മഹാഭാരതം മൂലം/ശല്യപർവം/അധ്യായം35

←അധ്യായം34

മഹാഭാരതം മൂലം/ശല്യപർവം രചന:വ്യാസൻ അധ്യായം35

അധ്യായം36→

1 [വൈ]
     തസ്മാൻ നദീ ഗതം ചാപി ഉദപാനം യശസ്വിനഃ
     ത്രിതസ്യ ച മഹാരാജ ജഗാമാഥ ഹലായുധഃ
 2 തത്ര ദത്ത്വാ ബഹുദ്രവ്യം പൂജയിത്വാ തഥാ ദ്വിജാൻ
     ഉപസ്പൃശ്യ ച തത്രൈവ പ്രഹൃഷ്ടോ മുസലായുധഃ
 3 തത്ര ധർമപരോ ഹ്യ് ആസീത് ത്രിതഃ സ സുമഹാതപാഃ
     കൂപേ ച വസതാ തേന സോമഃ പീതോ മഹാത്മനാ
 4 തത്ര ചൈനം സമുത്സൃജ്യ ഭ്രാതരൗ ജഗ്മതുർ ഗൃഹാൻ
     തതസ് തൗ വൈ ശശാപാഥ ത്രിതോ ബ്രാഹ്മണസത്തമഃ
 5 [ജ്]
     ഉദപാനം കഥം ബ്രഹ്മൻ കഥം ച സുമഹാതപാഃ
     പതിതഃ കിം ച സന്ത്യക്തോ ഭ്രാതൃഭ്യാം ദ്വിജസത്തമഃ
 6 കൂപേ കഥം ച ഹിത്വൈനം ഭ്രാതരൗ ജഗ്മതുർ ഗൃഹാൻ
     ഏതദ് ആചക്ഷ്വ മേ ബ്രഹ്മൻ യദി ശ്രാവ്യം ഹി മന്യസേ
 7 [വൈ]
     ആസൻ പൂർവയുഗേ രാജൻ മുനയോ ഭ്രാതരസ് ത്രയഃ
     ഏകതശ് ച ദ്വിതശ് ചൈവ ത്രിതശ് ചാദിത്യസംനിഭാഃ
 8 സർവേ പ്രജാപതിസമാഃ പ്രജാവന്തസ് തഥൈവ ച
     ബ്രഹ്മലോകജിതഃ സർവേ തപസാ ബ്രഹ്മവാദിനഃ
 9 തേഷാം തു തപസാ പ്രീതോ നിയമേന ദമേന ച
     അഭവദ് ഗൗതമോ നിത്യം പിതാ ധർമരതഃ സദാ
 10 സ തു ദീർഘേണ കാലേന തേഷാം പ്രീതിം അവാപ്യ ച
    ജഗാമ ഭഗവാൻ സ്ഥാനം അനുരൂപം ഇവാത്മനഃ
11 രാജാനസ് തസ്യ യേ പൂർവേ യാജ്യാ ഹ്യ് ആസൻ മഹാത്മനഃ
    തേ സർവേ സ്വർഗതേ തസ്മിംസ് തസ്യ പുത്രാൻ അപൂജയൻ
12 തേഷാം തു കർമണാ രാജംസ് തഥൈവാധ്യയനേന ച
    ത്രിതഃ സ ശ്രേഷ്ഠതാം പ്രാപ യഥൈവാസ്യ പിതാ തഥാ
13 തം സ്മ സർവേ മഹാഭാഗാ മുനയഃ പുണ്യലക്ഷണാഃ
    അപൂജയൻ മഹാഭാഗം തഥാ വിദ്വത്തയൈവ തു
14 കദാചിദ് ധി തതോ രാജൻ ഭ്രാതരാവ് ഏകത ദ്വിതൗ
    യജ്ഞാർഥം ചക്രതുശ് ചിത്തം ധനാർഥം ച വിശേഷതഃ
15 തയോശ് ചിന്താ സമഭവത് ത്രിതം ഗൃഹ്യ പരന്തപ
    യാജ്യാൻ സർവാൻ ഉപാദായ പ്രതിഗൃഹ്യ പശൂംസ് തതഃ
16 സോമം പാസ്യാമഹേ ഹൃഷ്ടാഃ പ്രാപ്യ യജ്ഞം മഹാഫലം
    ചക്രുശ് ചൈവ മഹാരാജ ഭ്രാതരസ് ത്രയ ഏവ ഹ
17 തഥാ തു തേ പരിക്രമ്യ യാജ്യാൻ സർവാൻ പശൂൻ പ്രതി
    യാജയിത്വാ തതോ യാജ്യാംൽ ലബ്ധ്വാ ച സുബഹൂൻ പശൂൻ
18 യാജ്യേന കർമണാ തേന പ്രതിഗൃഹ്യ വിധാനതഃ
