മഹാഭാരതം മൂലം/വിരാടപർവം/അധ്യായം52

മഹാഭാരതം മൂലം/വിരാടപർവം
രചന:വ്യാസൻ
അധ്യായം52

1 [വൈ]
     ഏതസ്മിന്ന് അന്തരേ തത്ര മഹാവീര്യപരാക്രമഃ
     ആജഗാമ മഹാസത്ത്വഃ കൃപഃ ശസ്ത്രഭൃതാം വരഃ
     അർജുനം പ്രതി സംയോദ്ധും യുദ്ധാർഥീ സ മഹാരഥഃ
2 തൗ രഥൗ സൂര്യസങ്കാശൗ യോത്സ്യമാനൗ മഹാബലൗ
     ശാരദാവ് ഇവ ജീമൂതൗ വ്യരോചേതാം വ്യവസ്ഥിതൗ
3 പാർഥോ ഽപി വിശ്രുതം ലോകേ ഗാണ്ഡീവം പരമായുധം
     വികൃഷ്യ ചിക്ഷേപ ബഹൂൻ നാരാചാൻ മർമഭേദിനഃ
4 താൻ അപ്രാപ്താഞ് ശിതൈർ ബാണൈർ നാരാചാൻ രക്തഭോജനാൻ
     കൃപശ് ചിച്ഛേദ പാർഥസ്യ ശതശോ ഽഥ സഹസ്രശഃ
5 തതഃ പാർഥശ് ച സങ്ക്രുദ്ധശ് ചിത്രാൻ മാർഗാൻ പ്രദർശയൻ
     ദിശഃ സഞ്ഛാദയൻ ബാണൈഃ പ്രദിശശ് ച മഹാരഥഃ
6 ഏകഛായം ഇവാകാശം പ്രകുർവൻ സർവതഃ പ്രഭുഃ
     പ്രധാദയദ് അമേയാത്മാ പാർഥഃ ശരശതൈഃ കൃപം
7 സ ശരൈർ അർപിതഃ ക്രുദ്ധഃ ശിതൈർ അഗ്നിശിഖോപമൈഃ
     തൂർണം ശരസഹസ്രേണ പാർഥം അപ്രതിമൗജസം
     അർപയിത്വാ മഹാത്മാനം നനാദ സമരേ കൃപഃ
8 തതഃ കനകപുംഖാഗ്രൈർ വീരഃ സംനതപർവഭിഃ
     ത്വരൻ ഗാണ്ഡീവനിർമുക്തൈർ അർജുനസ് തസ്യ വാജിനഃ
     ചതുർഭിശ് ചതുരസ് തീക്ഷ്ണൈർ അവിധ്യത് പരമേഷുഭിഃ
9 തേ ഹയാ നിശിതൈർ വിദ്ധാ ജ്വലദ് ഭിർ ഇവ പന്നഗൈഃ
     ഉത്പേതുഃ സഹസാ സർവേ കൃപഃ സ്ഥാനാദ് അഥാച്യവത്
10 ച്യുതം തു ഗൗതമം സ്ഥാനാത് സമീക്ഷ്യ കുരുനന്ദനഃ
    നാവിധ്യത് പരവീരഘ്നോ രക്ഷമാണോ ഽസ്യ ഗൗരവം
11 സ തു ലബ്ധ്വാ പുനഃ സ്ഥാനം ഗൗതമഃ സവ്യസാചിനം
    വിവ്യാധ ദശഭിർ ബാണൈസ് ത്വരിതഃ കങ്കപത്രിഭിഃ
12 തതഃ പാർഥോ ധനുസ് തസ്യ ഭല്ലേന നിശിതേന ച
    ചിച്ഛേദൈകേന ഭൂയശ് ച ഹസ്താച് ചാപം അഥാഹരത്
13 അഥാസ്യ കവചം ബാണൈർ നിശിതൈർ മർമഭേദിഭിഃ
    വ്യധമൻ ന ച പാർഥോ ഽസ്യ ശരീരം അവപീഡയത്
