മഹാഭാരതം മൂലം/വനപർവം/അധ്യായം55
| ←അധ്യായം54 | മഹാഭാരതം മൂലം/വനപർവം രചന: അധ്യായം55 |
അധ്യായം56→ |
1 ബൃഹദശ്വ ഉവാച
വൃതേ തു നൈഷധേ ഭൈമ്യാ ലോകപാലാ മഹൗജസഃ
യാന്തോ ദദൃശുർ ആയാന്തം ദ്വാപരം കലിനാ സഹ
2 അഥാബ്രവീത് കലിം ശക്രഃ സമ്പ്രേക്ഷ്യ ബലവൃത്രഹാ
ദ്വാപരേണ സഹായേന കലേ ബ്രൂഹി ക്വ യാസ്യസി
3 തതോ ഽബ്രവീത് കലിഃ ശക്രം ദമയന്ത്യാഃ സ്വയംവരം
ഗത്വാഹം വരയിഷ്യേ താം മനോ ഹി മമ തദ്ഗതം
4 തം അബ്രവീത് പ്രഹസ്യേന്ദ്രോ നിർവൃത്തഃ സ സ്വയംവരഃ
വൃതസ് തയാ നലോ രാജാ പതിർ അസ്മത്സമീപതഃ
5 ഏവം ഉക്തസ് തു ശക്രേണ കലിഃ കോപസമന്വിതഃ
ദേവാൻ ആമന്ത്ര്യ താൻ സർവാൻ ഉവാചേദം വചസ് തദാ
6 ദേവാനാം മാനുഷം മധ്യേ യത് സാ പതിം അവിന്ദത
നനു തസ്യാ ഭവേൻ ന്യായ്യം വിപുലം ദണ്ഡധാരണം
7 ഏവം ഉക്തേ തു കലിനാ പ്രത്യൂചുസ് തേ ദിവൗകസഃ
അസ്മാഭിഃ സമനുജ്ഞാതോ ദമയന്ത്യാ നലോ വൃതഃ
8 കശ് ച സർവഗുണോപേതം നാശ്രയേത നലം നൃപം
യോ വേദ ധർമാൻ അഖിലാൻ യഥാവച് ചരിതവ്രതഃ
9 യസ്മിൻ സത്യം ധൃതിർ ദാനം തപഃ ശൗചം ദമഃ ശമഃ
ധ്രുവാണി പുരുഷവ്യാഘ്രേ ലോകപാലസമേ നൃപേ
10 ആത്മാനം സ ശപേൻ മൂഢോ ഹന്യാച് ചാത്മാനം ആത്മനാ
ഏവംഗുണം നലം യോ വൈ കാമയേച് ഛപിതും കലേ
11 കൃച്ഛ്രേ സ നരകേ മജ്ജേദ് അഗാധേ വിപുലേ ഽപ്ലവേ
ഏവം ഉക്ത്വാ കലിം ദേവാ ദ്വാപരം ച ദിവം യയുഃ
12 തതോ ഗതേഷു ദേവേഷു കലിർ ദ്വാപരം അബ്രവീത്
സംഹർതും നോത്സഹേ കോപം നലേ വത്സ്യാമി ദ്വാപര
13 ഭ്രംശയിഷ്യാമി തം രാജ്യാൻ ന ഭൈമ്യാ സഹ രംസ്യതേ
ത്വം അപ്യ് അക്ഷാൻ സമാവിശ്യ കർതും സാഹായ്യം അർഹസി