മഹാഭാരതം മൂലം/വനപർവം/അധ്യായം191

മഹാഭാരതം മൂലം/വനപർവം
രചന:വ്യാസൻ
അധ്യായം191

1 [വൈ]
     മാർകണ്ഡേയം ഋഷയഃ പാണ്ഡവാശ് ച പര്യപൃച്ഛൻ
     അസ്തി കശ് ചിദ് ഭവതശ് ചിരജാതതരേതി
2 സ താൻ ഉവാച
     അസ്തി ഖലു രാജർഷിർ ഇന്ദ്രദ്യുമ്നോ നാമ ക്ഷീണപുണ്യസ് ത്രിദിവാത് പ്രച്യുതഃ
     കീർതിസ് തേ വ്യുച്ഛിന്നേതി
     സ മാം ഉപാതിഷ്ഠത്
     അഥ പ്രത്യഭിജാനാതി മാം ഭവാൻ ഇതി
3 തം അഹം അബ്രുവം
     ന വയം രാസായനികാഃ ശരീരോപതാപേനാത്മനഃ സമാരഭാമഹേ ഽർഥാനാം അനുഷ്ഠാനം
4 അസ്തി ഖലു ഹിമവതി പ്രാകാരകർണോ നാമോലൂകഃ
     സ ഭവന്തം യദി ജാനീയാത്
     പ്രകൃഷ്ടേ ചാധ്വനി ഹിമവാൻ
     തത്രാസൗ പ്രതിവസതീതി
5 സ മാം അശ്വോ ഭൂത്വാ തത്രാവഹദ് യത്ര ബഭൂവോലൂകഃ
6 അഥൈനം സ രാജർഷിഃ പര്യപൃച്ഛത്
     പ്രത്യഭിജാനാതി മാം ഭവാൻ ഇതി
7 സ മുഹൂർതം ധ്യാത്വാബ്രവീദ് ഏനം
     നാഭിജാനേ ഭവന്തം ഇതി
8 സൈവം ഉക്തോ രാജർഷിർ ഇന്ദ്രദ്യുമഃ പുനസ് തം ഉലൂകം അബ്രവീത്
     അസ്തി കശ് ചിദ് ഭവതശ് ചിരജാതതരേതി
9 സൈവം ഉക്തോ ഽബ്രവീദ് ഏനം
     അസ്തി ഖല്വ് ഇന്ദ്രദ്യുമ്നസരോ നാമ
     തസ്മിൻ നാഡീജംഘോ നാമ ബകഃ പ്രതിവസതി
     സോ ഽസ്മത്തശ് ചിരജാതതരഃ
     തം പൃച്ഛേതി
10 തതേന്ദ്രദ്യുമ്നോ മാം ചോലൂകം ചാദായ തത് സരോ ഽഗച്ഛദ് യത്രാസൗ നാഡീജംഘോ നാമ ബകോ ബഭൂവ
11 സോ ഽസ്മാഭിഃ പൃഷ്ടഃ
    ഭവാൻ ഇന്ദ്രദ്യുനം രാജാനം പ്രത്യഭിജാനാതീതി
12 സൈവം ഉക്തോ ഽബ്രവീൻ മുഹൂർതം ധ്യാത്വാ
    നാഭിജാനാമ്യ് അഹം ഇന്ദ്രദ്യുമ്നം രാജാനം ഇതി
13 തതഃ സോ ഽസ്മാഭിഃ പൃഷ്ടഃ
    അസ്തി കശ് ചിദ് അന്യോ ഭവതശ് ചിരജാതതരേതി
14 സ നോ ഽബ്രവീദ് അസ്തി ഖല്വ് ഇഹൈവ സരസ്യ് അകൂപാരോ നാമ കച്ഛപഃ പ്രതിവസതി
    സ മത്തശ് ചിരജാതതരേതി
    സ യദി കഥം ചിദ് അഭിജാനീയാദ് ഇമം രാജാനം തം അകൂപാരം പൃച്ഛാമേതി
15 തതഃ സ ബകസ് തം അകൂപാരം കച്ഛപം വിജ്ഞാപയാം ആസ
    അസ്ത്യ് അസ്മാകം അഭിപ്രേതം ഭവന്തം കം ചിദ് അർഥം അഭിപ്രഷ്ടും
