മഹാഭാരതം മൂലം/വിരാടപർവം/അധ്യായം43

മഹാഭാരതം മൂലം/വിരാടപർവം
രചന:വ്യാസൻ
അധ്യായം43

1 [കർണ]
     സർവാൻ ആയുഷ്മതോ ഭീതാൻ സന്ത്രസ്താൻ ഇവ ലക്ഷയേ
     അയുദ്ധമനസശ് ചൈവ സർവാംശ് ചൈവാനവസ്ഥിതാൻ
2 യദ്യ് ഏഷ രാജാ മത്സ്യാനാം യദി ബീഭത്സുർ ആഗതഃ
     അഹം ആവാരയിഷ്യാമി വേലേവ മകരാലയം
3 മമ ചാപപ്രമുക്താനാം ശരാണാം നതപർവണാം
     നാവൃത്തിർ ഗച്ഛതാം അസ്തി സർപാണാം ഇവ സർപതാം
4 രുക്മപുംഖാഃ സുതീക്ഷ്ണാഗ്രാ മുക്താ ഹസ്തവതാ മയാ
     ഛാദയന്തു ശരാഃ പാർഥം ശലഭാ ഇവ പാദപം
5 ശരാണാം പുംഖസക്താനാം മൗർവ്യാഭിഹതയാ ദൃഢം
     ശ്രൂയതാം തലയോഃ ശബ്ദോ ഭേര്യോർ ആഹതയോർ ഇവ
6 സമാഹിതോ ഹി ബീഭത്സുർ വർഷാണ്യ് അഷ്ടൗ ച പഞ്ച ച
     ജാതസ്നേഹശ് ച യുദ്ധസ്യ മയി സമ്പ്രഹരിഷ്യതി
7 പാത്രീ ഭൂതശ് ച കൗന്തേയോ ബ്രാഹ്മണോ ഗുണവാൻ ഇവ
     ശരൗഘാൻ പ്രതിഗൃഹ്ണാതു മയാ മുക്താൻ സഹസ്രശഃ
8 ഏഷ ചൈവ മഹേഷ്വാസസ് ത്രിഷു ലോകേഷു വിശ്രുതഃ
     അഹം ചാപി കുരുശ്രേഷ്ഠാ അർജുനാൻ നാവരഃ ക്വ ചിത്
9 ഇതശ് ചേതശ് ച നിർമുക്തൈഃ കാഞ്ചനൈർ ഗാർധ്രവാജിതൈഃ
     ദൃശ്യതാം അദ്യ വൈ വ്യോമ ഖദ്യോതൈർ ഇവ സംവൃതം
10 അദ്യാഹം ഋണം അക്ഷയ്യം പുരാ വാചാ പ്രതിശ്രുതം
    ധാർതരാഷ്ട്രസ്യ ദാസ്യാമി നിഹത്യ സമരേ ഽർജുനം
11 അന്തരാ ഛിദ്യമാനാനാം പുംഖാനാം വ്യതിശീര്യതാം
    ശലഭാനാം ഇവാകാശേ പ്രചാരഃ സമ്പ്രദൃശ്യതാം
12 ഇന്ദ്രാശനിസമസ്പർശം മഹേന്ദ്രസമതേജസം
    അർദയിഷ്യാമ്യ് അഹം പാർഥം ഉൽകാഭിർ ഇവ കുഞ്ജരം
13 തം അഗ്നിം ഇവ ദുർധർഷം അസി ശക്തിശരേന്ധനം
    പാണ്ഡവാഗ്നിം അഹം ദീപ്തം പ്രദഹന്തം ഇവാഹിതാൻ
14 അവ വേഗപുരോ വാതോ രഥൗഘസ്തനയിത്നുമാൻ
    ശരധാരോ മഹാമേഘഃ ശമയിഷ്യാമി പാണ്ഡവം
15 മത്കാർമുകവിനിർമുക്താഃ പാർഥം ആശീവിഷോപമാഃ
    ശരാഃ സമഭിസർപന്തു വൽമീകം ഇവ പന്നഗാഃ
16 ജാമദഗ്ന്യാൻ മയാ ഹ്യ് അസ്ത്രം യത് പ്രാപ്തം ഋഷിസത്തമാത്
    തദ് ഉപാശ്രിത്യ വീര്യം ച യുധ്യേയം അപി വാസവം
17 ധ്വജാഗ്രേ വാനരസ് തിഷ്ഠൻ ഭല്ലേന നിഹതോ മയാ
    അദ്യൈവ പതതാം ഭൂമൗ വിനദൻ ഭൈരവാൻ രവാൻ
18 ശത്രോർ മയാഭിപന്നാനാം ഭൂതാനാം ധ്വജവാസിനാം
    ദിശഃ പ്രതിഷ്ഠമാനാനാം അസ്തു ശബ്ദോ ദിവം ഗതഃ
19 അദ്യ ദുര്യോധനസ്യാഹം ശല്യം ഹൃദി ചിരസ്ഥിതം
    സ മൂലം ഉദ്ധരിഷ്യാമി ബീഭത്സും പാതയൻ രഥാത്
20 ഹതാശ്വം വിരഥം പാർഥം പൗരുഷേ പര്യവസ്ഥിതം
    നിഃശ്വസന്തം യഥാ നാഗം അദ്യ പശ്യന്തു കൗരവാഃ
21 കാമം ഗച്ഛന്തു കുരവോ ധനം ആദായ കേവലം
    രഥേഷു വാപി തിഷ്ഠന്തോ യുദ്ധം പശ്യന്തു മാമകം