മഹാഭാരതം മൂലം/ഭീഷ്മപർവം/അധ്യായം9
| ←അധ്യായം8 | മഹാഭാരതം മൂലം/ഭീഷ്മപർവം രചന: അധ്യായം9 |
അധ്യായം10→ |
1 [ധൃ]
വർണാണാം ചൈവ നാമാനി പർവതാനാം ച സഞ്ജയ
ആചക്ഷ്വ മേ യഥാതത്ത്വം യേ ച പർവതവാസിനഃ
2 [സ്]
ദക്ഷിണേന തു ശ്വേതസ്യ നീലസ്യൈവോത്തരേണ തു
വർഷം രമണകം നാമ ജായന്തേ തത്ര മാനവാഃ
3 ശുക്ലാഭിജന സമ്പന്നാഃ സർവേ സുപ്രിയദർശനാഃ
രതിപ്രധാനാശ് ച തഥാ ജായന്തേ തത്ര മാനവാഃ
4 ദശവർഷസഹസ്രാണി ശതാനി ദശ പഞ്ച ച
ജീവന്തി തേ മഹാരാജ നിത്യം മുദിതമാനസാഃ
5 ദക്ഷിണേ ശൃംഗിണശ് ചൈവ ശ്വേതസ്യാഥോത്തരേണ ച
വർഷം ഹൈരണ്വതം നാമ യത്ര ഹൈരണ്വതീ നദീ
6 യക്ഷാനുഗാ മഹാരാജ ധനിനഃ പ്രൈയ ദർശനാഃ
മഹാബലാസ് തത്ര സദാ രാജൻ മുദിതമാനസാഃ
7 ഏകാദശ സഹസ്രാണി വർഷാണാം തേ ജനാധിപ
ആയുഷ് പ്രമാണം ജീവന്തി ശതാനി ദശ പഞ്ച ച
8 ശൃംഗാണി വൈ ശൃംഗവതസ് ത്രീണ്യ് ഏവ മനുജാധിപ
ഏകം മണിമയം തത്ര തഥൈകം രൗക്മം അദ്ഭുതം
9 സർവരത്നമയം ചൈകം ഭവനൈർ ഉപശോഭിതം
തത്ര സ്വയമ്പ്രഭാ ദേവീ നിത്യം വസതി ശാണ്ഡിലീ
10 ഉത്തരേണ തു ശൃംഗസ്യ സമുദ്രാന്തേ ജനാധിപ
വർഷം ഐരാവതം നാമ തസ്മാച് ഛൃംഗവതഃ പരം
11 ന തത്ര സൂര്യസ് തപതി ന തേ ജീര്യന്തി മാനവാഃ
ചന്ദ്രമാശ് ച സ നക്ഷത്രോ ജ്യോതിർ ഭൂത ഇവാവൃതഃ
12 പദ്മപ്രഭാഃ പദ്മവർണാഃ പദ്മപത്ര നിഭേക്ഷണാഃ
പദ്മപത്ര സുഗന്ധാശ് ച ജായന്തേ തത്ര മാനവാഃ
13 അനിഷ്പന്ദാഃ സുഗന്ധാശ് ച നിരാഹാരാ ജിതേന്ദ്രിയാഃ
ദേവലോകച്യുതാഃ സർവേ തഥാ വിരജസോ നൃപ
14 ത്രയോദശ സഹസ്രാണി വർഷാണാം തേ ജനാധിപ
ആയുഷ് പ്രമാണം ജീവന്തി നരാ ഭരതസത്തമ
15 ക്ഷീരോദസ്യ സമുദ്രസ്യ തഥൈവോത്തരതഃ പ്രഭുഃ
ഹരിർ വസതി വൈകുണ്ഠഃ ശകടേ കനകാത്മകേ
16 അഷ്ടചക്രം ഹി തദ് യാനം ഭൂതയുക്തം മനോജവം
അഗ്നിവർണം മഹാവേഗം ജാംബൂനദപരിഷ്കൃതം
17 സ പ്രഭുഃ സർവഭൂതാനാം വിഭുശ് ച ഭരതർഷഭ
സങ്ക്ഷേപോ വിസ്തരശ് ചൈവ കർതാ കാരയിതാ ച സഃ
18 പൃഥിവ്യ് ആപസ് തഥാകാശം വായുസ് തേജശ് ച പാർഥിവ
സ യജ്ഞഃ സർവഭൂതാനാം ആസ്യം തസ്യ ഹുതാശനഃ
19 [വ്]
ഏവം ഉക്തഃ സഞ്ജയേന ധൃതരാഷ്ട്രോ മഹാമനാഃ
ധ്യാനം അന്വഗമദ് രാജാ പുത്രാൻ പ്രതി ജനാധിപ
20 സ വിചിന്ത്യ മഹാരാജ പുനർ ഏവാബ്രവീദ് വചഃ
അസംശയം സൂതപുത്ര കാലഃ സങ്ക്ഷിപതേ ജഗത്
സൃജതേ ച പുനഃ സർവം ന ഹ വിദ്യതി ശാശ്വതം
21 നരോ നാരായണശ് ചൈവ സർവജ്ഞഃ സർവഭൂതഭൃത്
ദേവാ വൈകുണ്ഠ ഇത്യ് ആഹുർ വേദാ വിഷ്ണുർ ഇതി പ്രഭും