    സാധ്വ് ആഗമ്യതാം താവദ് ഇതി
16 ഏതച് ഛ്രുത്വാ സ കച്ഛപസ് തസ്മാത് സരസോത്ഥായാഭ്യഗച്ഛദ് യത്ര തിഷ്ഠാമോ വയം തസ്യ സരസസ് തീരേ
17 ആഗതം ചൈനം വയം അപൃച്ഛാമ
    ഭവാൻ ഇന്ദ്രദ്യുമ്നം രാജാനം അഭിജാനാതീതി
18 സ മുഹൂർതം ധ്യാത്വാ ബാഷ്പപൂർണനയൻ ഉദ്വിഗ്നഹൃദയോ വേപമാനോ വിസഞ്ജ്ഞകൽപഃ പ്രാഞ്ജലിർ അബ്രവീത്
    കിം അഹം ഏനം ന പ്രത്യഭിജാനാമി
    അഹം ഹ്യ് അനേന സഹസ്രകൃത്വഃ പൂർവം അഗ്നിചിതിഷൂപഹിത പൂർവഃ
    സരശ് ചേദം അസ്യ ദക്ഷിണാദത്താഭിർ ഗോഭിർ അതിക്രമമാണാഭിഃ കൃതം
    അത്ര ചാഹം പ്രതിവസാമീതി
19 അഥൈതത് കച്ഛപേനോദാഹൃതം ശ്രുത്വാ സമനന്തരം ദേവലോകാദ് ദേവ രഥഃ പ്രാദുരാസീത്
20 വാചോ ചാശ്രൂയന്തേന്ദ്രദ്യുമ്നം പ്രതി
    പ്രസ്തുതസ് തേ സ്വർഗഃ
    യഥോചിതം സ്ഥാനം അഭിപദ്യസ്വ
    കീർതിമാൻ അസി
    അവ്യഗ്രോ യാഹീതി
21 ദിവം സ്പൃശതി ഭൂമിം ച ശബ്ദഃ പുണ്യസ്യ കർമണഃ
    യാവത് സ ശബ്ദോ ഭവതി താവത് പുരുഷ ഉച്യതേ
22 അകീർതിഃ കീർത്യതേ യസ്യ ലോകേ ഭൂതസ്യ കസ്യ ചിത്
    പതത്യ് ഏവാധമാംൽ ലോകാൻ യാവച് ഛബ്ദഃ സ കീർത്യതേ
23 തസ്മാത് കല്യാണ വൃത്തഃ സ്യാദ് അത്യന്തായ നരോ ഭുവി
    വിഹായ വൃത്തം പാപിഷ്ഠം ധർമം ഏവാഭിസംശ്രയേത്
24 ഇത്യ് ഏതച് ഛ്രുത്വാ സ രാജാബ്രവീത്
    തിഷ്ഠ താവദ് യാവദ് ഇദാനീം ഇമൗ വൃദ്ധൗ യഥാസ്ഥാനം പ്രതിപാദയാമീതി
25 സ മാം പ്രാകാരകർണം ചോലൂകം യഥോചിതേ സ്ഥാനേ പ്രതിപാദ്യ തേനൈവ യാനേന സംസിദ്ധോ യഥോചിതം സ്ഥാനം പ്രതിപന്നഃ
26 ഏതൻ മയാനുഭൂതം ചിരജീവിനാ ദൃഷ്ടം ഇതി പാണ്ഡവാൻ ഉവാച മാർകണ്ഡേയഃ
27 പാണ്ഡവാശ് ചോചുഃ പ്രീതാഃ
    സാധു
    ശോഭനം കൃതം ഭവതാ രാജാനം ഇന്ദ്രദ്യുമ്നം സ്വർഗലോകാച് ച്യുതം സ്വേ സ്ഥാനേ സ്വർഗേ പുനഃ പ്രതിപാദയതേതി
28 അഥൈനാം അബ്രവീദ് അസൗ
    നനു ദേവകീപുത്രേണാപി കൃഷ്ണേന നരകേ മജ്ജമാനോ രാജർഷിർ നൃഗസ് തസ്മാത് കൃച്ഛ്രാത് സമുദ്ധൃത്യ പുനഃ സ്വർഗം പ്രതിപാദിതേതി