മഹാഭാരതം മൂലം/വനപർവം/അധ്യായം296
| ←അധ്യായം295 | മഹാഭാരതം മൂലം/വനപർവം രചന: അധ്യായം296 |
അധ്യായം297→ |
1 [യ്]
നാപദാം അസ്തി മര്യാദാ ന നിമിത്തം ന കാരണം
ധർമസ് തു വിഭജത്യ് അത്ര ഉഭയോഃ പുണ്യപാപയോഃ
2 [ഭീമ]
പ്രാതികാമ്യ് അനയത് കൃഷ്ണാം സഭായാം പ്രേഷ്യവത് തദാ
ന മയാ നിഹതസ് തത്ര തേന പ്രാപ്താഃ സ്മ സംശയം
3 [അർജ്]
വാചസ് തീക്ഷ്ണാസ്ഥി ഭേദിന്യഃ സൂതപുത്രേണ ഭാഷിതാഃ
അതിതീക്ഷ്ണാ മയാ ക്ഷാന്താസ് തേന പ്രാപ്തഃ സ്മ സംശയം
4 [സഹദേവ]
ശകുനിസ് ത്വാം യദാജൈഷീദ് അക്ഷദ്യൂതേന ഭാരത
സ മയാ ന ഹതസ് തത്ര തേന പ്രാപ്താഃ സ്മ സംശയം
5 [വൈ]
തതോ യുധിഷ്ഠിരോ രാജാ നകുലം വാക്യം അബ്രവീത്
ആരുഹ്യ വൃക്ഷം മാദ്രേയ നിരീക്ഷസ്വ ദിശോ ദശ
6 പാനീയം അന്തികേ പശ്യ വൃക്ഷാൻ വാപ്യ് ഉദകാശ്രയാൻ
ഇമേ ഹി ഭ്രാതരഃ ശ്രാന്താസ് തവ താത പിപാസിതാഃ
7 നകുലസ് തു തഥേത്യ് ഉക്ത്വാ ശീഘ്രം ആരുഹ്യ പാദമം
അബ്രവീദ് ഭ്രാതരം ജ്യേഷ്ഠം അഭിവീക്ഷ്യ സമന്തതഃ
8 പശ്യാമി ബഹുലാൻ രാജൻ വൃക്ഷാൻ ഉദകസംശ്രയാൻ
സാരസാനാം ച നിർഹ്രാദം അത്രോദകം അസംശയം
9 തതോ ഽബ്രവീത് സത്യധൃതിഃ കുന്തീപുത്രോ യുധിഷ്ഠിരഃ
ഗച്ഛ സൗമ്യ തതഃ ശീഘ്രം തൂർണം പാനീയം ആനയ
10 നകുലസ് തു തഥേത്യ് ഉക്ത്വാ ഭ്രാതുർ ജ്യേഷ്ഠസ്യ ശാസനാത്
പ്രാദ്രവദ് യത്ര പാനീയം ശീഘ്രം ചൈവാന്വപദ്യത
11 സ ദൃഷ്ട്വാ വിമലം തോയം സാരസൈഃ പരിവാരിതം
പാതു കാകസ് തതോ വാചം അന്തരിക്ഷാത് സ ശുശ്രുവേ
12 മാ താത സാഹസം കാർഷീർ മമ പൂർവപരിഗ്രഹഃ
പ്രശ്നാൻ ഉക്ത്വാ തു മാദ്രേയ തതഃ പിബ ഹരസ്വ ച
13 അനാദൃത്യ തു തദ് വാക്യം നകുലഃ സുപിപാസിതഃ
അപിബച് ഛീതലം തോയം പീത്വാ ച നിപപാത ഹ
14 ചിരായമാണേ നകുലേ കുന്തീപുത്രോ യുധിഷ്ഠിരഃ
അബ്രവീദ് ഭ്രാതരം വീരം സഹദേവം അരിന്ദമം
15 ഭ്രാതാ ചിരായതേ താത സഹദേവ തവാഗ്രജഃ
തം ചൈവാനയ സോദര്യം പാനീയം ച ത്വം ആനയ
16 സഹദേവസ് തഥേത്യ് ഉക്ത്വാ താം ദിശം പ്രത്യപദ്യത
ദദർശ ച ഹതം ഭൂമൗ ഭ്രാതരം നകുലം തദാ
17 ഭ്രാതൃശോകാഭിസന്തപ്തസ് തൃഷയാ ച പ്രപീഡിതഃ
അഭിദുദ്രാവ പാനീയം തതോ വാഗ് അഭ്യഭാഷത
18 മാ താത സാഹസം കാർഷീർ മമ പൂർവപരിഗ്രഹഃ
പ്രശ്നാൻ ഉക്ത്വാ യഥാകാമം തതഃ പിബ ഹരസ്വ ച
19 അനാദൃത്യ തു തദ് വാക്യം സഹദേവഃ പിപാസിതഃ
അപിബച് ഛീതലം തോയം പീത്വാ ച നിപപാത ഹ
20 അഥാബ്രവീത് സ വിജയം കുന്തീപുത്രോ യുധിഷ്ഠിരഃ
ഭ്രാതരൗ തേ ചിരഗതൗ ബീഭത്സോ ശത്രുകർശന
തൗ ചൈവാനയ ഭദ്രം തേ പാനീയം ച ത്വം ആനയ
21 ഏവം ഉക്തോ ഗുഡാകേശഃ പ്രഗൃഹ്യ സശരം ധനുഃ
ആമുക്തഖഡ്ഗോ മേധാവീ തത് സരോ പ്രത്യപദ്യത
