മഹാഭാരതം മൂലം/വനപർവം/അധ്യായം244
| ←അധ്യായം243 | മഹാഭാരതം മൂലം/വനപർവം രചന: അധ്യായം244 |
അധ്യായം245→ |
1 [ജനം]
ദുര്യോധനം മോചയിത്വാ പാണ്ഡുപുത്രാ മഹാബലാഃ
കിം അകാർഷുർ വനേ തസ്മിംസ് തൻ മമാഖ്യാതും അർഹസി
2 [വൈ]
തതഃ ശയാനം കൗന്തേയം രാത്രൗ ദ്വൈതവനേ മൃഗാഃ
സ്വപ്നാന്തേ ദർശയാം ആസുർ ബാഷ്പകണ്ഠാ യുധിഷ്ഠിരം
3 താൻ അബ്രവീത് സ രാജേന്ദ്രോ വേപമാനാൻ കൃതാഞ്ജലീൻ
ബ്രൂത യദ് വക്തുകാമാഃ സ്ഥ കേ ഭവന്തഃ കിം ഇഷ്യതേ
4 ഏവം ഉക്താഃ പാണ്ഡവേന കൗന്തേയേന യശസ്വിനാ
പ്രത്യബ്രുവൻ മൃഗാസ് തത്ര ഹതശേഷാ യുധിഷ്ഠിരം
5 വയം മൃഗാ ദ്വൈതവനേ ഹതശിഷ്ടാഃ സ്മ ഭാരത
നോത്സീദേമ മഹാരാജ ക്രിയതാം വാസപര്യയഃ
6 ഭവന്തോ ഭ്രാതരഃ ശൂരാഃ സർവ ഏവാസ്ത്ര കോവിദാഃ
കുലാന്യ് അൽപാവശിഷ്ടാനി കൃതവന്തോ വനൗകസാം
7 ബീജഭൂതാ വയം കേ ചിദ് അവശിഷ്ടാ മഹാമതേ
വിവർധേമഹി രാജേന്ദ്ര പ്രസാദാത് തേ യുധിഷ്ഠിര
8 താൻ വേപമാനാൻ വിത്രസ്താൻ ബീജമാത്രാവശേഷിതാൻ
മൃഗാൻ ദൃഷ്ട്വാ സുദുഃഖാർതോ ധർമരാജോ യുധിഷ്ഠിരഃ
9 താംസ് തഥേത്യ് അബ്രവീദ് രാജാ സർവഭൂതഹിതേ രതഃ
തഥ്യം ഭവന്തോ ബ്രുവതേ കരിഷ്യാമി ച തത് തഥാ
10 ഇത്യ് ഏവം പ്രതിബുദ്ധഃ സ രാത്ര്യന്തേ രാജസത്തമഃ
അബ്രവീത് സഹിതാൻ ഭ്രാതൄൻ ദയാപന്നോ മൃഗാൻ പ്രതി
11 ഉക്തോ രാത്രൗ മൃഗൈർ അസ്മി സ്വപ്നാന്തേ ഹതശേഷിതൈഃ
തനു ഭൂതാഃ സ്മ ഭദ്രം തേ ദയാ നഃ ക്രിയതാം ഇതി
12 തേ സത്യം ആഹുഃ കർതവ്യാ ദയാസ്മാഭിർ വനൗകസാം
സാഷ്ട മാസം ഹി നോ വർഷം യദ് ഏനാൻ ഉപയുഞ്ജ്മഹേ
13 പുനർ ബഹുമൃഗം രമ്യം കാമ്യകം കാനനോത്തമം
മരു ഭൂമേഃ ശിരോ ഖ്യാതം തൃണബിന്ദു സരോ പ്രതി
തത്രേമാ വസതീഃ ശിഷ്ടാ വിഹരന്തോ രമേമഹി
14 തതസ് തേ പാണ്ഡവാഃ ശീഘ്രം പ്രയയുർ ധർമകോവിദാഃ
ബ്രാഹ്മണൈഃ സഹിതാ രാജൻ യേ ച തത്ര സഹോഷിതാഃ
ഇന്ദ്രസേനാദിഭിശ് ചൈവ പ്രേഷ്യൈർ അനുഗതാസ് തദാ
15 തേ യാത്വാനുസൃതൈർ മാർഗൈഃ സ്വന്നൈഃ ശുചി ജലാന്വിതൈഃ
ദദൃശുഃ കാമ്യകം പുണ്യം ആശ്രമം താപസായുതം
16 വിവിശുസ് തേ സ്മ കൗരവ്യാ വൃതാ വിപ്രർഷഭൈർ തദാ
തദ് വനം ഭരതശ്രേഷ്ഠാഃ സ്വർഗം സുകൃതിനോ യഥാ