മഹാഭാരതം മൂലം/ഭീഷ്മപർവം/അധ്യായം98

മഹാഭാരതം മൂലം/ഭീഷ്മപർവം
രചന:വ്യാസൻ
അധ്യായം98

1 [ധൃ]
     കഥം ദ്രോണോ മഹേഷ്വാസഃ പാണ്ഡവശ് ച ധനഞ്ജയഃ
     സമീയതൂ രണേ ശൂരൗ തൻ മമാചക്ഷ്വ സഞ്ജയ
2 പ്രിയോ ഹി പാണ്ഡവോ നിത്യം ഭാരദ്വാജസ്യ ധീമതഃ
     ആചാര്യഃശ് ച രണേ നിത്യം പ്രിയഃ പാർഥസ്യ സഞ്ജയ
3 താവ് ഉഭൗ രഥിനൗ സംഖ്യേ ദൃപ്തൗ സിംഹാവ് ഇവോത്കടൗ
     കഥം സമീയതുർ യുദ്ധേ ഭാരദ്വാജ ധനഞ്ജയൗ
4 [സ്]
     ന ദ്രോണഃ സമരേ പാർഥം ജാനീതേ പ്രിയം ആത്മനഃ
     ക്ഷത്രധർമം പുരസ്കൃത്യ പാർഥോ വാ ഗുരും ആഹവേ
5 ന ക്ഷത്രിയാ രണേ രാജൻ വർജയന്തി പരസ്പരം
     നിർമര്യാദം ഹി യുധ്യന്തേ പിതൃഭിർ ഭ്രാതൃഭിഃ സഹ
6 രണേ ഭാരത പാർഥേന ദ്രോണോ വിദ്ധസ് ത്രിഭിഃ ശരൈഃ
     നാചിന്തയത താൻ ബാണാൻ പാർഥ ചാപച്യുതാൻ യുധി
7 ശരവൃഷ്ട്യ പുനഃ പാർഥശ് ഛാദയാം ആസ തം രണേ
     പ്രജജ്വാല ച രോഷേണ ഗഹനേ ഽഗ്നിർ ഇവോത്ഥിതഃ
8 തതോ ഽർജുനം രണേ ദ്രോണഃ ശരൈഃ സംനതപർവഭിഃ
     വാരയാം ആസ രാജേന്ദ്ര നചിരാദ് ഇവ ഭാരത
9 തതോ ദുര്യോധനോ രാജാ സുശർമാണം അചോദയത്
     ദ്രോണസ്യ സമരേ രാജൻ പാർഷ്ണിഗ്രഹണ കാരണാത്
10 ത്രിഗർതരാഡ് അപി ക്രുദ്ധോ ഭൃശം ആയമ്യ കാർമുകം
    ഛാദയാം ആസ സമരേ പാർഥം ബാണൈർ അയോമുഖൈഃ
11 താഭ്യാം മുക്താഃ ശരാ രാജന്ന് അന്തരിക്ഷേ വിരേജിരേ
    ഹംസാ ഇവ മഹാരാജ ശരത്കാലേ നഭസ്തലേ
12 തേ ശരാഃ പ്രാപ്യ കൗന്തേയം സമസ്താ വിവിശുഃ പ്രഭോ
    ഫലഭാര നതം യദ്വത് സ്വാദു വൃക്ഷം വിഹംഗമാഃ
13 അർജുനസ് തു രണേ നാദം വിനദ്യ രഥിനാം വരഃ
    ത്രിഗർതരാജം സമരേ സപുത്രം വിവ്യധേ ശരൈഃ
14 തേ വധ്യമാനാഃ പാർഥേന കാലേനേവ യുഗക്ഷയേ
    പാർഥം ഏവാഭ്യവർതന്ത മരണേ കൃതനിശ്ചയാഃ
    മുമുചുഃ ശരവൃഷ്ടിം ച പാണ്ഡവസ്യ രഥം പ്രതി
15 ശരവൃഷ്ടിം തതസ് താം തു ശരവർഷേണ പാണ്ഡവഃ
    പ്രതിജഗ്രാഹ രാജേന്ദ്ര തോയവൃഷ്ടിം ഇവാചലഃ
16 തത്രാദ്ഭുതം അപശ്യാമ ബീഭത്സോർ ഹസ്തലാഘവം
    വിമുക്താം ബഹുഭിഃ ശൂരൈഃ ശസ്ത്രവൃഷ്ടിം ദുരാസദം
17 യദ് ഏകോ വാരയാം ആസ മാരുതോ ഽഭ്രഗണാൻ ഇവ
    കർമണാ തേന പാർഥസ്യ തുതുഷുർ ദേവദാനവാഃ
18 അഥ ക്രുദ്ധോ രണേ പാർഥസ് ത്രിഗർതാൻ പ്രതി ഭാരത
    മുമോചാസ്ത്രം മഹാരാജ വായവ്യം പൃതനാ മുഖേ
19 പ്രാദുരാസീത് തതോ വായുഃ ക്ഷോഭയാണോ നഭസ്തലം
