മഹാഭാരതം മൂലം/വിരാടപർവം/അധ്യായം47

മഹാഭാരതം മൂലം/വിരാടപർവം
രചന:വ്യാസൻ
അധ്യായം47

1 [ഭീസ്മ]
     കലാംശാസ് താത യുജ്യന്തേ മുഹൂർതാശ് ച ദിനാനി ച
     അർധമാസാശ് ച മാസാശ് ച നക്ഷത്രാണി ഗ്രഹാസ് തഥാ
2 ഋതവശ് ചാപി യുജ്യന്തേ തഥാ സംവത്സരാ അപി
     ഏവം കാലവിഭാഗേന കാലചക്രം പ്രവർതതേ
3 തേഷാം കാലാതിരേകേണ ജ്യോതിഷാം ച വ്യതിക്രമാത്
     പഞ്ചമേ പഞ്ചമേ വർഷേ ദ്വൗ മാസാവ് ഉപജായതഃ
4 തേഷാം അഭ്യധികാ മാസാഃ പഞ്ച ദ്വാദശ ച ക്ഷപാഃ
     ത്രയോദശാനാം വർഷാണാം ഇതി മേ വർതതേ മതിഃ
5 സർവം യഥാവച് ചരിതം യദ് യദ് ഏഭിഃ പരിശ്രുതം
     ഏവം ഏതദ് ധ്രുവം ജ്ഞാത്വാ തതോ ബീഭത്സുർ ആഗതഃ
6 സർവേ ചൈവ മഹാത്മാനഃ സർവേ ധർമാർഥകോവിദാഃ
     യേഷാം യുധിഷ്ഠിരോ രാജാ കസ്മാദ് ധർമേ ഽപരാധ്നുയുഃ
7 അലുബ്ധാശ് ചൈവ കൗന്തേയാഃ കൃതവന്തശ് ച ദുഷ്കരം
     ന ചാപി കേവലം രാജ്യം ഇച്ഛേയുസ് തേ ഽനുപായതഃ
8 തദൈവ തേ ഹി വിക്രാന്തും ഈഷുഃ കൗരവനന്ദനാഃ
     ധർമപാശനിബദ്ധാസ് തു ന ചേലുഃ ക്ഷത്രിയ വ്രതാത്
9 യച് ചാനൃത ഇതി ഖ്യായേദ് യച് ച ഗച്ഛേത് പരാഭവം
     വൃണുയുർ മരണം പാർഥാ നാനൃതത്വം കഥം ചന
10 പ്രാപ്തേ തു കാലേ പ്രാപ്തവ്യം നോത്സൃജേയുർ നരർഷഭാഃ
    അപി വജ്രഭൃതാ ഗുപ്തം തഥാ വീര്യാ ഹി പാണ്ഡവാഃ
11 പ്രതിയുധ്യാമ സമരേ സർവശസ്ത്രഭൃതാം വരം
    തസ്മാദ് യദ് അത്ര കല്യാണം ലോകേ സദ് ഭിർ അനുഷ്ഠിതം
    തത് സംവിധീയതാം ക്ഷിപ്രം മാ നോ ഹ്യ് അർഥോ ഽതിഗാത് പരാൻ
12 ന ഹി പശ്യാമി സംഗ്രാമേ കദാ ചിദ് അപി കൗരവ
    ഏകാന്തസിദ്ധിം രാജേന്ദ്ര സമ്പ്രാപ്തശ് ച ധനഞ്ജയഃ
13 സമ്പ്രവൃത്തേ തു സംഗ്രാമേ ഭാവാഭാവൗ ജയാജയൗ
    അവശ്യം ഏകം സ്പൃശതോ ദൃഷ്ടം ഏതദ് അസംശയം
14 തസ്മാദ് യുദ്ധാവചരികം കർമ വാ ധർമസംഹിതം
    ക്രിയതാം ആശു രാജേന്ദ്ര സമ്പ്രാപ്തോ ഹി ധനഞ്ജയഃ
15 [ദുർ]
    നാഹം രാജ്യം പ്രദാസ്യാമി പാണ്ഡവാനാം പിതാമഹ
    യുദ്ധാവചാരികം യത് തു തച് ഛീഘ്രം സംവിധീയതാം
16 [ഭീസ്മ]
    അത്ര യാ മാമകീ ബുദ്ധിഃ ശ്രൂയതാം യദി രോചതേ
    ക്ഷിപ്രം ബലചതുർഭാഗം ഗൃഹ്യ ഗച്ഛ പുരം പ്രതി
    തതോ ഽപരശ് ചതുർഭാഗോ ഗാഃ സമാദായ ഗച്ഛതു
17 വയം ത്വ് അർധേന സൈന്യേന പ്രതിയോത്സ്യാമ പാണ്ഡവം
    മത്സ്യം വാ പുനർ ആയാതം അഥ വാപി ശതക്രതും
18 ആചാര്യോ മധ്യതസ് തിഷ്ഠത്വ് അശ്വത്ഥാമാ തു സവ്യതഃ
    കൃപഃ ശാരദ്വതോ ധീമാൻ പാർശ്വം രക്ഷതു ദക്ഷിണം
19 അഗ്രതഃ സൂതപുത്രസ് തു കർണസ് തിഷ്ഠതു ദംശിതഃ
    അഹം സർവസ്യ സൈനസ്യ പശ്ചാത് സ്ഥാസ്യാമി പാലയൻ