മഹാഭാരതം മൂലം/വിരാടപർവം/അധ്യായം9
| ←അധ്യായം8 | മഹാഭാരതം മൂലം/വിരാടപർവം രചന: അധ്യായം9 |
അധ്യായം10→ |
1 [വൈ]
സഹദേവോ ഽപി ഗോപാനാം കൃത്വാ വേഷം അനുത്തമം
ഭാഷാം ചൈഷാം സമാസ്ഥായ വിരാടം ഉപയാദ് അഥ
2 തം ആയാന്തം അഭിപ്രേക്ഷ്യ ഭ്രാജമാനം നരർഷഭം
സമുപസ്ഥായ വൈ രാജാ പപ്രച്ഛ കുരുനന്ദനം
3 കസ്യ വാ ത്വം കുതോ വാ ത്വം കിം വാ താത ചികീർഷസി
ന ഹി മേ ദൃഷ്ടപൂർവസ് ത്വം തത്ത്വം ബ്രൂഹി നരർഷഭ
4 സ പ്രാപ്യ രാജാനം അമിത്രതാപനസ്; തതോ ഽബ്രവീൻ മേഘമഹൗഘനിഃസ്വനഃ
വൈശ്യോ ഽസ്മി നാമ്നാഹം അരിഷ്ടനേമിർ; ഗോസംഖ്യ ആസം കുരുപുംഗവാനാം
5 വസ്തും ത്വയീച്ഛാമി വിശാം വരിഷ്ഠ; താൻ രാജസിംഹാൻ ന ഹി വേദ്മി പാർഥാൻ
ന ശക്യതേ ജീവിതും അന്യകർമണാ; ന ച ത്വദന്യോ മമ രോചതേ നൃപഃ
6 [വിരാട]
ത്വം ബ്രാഹ്മണോ യദി വാ ക്ഷത്രിയോ ഽസി; സമുദ്രനേമീശ്വര രൂപവാൻ അസി
ആചക്ഷ്വ മേ തത്ത്വം അമിത്രകർശന; ന വൈശ്യകർമ ത്വയി വിദ്യതേ സമം
7 കസ്യാസി രാജ്ഞോ വിഷയാദ് ഇഹാഗതഃ; കിം ചാപി ശിൽപം തവ വിദ്യതേ കൃതം
കഥം ത്വം അസ്മാസു നിവത്സ്യസേ സദാ; വദസ്വ കിം ചാപി തവേഹ വേതനം
8 [സഹ]
പഞ്ചാനാം പാണ്ഡുപുത്രാണാം ജ്യേഷ്ഠോ രാജാ യുധിഷ്ഠിരഃ
തസ്യാഷ്ട ശതസാഹസ്രാ ഗവാം വർഗാഃ ശതം ശതാഃ
9 അപരേ ദശസാഹസ്രാ ദ്വിസ് താവന്തസ് തഥാപരേ
തേഷാം ഗോസംഖ്യ ആസം വൈ തന്തിപാലേതി മാം വിദുഃ
10 ഭൂതം ഭവ്യം ഭവിഷ്യച് ച യച് ച സംഖ്യാ ഗതം ക്വ ചിത്
ന മേ ഽസ്ത്യ് അവിദിതം കിം ചിത് സമന്താദ് ദശയോജനം
11 ഗുണാഃ സുവിദിതാ ഹ്യ് ആസൻ മമ തസ്യ മഹാത്മനഃ
ആസീച് ച സ മയാ തുഷ്ടഃ കുരുരാജോ യുധിഷ്ഠിരഃ
12 ക്ഷിപ്രം ഹി ഗാവോ ബഹുലാ ഭവന്തി; ന താസു രോഗോ ഭവതീഹ കശ് ചിത്
തൈസ് തൈർ ഉപായൈർ വിദിതം മയൈതദ്; ഏതാനി ശിൽപാനി മയി സ്ഥിതാനി
13 വൃഷഭാംശ് ചാപി ജാനാമി രാജൻ പൂജിത ലക്ഷണാൻ
യേഷാം മൂത്രം ഉപാഘ്രായ അപി വന്ധ്യാ പ്രസൂയതേ
14 [വിരാട]
ശതം സഹസ്രാണി സമാഹിതാനി; വർണസ്യ വർണസ്യ വിനിശ്ചിതാ ഗുണൈഃ
പശൂൻ സപാലാൻ ഭവതേ ദദാമ്യ് അഹം; ത്വദാശ്രയാ മേ പശവോ ഭവന്ത്വ് ഇഹ
15 [വൈ]
തഥാ സ രാജ്ഞോ ഽവിദിതോ വിശാം പതേ; ഉവാസ തത്രൈവ സുഖം നരേശ്വരഃ
ന ചൈനം അന്യേ ഽപി വിദുഃ കഥം ചന; പ്രാദാച് ച തസ്മൈ ഭരണം യഥേപ്സിതം