    പ്രാചീം ദിശം മഹാത്മാന ആജഗ്മുസ് തേ മഹർഷയഃ
19 ത്രിതസ് തേഷാം മഹാരാജ പുരസ്താദ് യാതി ഹൃഷ്ടവത്
    ഏകതശ് ച ദ്വിതശ് ചൈവ പൃഷ്ഠതഃ കാലയൻ പശൂൻ
20 തയോശ് ചിന്താ സമഭവദ് ദൃഷ്ട്വാ പശുഗണം മഹത്
    കഥം ന സ്യുർ ഇമാ ഗാവ ആവാഭ്യാം വൈ വിനാ ത്രിതം
21 താവ് അന്യോന്യം സമാഭാഷ്യ ഏകതശ് ച ദ്വിതശ് ച ഹ
    യദ് ഊചതുർ മിഥഃ പാപൗ തൻ നിബോധ ജനേശ്വര
22 ത്രിതോ യജ്ഞേഷു കുശലസ് ത്രിതോ വേദേഷു നിഷ്ഠിതഃ
    അന്യാസ് ത്രിതോ ബഹുതരാ ഗാവഃ സമുപലപ്സ്യതേ
23 തദ് ആവാം സഹിതൗ ഭൂത്വാ ഗാഃ പ്രകാല്യ വ്രജാവഹേ
    ത്രിതോ ഽപി ഗഛതാം കാമം ആവാഭ്യാം വൈ വിനാകൃതഃ
24 തേഷാം ആഗച്ഛതാം രാത്രൗ പഥി സ്ഥാനേ വൃകോ ഽഭവത്
    തഥാ കൂപേ ഽവിദൂരേ ഽഭൂത് സരസ്വത്യാസ് തടേ മഹാൻ
25 അഥ ത്രിതോ വൃകം ദൃഷ്ട്വാ പഥി തിഷ്ഠന്തം അഗ്രതഃ
    തദ്ഭയാദ് അപസർപൻ വൈ തസ്മിൻ കൂപേ പപാത ഹ
    അഗാധേ സുമഹാഘോരേ സർവഭൂതഭയങ്കരേ
26 ത്രിതസ് തതോ മഹാഭാഗഃ കൂപസ്ഥോ മുനിസത്തമഃ
    ആർതനാദം തതശ് ചക്രേ തൗ തു ശുശ്രുവതുർ മുനീ
27 തം ജ്ഞാത്വാ പതിതം കൂപേ ഭ്രാതരാവ് ഏകത ദ്വിതൗ
    വൃകത്രാസാ ച ലോഭാച് ച സമുത്സൃജ്യ പ്രജഗ്മതുഃ
28 ഭ്രാതൃഭ്യാം പശുലുബ്ധാഭ്യാം ഉത്സൃഷ്ടഃ സ മഹാതപാഃ
    ഉദപാനേ മഹാരാജ നിർജലേ പാംസുസംവൃതേ
29 ത്രിത ആത്മാനം ആലക്ഷ്യ കൂപേ വീരുത് തൃണാവൃതേ
    നിമഗ്നം ഭരതശ്രേഷ്ഠ പാപകൃൻ നരകേ യഥാ
30 ബുദ്ധ്യാ ഹ്യ് അഗണയത് പ്രാജ്ഞോ മൃത്യോർ ഭീതോ ഹ്യ് അസോമപഃ
    സോമഃ കഥം നു പാതവ്യ ഇഹസ്ഥേന മയാ ഭവേത്
31 സ ഏവം അനുസഞ്ചിന്ത്യ തസ്മിൻ കൂപേ മഹാതപാഃ
    ദദർശ വീരുധം തത്ര ലംബമാനാം യദൃച്ഛയാ
32 പാംസുഗ്രസ്തേ തതഃ കൂപേ വിചിന്ത്യ സലിലം മുനിഃ
    അഗ്നീൻ സങ്കൽപയാം ആസ ഹോത്രേ ചാത്മാനം ഏവ ച
33 തതസ് താം വീരുധം സോമം സങ്കൽപ്യ സുമഹാതപാഃ
    ഋച്ചോ യജൂംഷി സാമാനി മനസാ ചിന്തയൻ മുനിഃ
    ഗ്രാഹാണഃ ശർകരാഃ കൃത്വാ പ്രചക്രേ ഽഭിഷവം നൃപ
34 ആജ്യം ച സലിലം ചക്രേ ഭാഗാംശ് ച ത്രിദിവൗകസാം
    സോമസ്യാഭിഷവം കൃത്വാ ചകാര തുമുലം ധ്വനിം
35 സ ചാവിശദ് ദിവം രാജൻ സ്വരഃ ശൈക്ഷസ് ത്രിതസ്യ വൈ
    സമവാപ ച തം യജ്ഞം യഥോക്തം ബ്രഹ്മവാദിഭിഃ