22 യതഃ പുരുഷശാർദൂലൗ പാനീയ ഹരണേ ഗതു
തൗ ദദർശ ഹതൗ തത്ര ഭ്രാതരൗ ശ്വേതവാഹനഃ
23 പ്രസുപ്താവ് ഇവ തൗ ദൃഷ്ട്വാ നരസിംഹഃ സുദുഃഖിതഃ
ധനുർ ഉദ്യമ്യ കൗന്തേയോ വ്യലോകയത തദ് വനം
24 നാപശ്യത് തത്ര കിം ചിത് സ ഭൂതം തസ്മിൻ മഹാവനേ
സവ്യസാചീ തതഃ ശ്രാന്തഃ പാനീയം സോ ഽഭ്യധാവത
25 അഭിധാവംസ് തതോ വാചം അന്തരിക്ഷാത് സ ശുശ്രുവേ
കിം ആസീദ് അസി പാനീയം നൈതച് ഛക്യം ബലാത് ത്വയാ
26 കൗന്തേയ യദി വൈ പ്രശ്നാൻ മയോക്താൻ പ്രതിപത്സ്യസേ
തതഃ പാസ്യസി പാനീയം ഹരിഷ്യസി ച ഭാരത
27 വാരിതസ് ത്വ് അബ്രവീത് പാർഥോ ദൃശ്യമാനോ നിവാരയ
യാവദ് ബാണൈർ വിനിർഭിന്നഃ പുനർ നൈവം വദിഷ്യസി
28 ഏവം ഉക്ത്വാ തതഃ പാർഥഃ ശരൈർ അസ്ത്രാനുമന്ത്രിതൈഃ
വവർഷ താം ദിശം കൃത്സ്നാം ശബ്ദവേധം ച ദർശയൻ
29 കർണിനാലീകനാരാചാൻ ഉത്സൃജൻ ഭരതർഷഭ
അനേകൈർ ഇഷുസംഘാതൈർ അന്തരിക്ഷം വവർഷ ഹ
30 [യക്സ]
കിം വിഘാതേന തേ പാർഥ പ്രശ്നാൻ ഉക്ത്വാ തതഃ പിബ
അനുക്ത്വാ തു തതഃ പ്രശ്നാൻ പീത്വൈവ ന ഭവിഷ്യസി
31 [വൈ]
സ ത്വ് അമോഘാൻ ഇഷൂൻ മുക്ത്വാ തൃഷ്ണയാഭിപ്രപീഡിതഃ
അവിജ്ഞായൈവ താൻ പ്രശ്നാൻ പീത്വൈവ നിപപാത ഹ
32 അഥാബ്രവീദ് ഭീമസേനം കുന്തീപുത്രോ യുധിഷ്ഠിരഃ
നകുലഃ സഹദേവശ് ച ബീഭത്സുശ് ചാപരാജിതഃ
33 ചിരം ഗതാസ് തോയഹേതോർ ന ചാഗച്ഛന്തി ഭാരത
താംശ് ചൈവാനയ ഭദ്രം തേ പാനീയം ച ത്വം ആനയ
34 ഭീമസേനസ് തഥേത്യ് ഉക്ത്വാ താം ദിശം പത്യപദ്യത
യത്ര തേ പുരുഷവ്യാഘ്രാ ഭ്രാതരോ ഽസ്യ നിപാതിതാഃ
35 താൻ ദൃഷ്ട്വാ ദുഃഖിതോ ഭീമസ് തൃഷയാ ച പ്രപീഡിതഃ
അമന്യത മഹാബാഹുഃ കർമ തദ് യക്ഷരക്ഷസാം
സ ചിന്തയാം ആസ തദാ യോദ്ധവ്യം ധ്രുവം അദ്യ മേ
36 പാസ്യാമി താവത് പാനീയം ഇതി പാർഥോ വൃകോദരഃ
തതോ ഽഭ്യധാവത് പാനീയം പിപാസുഃ പുരുഷർഷഭഃ
37 [യക്സ]
മാ താത സാഹസം കാർഷീർ മമ പൂർവപരിഗ്രഹഃ
പ്രശ്നാൻ ഉക്ത്വാ തു കൗന്തേയ തതഃ പിബ ഹരസ്വ ച
38 [വൈ]
ഏവം ഉക്തസ് തതോ ഭീമോ യക്ഷേണാമിത തേജസാ
അവിജ്ഞായൈവ താൻ പ്രശ്നാൻ പീത്വൈവ നിപപാത ഹ
39 തതഃ കുന്തീസുതോ രാജാ വിചിന്ത്യ പുരുഷർഷഭഃ
സമുത്ഥായ മഹാബാഹുർ ദഹ്യമാനേന ചേതസാ
40 അപേതജനനിർഘോഷം പ്രവിവേശ മഹാവനം
രുരുഭിശ് ച വരാഹൈശ് ച പക്ഷിഭിശ് ച നിഷേവിതം
41 നീലഭാസ്വരവർണൈശ് ച പാദപൈർ ഉപശോഭിതം
ഭ്രമരൈർ ഉപഗീതം ച പക്ഷിഭിശ് ച മഹായശഃ
42 സ ഗച്ഛൻ കാനനേ തസ്മിൻ ഹേമജാലപരിഷ്കൃതം
ദദർശ തത് സരോ ശ്രീമാൻ വിശ്വകർമ കൃതം യഥാ
43 ഉപേതം നലിനീ ജാലൈഃ സിന്ധുവാരൈശ് ച വേതസൈഃ
കേതകൈഃ കരവീരൈശ് ച പിപ്പലൈശ് ചൈവ സംവൃതം
ശ്രമാർതസ് തദ് ഉപാഗമ്യ സരോ ദൃഷ്ട്വാഥ വിസ്മിതഃ