    പാതയൻ വൈ തരുഗണാൻ വിനിഘ്നംശ് ചൈവ സൈനികാൻ
20 തതോ ദ്രോണോ ഽഭിവീക്ഷ്യൈവ വായവ്യാസ്ത്രം സുദാരുണം
    ശൈലം അന്യൻ മഹാരാജ ഘോരം അസ്ത്രം മുമോച ഹ
21 ദ്രോണേന യുധി നിർമുക്തേ തസ്മിന്ന് അസ്ത്രേ മഹാമൃധേ
    പ്രശശാമ തതോ വായുഃ പ്രസന്നാശ് ചാഭവൻ ദിശഃ
22 തതഃ പാണ്ഡുസുതോ വീരസ് ത്രിഗർതസ്യ രഥവ്രജാൻ
    നിരുത്സാഹാൻ രണേ ചക്രേ വിമുഖാൻ വിപരാക്രമാൻ
23 തതോ ദുര്യോധനോ രാജാ കൃപശ് ച രഥിനാം വരഃ
    അശ്വത്ഥാമാ തതഃ ശല്യഃ കാംബോജശ് ച സുദക്ഷിണഃ
24 വിന്ദാനുവിന്ദാവ് ആവന്ത്യൗ ബാഹ്ലികശ് ച സ ബാഹ്ലികഃ
    മഹതാ രഥവംശേന പാർഥസ്യാവാരയൻ ദിശഃ
25 തഥൈവ ഭഗദത്തശ് ച ശ്രുതായുശ് ച മഹാബലഃ
    ഗജാനീകേന ഭീമസ്യ താവ് അവാരയതാം ദിശഃ
26 ഭൂരിശ്രവാഃ ശലശ് ചൈവ സൗബലശ് ച വിശാം പതേ
    ശരൗഘൈർ വിവിധൈസ് തൂർണം മാദ്രീപുത്രാവ് അവാരയൻ
27 ഭീഷ്മസ് തു സഹിതഃ സർവൈർ ധാർതരാഷ്ട്രസ്യ സൈനികൈഃ
    യുധിഷ്ഠിരം സമാസാദ്യ സർവതഃ പര്യവാരയത്
28 ആപതന്തം ഗജാനീകം ദൃഷ്ട്വാ പാർഥോ വൃകോദരഃ
    ലേലിഹൻ സൃക്കിണീ വീരോ മൃഗരാഡ് ഇവ കാനനേ
29 തതസ് തു രഥിനാം ശ്രേഷ്ഠോ ഗദാം ഗൃഹ്യ മഹാഹവേ
    അവപ്ലുത്യ രഥാത് തൂർണം തവ സൈന്യം അഭീഷയത്
30 തം ഉദീക്ഷ്യ ഗദാഹസ്തം തതസ് തേ ഗജസാദിനഃ
    പരിവവ്രൂ രണേ യത്താ ഭീമസേനം സമന്തതഃ
31 ഗമമധ്യം അനുപ്രാപ്തഃ പാണ്ഡവശ് ച വ്യരാജത
    മേഘജാലസ്യ മഹതോ യഥാ മധ്യഗതോ രവിഃ
32 വ്യധമത് സ ഗജാനീകം ഗദയാ പാണ്ഡവർഷഭഃ
    മഹാഭ്രജാലം അതുലം മാതരിശ്വേവ സന്തതം
33 തേ വധ്യമാനാ ബലിനാ ഭീമസേനേന ദന്തിനഃ
    ആർതനാദം രണേ ചക്രുർ ഗർജന്തോ ജലദാ ഇവ
34 ബഹുധാ ദാരിതശ് ചൈവ വിഷാണൈസ് തത്ര ദന്തിഭിഃ
    ഫുല്ലാശോക നിഭഃ പാർഥഃ ശുശുഭേ രണമൂർധനി
35 വിഷാണേ ദന്തിനം ഗൃഹ്യ നിർവിഷാണം അഥാകരോത്
    വിഷാണേന ച തേനൈവ കുംഭേ ഽഭ്യാഹത്യ ദന്തിനം
    പാതയാം ആസ സമരേ ദണ്ഡഹസ്ത ഇവാന്തകഃ
36 ശോണിതാക്താം ഗദാം ബിഭ്രൻ മേദോ മജ്ജാ കൃതച്ഛവിഃ
    കൃതാംഗദഃ ശോണിതേന രുദ്രവത് പ്രത്യദൃശ്യത
37 ഏവം തേ വധ്യമാനാസ് തു ഹതശേഷാ മഹാഗജാഃ
    പ്രാദ്രവന്ത ദിശോ രാജൻ വിമൃദ്നന്തഃ സ്വകം ബലം
38 ദ്രവദ്ഭിസ് തൈർ മഹാനാഗൈഃ സമന്താദ് ഭരതർഷഭ
    ദുര്യോധന ബലം സർവം പുനർ ആസീത് പരാൻ ഉഖം