മഹാഭാരതം മൂലം/വിരാടപർവം/അധ്യായം65

മഹാഭാരതം മൂലം/വിരാടപർവം
രചന:വ്യാസൻ
അധ്യായം65

1 [വൈ]
     തതസ് തൃതീയേ ദിവസേ ഭ്രാതരഃ പഞ്ച പാണ്ഡവാഃ
     സ്നാതാഃ ശുക്ലാംബര ധരാഃ സമയേ ചരിതവ്രതാഃ
2 യുധിഷ്ഠിരം പുരസ്കൃത്യ സർവാഭരണഭൂഷിതാഃ
     അഭിപദ്മാ യഥാ നാഗാ ഭ്രാജമാനാ മഹാരഥാഃ
3 വിരാടസ്യ സഭാം ഗത്വാ ഭൂമിപാലാസനേഷ്വ് അഥ
     നിഷേദുഃ പാവകപ്രഖ്യാഃ സർവേ ധിഷ്ണ്യേഷ്വ് ഇവാഗ്നയഃ
4 തേഷു തത്രോപവിഷ്ടേഷു വിരാടഃ പൃഥിവീപതിഃ
     ആജഗാമ സഭാം കർതും രാജകാര്യാണി സർവശഃ
5 ശ്രീമതഃ പാണ്ഡവാൻ ദൃഷ്ട്വാ ജ്വലതഃ പാവകാൻ ഇവ
     അഥ മത്സ്യോ ഽബ്രവീത് കങ്കം ദേവരൂപം അവസ്ഥിതം
     മരുദ്ഗണൈർ ഉപാസീനം ത്രിദശാനാം ഇവേശ്വരം
6 സ കിലാക്ഷാതി വാപസ് ത്വം സഭാസ്താരോ മയാ കൃതഃ
     അഥ രാജാസനേ കസ്മാദ് ഉപവിഷ്ടോ ഽസ്യ് അലം കൃതഃ
7 പരിഹാസേപ്സയാ വാക്യം വിരാടസ്യ നിശമ്യ ത
     സ്മയമാനോ ഽർജുനോ രാജന്ന് ഇദം വചനം അബ്രവീത്
8 ഇന്ദ്രസ്യാപ്യ് ആസനം രാജന്ന് അയം ആരോഢും അർഹതി
     ബ്രഹ്മണ്യഃ ശുതവാംസ് ത്യാഗീ യജ്ഞശീലോ ദൃഢവ്രതഃ
9 അയം കുരൂണാം ഋഷഭഃ കുന്തീപുത്രോ യുധിഷ്ഠിരഃ
     അസ്യ കീർതിഃ സ്ഥിതാ ലോകേ സൂര്യസ്യേവോദ്യതഃ പ്രഭാ
10 സംസരന്തി ദിശഃ സർവാ യശസോ ഽസ്യ ഗഭസ്തയഃ
    ഉദിതസ്യേവ സൂര്യസ്യ തേജസോ ഽനു ഗഭസ്തയഃ
11 ഏനം ദശസഹസ്രാണി കുഞ്ജരാണാം തരസ്വിനാം
    അന്വയുഃ പൃഷ്ഠതോ രാജൻ യാവദ് അധ്യാവസത് കുരൂൻ
12 ത്രിംശദ് ഏനം സഹസ്രാണി രഥാഃ കാഞ്ചനമാലിനഃ
    സദശ്വൈർ ഉപസമ്പന്നാഃ പൃത്ഠതോ ഽനുയയുഃ സദാ
13 ഏനം അഷ്ട ശതാഃ സൂതാഃ സുമൃഷ്ടമണികുണ്ഡലാഃ
    അസ്തുവൻ മാഗധൈർ സാർധം പുരാ ശക്രം ഇവർഷയഃ
14 ഏനം നിത്യം ഉപാസന്ദ് അകുരവഃ കിങ്കരാ യഥാ
    സർവേ ച രാജൻ രാജാനോ ധനേശ്വരം ഇവാമരാഃ
15 ഏഷ സർവാൻ മഹീപാലാൻ കരം ആഹാരയത് തദാ
    വൈശ്യാൻ ഇവ മഹാരാജ വിവശാൻ സ്വവശാൻ അപി
16 അഷ്ടാശീതി സഹസ്രാണി സ്നാതകാനാം മഹാത്മനാം
    ഉപജീവന്തി രാജാനം ഏനം സുചരിതവ്രതം
17 ഏഷ വൃദ്ധാൻ അനാഥാംശ് ച വ്യംഗാൻ പംഗൂംശ് ച മാനവാൻ
    പുത്രവത് പാലയാം ആസ പ്രജാ ധർമേണ ചാഭിഭോ
18 ഏഷ ധർമേ ദമേ ചൈവ ക്രോധേ ചാപി യതവ്രതഃ
    മഹാപ്രസാദ ബ്രഹ്മണ്യഃ സത്യവാദീ ച പാർഥിവഃ
19 ശ്രീപ്രതാപേന ചൈതസ്യ തപ്യതേ സ സുയോധനഃ
    സഗണഃ സഹ കർണേന സൗബലേനാപി വാ വിഭുഃ
20 ന ശക്യന്തേ ഹ്യ് അസ്യ് അഗുണാഃ പ്രസംഖ്യാതും നരേശ്വര
    ഏഷ ധർമപരോ നിത്യം ആനൃശംസ്യശ് ച പാണ്ഡവഃ
21 ഏവം യുക്തോ മഹാരാജഃ പാണ്ഡവഃ പാർഥിവർഷഭഃ
    കഥം നാർഹതി രാജാർഹം ആസനം പൃഥിവീപതിഃ