ഠിരം അഭാഷത
22 [യ്]
    അശ്വാംസ് തിത്തിരി കൽമാഷാൻ ഗാന്ധർവാൻ ഹേമമാലിനഃ
    ദദൗ ചിത്രരഥസ് തുഷ്ടോ യാംസ് താൻ ഗാണ്ഡീവധന്വനേ
    ഏതദ് രാജൻ ധനം മഹ്യം തേന ദീവ്യാമ്യ് അഹം ത്വയാ
23 [വ്]
    ഏതച് ഛ്രുത്വാ വ്യവസിതോ നികൃതിം സമുപാശ്രിതഃ
    ജിതം ഇത്യ് ഏവ ശകുനിർ യുധിഷ്ഠിരം അഭാഷത
24 [യ്]
    രഥാനാം ശകടാനാം ച ഹയാനാം ചായുതാനി മേ
    യുക്താനാം ഏവ തിഷ്ഠന്തി വാഹൈർ ഉച്ചാവചൈർ വൃതാഃ
25 ഏവം വർണസ്യ വർണസ്യ സമുച്ചീയ സഹസ്രശഃ
    ക്ഷീരം പിബന്തസ് തിഷ്ഠന്തി ഭുഞ്ജാനാഃ ശാലിതണ്ഡുലാൻ
26 ഷഷ്ടിസ് താനി സഹസ്രാണി സർവേ പൃഥുല വക്ഷസഃ
    ഏതദ് രാജൻ ധനം മഹ്യം തേന ദീവ്യാമ്യ് അഹം ത്വയാ
27 [വ്]
    ഏതച് ഛ്രുത്വാ വ്യവസിതോ നികൃതിം സമുപാശ്രിതഃ
    ജിതം ഇത്യ് ഏവ ശകുനിർ യുധിഷ്ഠിരം അഭാഷത
28 [യ്]
    താമ്രലോഹൈർ പരിവൃതാ നിധയോ മേ ചതുർശതാഃ
    പഞ്ച ദ്രൗണിക ഏകൈകഃ സുവർണസ്യാഹതസ്യ വൈ
    ഏതദ് രാജൻ ധനം മഹ്യം തേന ദീവ്യാമ്യ് അഹം ത്വയാ
29 [വ്]
    ഏതച് ഛ്രുത്വാ വ്യവസിതോ നികൃതിം സമുപാശ്രിതഃ
    ജിതം ഇത്യ് ഏവ ശകുനിർ യുധിഷ്ഠിരം അഭാഷത