36 വർതമാനേ തഥാ യജ്ഞേ ത്രിതസ്യ സുമഹാത്മനഃ
    ആവിഗ്നം ത്രിദിവം സർവം കാരണം ച ന ബുധ്യതേ
37 തതഃ സുതുമുലം ശബ്ദം ശുശ്രാവാഥ ബൃഹസ്പതിഃ
    ശ്രുത്വാ ചൈവാബ്രവീദ് ദേവാൻ സർവാൻ ദേവപുരോഹിതഃ
38 ത്രിതസ്യ വർതതേ യജ്ഞസ് തത്ര ഗച്ഛാമഹേ സുരാഃ
    സ ഹി ക്രുദ്ധഃ സൃജേദ് അന്യാൻ ദേവാൻ അപി മഹാതപാഃ
39 തച് ഛ്രുത്വാ വചനം തസ്യ സഹിതാഃ സർവദേവതാഃ
    പ്രയയുസ് തത്ര യത്രാസൗ ത്രിത യജ്ഞഃ പ്രവർതതേ
40 തേ തത്ര ഗത്വാ വിഭുധാസ് തം കൂപം യത്ര സ ത്രിതഃ
    ദദൃശുസ് തം മഹാത്മാനം ദീഷ്കിതം യജ്ഞകർമസു
41 ദൃഷ്ട്വാ ചൈനം മഹാത്മാനം ശ്രിയാ പരമയാ യുതം
    ഊചുശ് ചാഥ മഹാഭാഗം പ്രാപ്താ ഭാഗാർഥിനോ വയം
42 അഥാബ്രവീദ് ഋഷിർ ദേവാൻ പശ്യധ്വം മാം ദിവൗകസഃ
    അസ്മിൻ പ്രതിഭയേ കൂപേ നിമഗ്നം നഷ്ടചേതസം
43 തതസ് ത്രിതോ മഹാരാജ ഭാഗാംസ് തേഷാം യഥാവിധി
    മന്ത്രയുക്താൻ സമദദാത് തേ ച പ്രീതാസ് തദാഭവൻ
44 തതോ യഥാവിധി പ്രാപ്താൻ ഭാഗാൻ പ്രാപ്യ ദിവൗകസഃ
    പ്രീതാത്മാനോ ദദുസ് തസ്മൈ വരാൻ യാൻ മനസേച്ഛതി
45 സ തു വവ്രേ വരം ദേവാംസ് ത്രാതും അർഹഥ മാം ഇതഃ
    യശ് ചേഹോപസ്പൃശേത് കൂപേ സ സോമപ ഗതിം ലഭേത്
46 തത്ര ചോർമിമതീ രാജന്ന് ഉത്പപാത സരസ്വതീ
    തയോത്ക്ഷിപ്തസ് ത്രിതസ് തസ്ഥൗ പൂജയംസ് ത്രിദിവൗകസഃ
47 തഥേതി ചോക്ത്വാ വിബുധാ ജഗ്മൂ രാജൻ യഥാഗതം
    ത്രിതശ് ചാപ്യ് അഗമത് പ്രീതഃ സ്വം ഏവ നിലയം തദാ
48 ക്രുദ്ധഃ സ തു സമാസാദ്യ താവ് ഋഷീ ഭ്രാതരൗ തദാ
    ഉവാച പരുഷം വാക്യം ശശാപ ച മഹാതപാഃ
49 പശുലുബ്ധൗ യുവാം യസ്മാൻ മാം ഉത്സൃജ്യ പ്രധാവിതൗ
    തസ്മാദ് രൂപേണ തേഷാം വൈ ദംഷ്ട്രിണ്ണാം അഭിതശ് ചരൗ
50 ഭവിതാരൗ മയാ ശപ്തൗ പാപേനാനേന കർമണാ
    പ്രസവശ് ചൈവ യുവയോർ ഗോലാംഗൂലർഷ്ക വാനരാഃ
51 ഇത്യ് ഉക്തേ തു തദാ തേന ക്ഷണാദ് ഏവ വിശാം പതേ
    തഥാ ഭൂതാവ് അദൃശ്യേതാം വചനാത് സത്യവാദിനഃ
52 തത്രാപ്യ് അമിതവിക്രാന്തഃ സ്പൃഷ്ട്വാ തോയം ഹലായുധഃ
    ദത്ത്വാ ച വിവിധാൻ ദായാൻ പൂജയിത്വാ ച വൈ ദ്വിജാൻ
53 ഉദപാനം ച തം ദൃഷ്ട്വാ പ്രശസ്യ ച പുനഃ പുനഃ
    നദീ ഗതം അദീനാത്മാ പ്രാപ്തോ വിനശനം തദാ