മഹാഭാരതം മൂലം/വിരാടപർവം/അധ്യായം10
| ←അധ്യായം9 | മഹാഭാരതം മൂലം/വിരാടപർവം രചന: അധ്യായം10 |
അധ്യായം11→ |
1 [വൈ]
അഥാപരോ ഽദൃശ്യത രൂപസമ്പദാ; സ്ത്രീണാം അലങ്കാരധരോ ബൃഹത് പുമാൻ
പ്രാകാരവപ്രേ പ്രതിമുച്യ കുണ്ഡലേ; ദീർഘേ ച കംബൂ പരിഹാടകേ ശുഭേ
2 ബഹൂംശ് ച ദീർഘാംശ് ച വികീര്യ മൂർധജാൻ; മഹാഭുജോ വാരണമത്തവിക്രമഃ
ഗതേന ഭൂമിം അഭികമ്പയംസ് തദാ; വിരാടം ആസാദ്യ സഭാ സമീപതഃ
3 തം പ്രേക്ഷ്യ രാജോപഗതം സഭാ തലേ; സത്ര പ്രതിച്ഛന്നം അരിപ്രമാഥിനം
വിരാജമാനം പരമേണ വർചസാ; സുതം മഹേന്ദ്രസ്യ ഗജേന്ദ്രവിക്രമം
4 സർവാൻ അപൃച്ഛച് ച സമീപചാരിണഃ; കുതോ ഽയം ആയാതി ന മേ പുരാശ്രുതഃ
ന ചൈനം ഊചുർ വിദിതം തദാ നരാഃ; സ വിസ്മിതം വാക്യം ഇദം നൃപോ ഽബ്രവീത്
5 സർവോപപന്നഃ പുരുഷോ മനോരമഃ; ശ്യാമോ യുവാ വാരണയൂഥപോപമാഃ
വിമുച്യ കംബൂ പരിഹാടകേ; ശുഭേ വിമുച്യ വേണീം അപിനഹ്യ കുണ്ഡലേ
6 ശിഖീ സുകേശഃ പരിധായ ചാന്യഥാ; ഭവസ്വ ധന്വീ കവചീ ശരീ തഥാ
ആരുഹ്യ യാനം പരിധാവതാം ഭവാൻ; സുതൈഃ സമോ മേ ഭവ വാ മയാ സമഃ
7 വൃദ്ധോ ഹ്യ് അഹം വൈ പരിഹാര കാമഃ; സർവാൻ മത്സ്യാംസ് തരസാ പാലയസ്വ
നൈവംവിധാഃ ക്ലീബ രൂപാ ഭവന്തി; കഥം ചനേതി പ്രതിഭാതി മേ മനഃ
8 [അർജുന]
ഗായാമി നൃത്യാമ്യ് അഥ വാദയാമി; ഭദ്രോ ഽസ്മി നൃത്തേ കുശലോ ഽസ്മി ഗീതേ
ത്വം ഉത്തരായാഃ പരിദത്സ്വ മാം സ്വയം; ഭവാമി ദേവ്യാ നരദേവ നർതകഃ
9 ഇദം തു രൂപം മമ യേന കിം നു തത്; പ്രകീർതയിത്വാ ഭൃശശോകവർധനം
ബൃഹന്നഡാം വൈ നരദേവ വിദ്ധി മാം; സുതം സുതാം വാ പിതൃമാതൃവർജിതാം
10 [വിരാട]
ദദാമി തേ ഹന്ത വരം ബൃഹന്നഡേ; സുതാം ച മേ നർതയ യാശ് ച താദൃശീഃ
ഇദം തു തേ കർമ സമം ന മേ മതം; സമുദ്രനേമിം പൃഥിവീം ത്വം അർഹസി
11 [വൈ]
ബൃഹന്നഡാം താം അഭിവീക്ഷ്യ മത്സ്യരാട്; കലാസു നൃത്തേ ച തഥൈവ വാദിതേ
അപുംസ്ത്വം അപ്യ് അസ്യ നിശമ്യ ച സ്ഥിരം; തതഃ കുമാരീ പുരം ഉത്സസർജ തം
12 സ ശിക്ഷയാം ആസ ച ഗീതവാദിതം; സുതാം വിരാടസ്യ ധനഞ്ജയഃ പ്രഭുഃ
സഖീശ് ച തസ്യാഃ പരിചാരികാസ് തഥാ; പ്രിയശ് ച താസാം സ ബഭൂവ പാണ്ഡവഃ
13 തഥാ സ സത്രേണ ധനഞ്ജയോ ഽവസത്; പ്രിയാണി കുർവൻ സഹ താഭിർ ആത്മവാൻ
തഥാഗതം തത്ര ന ജജ്ഞിരേ ജനാ; ബഹിശ്ചരാ വാപ്യ് അഥ വാന്തരേ ചരാഃ