14 തസ്യ നിർമുച്യമാനസ്യ കവചാത് കായ ആബഭൗ
    സമയേ മുച്യമാനസ്യ സർപസ്യേവ തനുർ യഥാ
15 ഛിന്നേ ധനുഷി പാർഥേന സോ ഽന്യദ് ആദായ കാർമുകം
    ചകാര ഗൗതമഃ സജ്യം തദ് അദ്ഭുതം ഇവാഭവത്
16 സ തദ് അപ്യ് അസ്യ കൗന്തേയശ് ചിച്ഛേദ നതപർവണാ
    ഏവം അന്യാനി ചാപാനി ബഹൂനി കൃതഹസ്തവത്
    ശാരദ്വതസ്യ ചിച്ഛേദ പാണ്ഡവഃ പരവീഹ്ര ഹാ
17 സ ഛിന്നധനുർ ആദായ അഥ ശക്തിം പ്രതാപവാൻ
    പ്രാഹിണോത് പാണ്ഡുപുത്രായ പ്രദീപ്താം അശനീം ഇവ
18 താം അർജുനസ് തദായാന്തീം ശക്തിം ഹേമവിഭൂഷിതാം
    വിയദ് ഗതാം മഹോൽകാഭം ചിച്ഛേദ ദശഭിഃ ശരൈഃ
    സാപതദ് ദശധാ ഛിന്നാ ഭൂമൗ പാർഥേന ധീമതാ
19 യുഗമധ്യേ തു ഭല്ലൈസ് തു തതഃ സ സധനുഃ കൃപഃ
    തം ആശു നിശിതൈഃ പാർഥം ബിഭേദ ദശഭിഃ ശരൈഃ
20 തതഃ പാർഥോ മഹാതേജാ വിശിഖാൻ അഗ്നിതേജസഃ
    ചിക്ഷേപ സമരേ ക്രുദ്ധസ് ത്രയോദശ ശിലാശിതാൻ
21 അഥാസ്യ യുഗം ഏകേന ചതുർഭിശ് ചതുരോ ഹയാൻ
    ഷഷ്ഠേന ച ശിരഃ കായാച് ഛരേണ രഥസാരഥേഃ
22 ത്രിഭിസ് ത്രിവേണും സമരേ ദ്വാഭ്യാം അക്ഷൗ മഹാബലഃ
    ദ്വാദശേന തു ഭല്ലേന ചകർതാസ്യ ധ്വജം തഥാ
23 തതോ വർജ നികാശേന ഫൽഗുനഃ പ്രഹസന്ന് ഇവ
    ത്രയോദശേനേന്ദ്രസമഃ കൃപം വക്ഷസ്യ് അതാഡയത്
24 സ ഛിന്നധന്വാ വിരഥോ ഹതാശ്വോ ഹതസാരഥിഃ
    ഗദാപാണിർ അവപ്ലുത്യ തൂർണം ചിക്ഷേപ താം ഗദാം
25 സാ തു മുക്താ ഗദാ ഗുർവീ കൃപേണ സുപരിഷ്കൃതാ
    അർജുനേന ശരൈർ നുന്നാ പ്രതി മാർഗം അഥാഗമത്
26 തതോ യോധാഃ പരീപ്സന്തഃ ശാരദ്വതം അമർഷണം
    സർവതഃ സമരേ പാർഥം ശരവർഷൈർ അവാകിരൻ
27 തതോ വിരാടസ്യ സുതഃ സവ്യം ആവൃത്യ വാജിനഃ
    യമകം മണ്ഡലം കൃത്വാ താൻ യോധാൻ പ്രത്യവാരയത്
28 തതഃ കൃപം ഉപാദായ വിരഥം തേ നരർഷഭാഃ
    അജാജഹ്രുർ മഹാവേഗാഃ കുന്തീപുത്രാദ് ധനഞ്ജയാത്