മഹാഭാരതം മൂലം/വിരാടപർവം/അധ്യായം37
| ←അധ്യായം36 | മഹാഭാരതം മൂലം/വിരാടപർവം രചന: അധ്യായം37 |
അധ്യായം38→ |
1 [വൈ]
തം ദൃഷ്ട്വാ ക്ലീവ വേഷേണ രഥസ്ഥം നരപുംഗവം
ശമീം അഭിമുഖം യാന്തം രഥം ആരോപ്യ ചോത്തരം
2 ഭീഷ്മദ്രോണമുഖാസ് തത്ര കുരൂണാം രഥസത്തമാഃ
വിത്രസ്തമനസഃ സർവേ ധനഞ്ജയ കൃതാദ് ഭയാത്
3 താൻ അവേക്ഷ്യ ഹതോത്സാഹാൻ ഉത്പാതാൻ അപി ചാദ്ഭുതാൻ
ഗുരുഃ ശസ്ത്രഭൃതാം ശ്രേഷ്ഠോ ഭാരദ്വാജോ ഽഭ്യഭാഷത
4 ചലാശ് ച വാതാഃ സംവാന്തി രൂക്ഷാഃ പരുഷനിഃസ്വനാഃ
ഭസ്മ വർണപ്രകാശേന തമസാ സംവൃതം നഭഃ
5 രൂക്ഷവർണാശ് ച ജലദാ ദൃശ്യന്തേ ഽദ്ഭുതദർശനാഃ
നിഃസരന്തി ച കോശേഭ്യഃ ഷസ്ത്രാണി വിവിധാനി ച
6 ശിവാശ് ച വിനദന്ത്യ് ഏതാ ദീപ്തായാം ദിശി ദാരുണാഃ
ഹയാശ് ചാശ്രൂണി മുഞ്ചന്തി ധ്വജാഃ കമ്പന്ത്യ് അകമ്പിതാഃ
7 യാദൃശാന്യ് അത്ര രൂപാണി സന്ദൃശ്യന്തേ ബഹൂന്യ് അപി
യത്താ ഭവന്തസ് തിഷ്ഠന്തു സ്യാദ് യുദ്ധം സമുപസ്ഥിതം
8 രക്ഷധ്വം അപി ചാത്മാനം വ്യൂഹധ്വം വാഹിനീം അപി
വൈശസം ച പ്രതീക്ഷധ്വം രക്ഷധ്വം ചാപി ഗോധനം
9 ഏഷ വീരോ മഹേഷ്വാസഃ സർവശസ്ത്രഭൃതാം വരഃ
ആഗതഃ ക്ലീബ വേഷേണ പാർഥോ നാസ്ത്യ് അത്ര സംശയഃ
10 സ ഏഷ പാർഥോ വിക്രാന്തഃ സവ്യസാചീ പരന്തപഃ
നായുദ്ധേന നിവർതേത സർവൈർ അപി മരുദ്ഗണൈഃ
11 ക്ലേശിതശ് ച വനേ ശൂരോ വാസവേന ച ശിക്ഷിതഃ
അമർഷവശം ആപന്നോ യോത്സ്യതേ നാത്ര സംശയഃ
12 നേഹാസ്യ പ്രതിയോദ്ധാരം അഹം പശ്യാമി കൗരവാഃ
മഹാദേവോ ഽപി പാർഥേന ശ്രൂയതേ യുധി തോഷിതഃ
13 [കർണ]
സദാ ഭവാൻ ഫൽഗുനസ്യ ഗുണൈർ അസ്മാൻ വികത്ഥസേ
ന ചാർജുനഃ കലാ പൂർണാ മമ ദുര്യോധനസ്യ വാ
14 [ദുർ]
യദ്യ് ഏഷ പാർഥോ രാധേയ കൃതം കാര്യം ഭവേൻ മമ
ജ്ഞാതാഃ പുനശ് ചരിഷ്യന്തി ദ്വാദശാന്യാൻ ഹി വത്സരാൻ
15 അഥൈഷ കശ് ചിദ് ഏവാന്യഃ ക്ലീബ വേഷേണ മാനവഃ
ശരൈർ ഏനം സുനിശിതൈഃ പാതയിഷ്യാമി ഭൂതലേ
16 [വൈ]
തസ്മിൻ ബ്രുവതി തദ് വാക്യം ധാർതരാഷ്ട്രേ പരന്തപേ
ഭീഷ്മോ ദ്രോണഃ കൃപോ ദ്രൗണിഃ പൗരുഷം തദ് അപൂജയൻ