മഹാഭാരതം മൂലം/വനപർവം/അധ്യായം47
| ←അധ്യായം46 | മഹാഭാരതം മൂലം/വനപർവം രചന: അധ്യായം47 |
അധ്യായം48→ |
1 [ജ്]
യദ് ഇദം ശോചിതം രാജ്ഞാ ധൃതരാഷ്ട്രേണ വൈ മുനേ
പ്രവ്രാജ്യ പാണ്ഡവാൻ വീരാൻ സർവം ഏതൻ നിരർഥകം
2 കഥം ഹി രാജാ പുത്രം സ്വം ഉപേക്ഷേതാൽപ ചേതസം
ദുര്യോധനം പാണ്ഡുപുത്രാൻ കോപയാനം മഹാരഥാൻ
3 കിം ആസീത് പാണ്ഡുപുത്രാണാം വനേ ഭോജനം ഉച്യതാം
വാനേയം അഥ വാ കൃഷ്ടം ഏതദ് ആഖ്യാതു മേ ഭവാൻ
4 [വൈ]
വാനേയം ച മൃഗാംശ് ചൈവ ശുദ്ധൈർ ബാണൈർ നിപാതിതാൻ
ബ്രാഹ്മണാനാം നിവേദ്യാഗ്രം അഭുഞ്ജൻ പുരുഷർഷഭാഃ
5 താംസ് തു ശൂരാൻ മഹേഷ്വാസാംസ് തദാ നിവസതോ വനേ
അന്വയുർ ബ്രാഹ്മണാ രാജൻ സാഗ്നയോ ഽനംഗയസ് തഥാ
6 ബ്രാഹ്മണാനാം സഹസ്രാണി സ്നാതകാനാം മഹാത്മനാം
ദശ മോക്ഷവിദാം തദ്വദ് യാൻ ബിഭർതി യുധിഷ്ഠിരഃ
7 രുരൂൻ കൃഷ്ണമൃഗാംശ് ചൈവ മേധ്യാംശ് ചാന്യാൻ വനേചരാൻ
ബാണൈർ ഉന്മഥ്യ വിധിവദ് ബ്രാഹ്മണേഭ്യോ ന്യവേദയത്
8 ന തത്ര കശ് ചിദ് ദുർവർണോ വ്യാധിതോ വാപ്യ് അദൃശ്യത
കൃശോ വാ ദുർബലോ വാപി ദീനോ ഭീതോ ഽപി വാ നരഃ
9 പുത്രാൻ ഇവ പ്രിയാഞ് ജ്ഞാതീൻ ഭ്രാതൄൻ ഇവ സഹോദരാൻ
പുപോഷ കൗരവശ്രേഷ്ഠോ ധർമരാജോ യുധിഷ്ഠിരഃ
10 പതീംശ് ച ദ്രൗപദീ സർവാൻ ദ്വിജാംശ് ചൈവ യശസ്വിനീ
മാതേവ ഭോജയിത്വാഗ്രേ ശിഷ്ടം ആഹാരയത് തദാ
11 പ്രാചീം രാജാ ദക്ഷിണാം ഭീമസേനോ; യമൗ പ്രതീചീം അഥ വാപ്യ് ഉദീചീം
ധനുർധരാ മാംസഹേതോർ മൃഗാണാം; ക്ഷയം ചക്രുർ നിത്യം ഏവോപഗമ്യ
12 തഥാ തേഷാം വസതാം കാമ്യകേ വൈ; വിഹീനാനാം അർജുനേനോത്സുകാനാം
പഞ്ചൈവ വർഷാണി തദാ വ്യതീയുർ; അധീയതാം ജപതാം ജുഹ്വതാം ച