മഹാഭാരതം മൂലം/ഭീഷ്മപർവം/അധ്യായം8
| ←അധ്യായം7 | മഹാഭാരതം മൂലം/ഭീഷ്മപർവം രചന: അധ്യായം8 |
അധ്യായം9→ |
1 [ധൃ]
മേരോർ അഥോത്തരം പാർശ്വം പൂർവം ചാചക്ഷ്വ സഞ്ജയ
നിഖിലേന മഹാബുദ്ധേ മാല്യവന്തം ച പർവതം
2 [സ്]
ദക്ഷിണേന തു നീലസ്യ മേരോഃ പാർശ്വേ തഥോത്തരേ
ഉത്തരാഃ കുരവോ രാജൻ പുണ്യാഃ സിദ്ധനിഷേവിതാഃ
3 തത്ര വൃക്ഷാ മധു ഫലാ നിത്യപുഷ്പഫലോപഗാഃ
പുഷ്പാണി ച സുഗന്ധീനി രസവന്തി ഫലാനി ച
4 സർവകാമഫലാസ് തത്ര കേ ചിദ് വൃക്ഷാ ജനാധിപ
അപരേ ക്ഷീരിണോ നാമ വൃക്ഷാസ് തത്ര നരാധിപ
5 യേ ക്ഷരന്തി സദാ ക്ഷീരം ഷഡ്രസം ഹ്യ് അമൃതോപമം
വസ്ത്രാണി ച പ്രസൂയന്തേ ഫലേഷ്വ് ആഭരണാനി ച
6 സർവാ മണിമയീ ഭൂമിഃ സൂക്ഷ്മകാഞ്ചനവാലുകാ
സർവത്ര സുഖസംസ്പർശാ നിഷ്പങ്കാ ച ജനാധിപ
7 ദേവലോകച്യുതാഃ സർവേ ജായന്തേ തത്ര മാനവാഃ
തുല്യരൂപഗുണോപേതാഃ സമേഷു വിഷമേഷു ച
8 മിഥുനാനി ച ജായന്തേ സ്ത്രിയശ് ചാപ്സരസോപമാഃ
തേഷാം തേ ക്ഷീരിണാം ക്ഷീരം പിബന്ത്യ് അമൃതസംനിഭം
9 മിഥുനം ജായമാനം വൈ സമം തച് ച പ്രവർധതേ
തുല്യരൂപഗുണോപേതം സമവേഷം തഥൈവ ച
ഏകൈകം അനുരക്തം ച ചക്രവാക സമം വിഭോ
10 നിരാമയാ വീതശോകാ നിത്യം മുദിതമാനസാഃ
ദശവർഷസഹസ്രാണി ദശവർഷശതാനി ച
ജീവന്തി തേ മഹാരാജ ന ചാന്യോന്യം ജഹത്യ് ഉത
11 ഭാരുണ്ഡാ നാമ ശകുനാസ് തീക്ഷ്ണതുണ്ഡാ മഹാബലാഃ
തേ നിർഹരന്തി ഹി മൃതാൻ ദരീഷു പ്രക്ഷിപന്തി ച
12 ഉത്തരാഃ കുരവോ രാജൻ വ്യാഖ്യാതാസ് തേ സമാസതഃ
മേരോഃ പാർശ്വം അഹം പൂർവം വക്ഷ്യാമ്യ് അഥ യഥാതഥം
13 തസ്യ പൂർവാഭിഷേകസ് തു ഭദ്രാശ്വസ്യ വിശാം പതേ
ഭദ്ര സാലവനം യത്ര കാലാമ്രശ് ച മഹാദ്രുമഃ
14 കാലാമ്രശ് ച മഹാരാജ നിത്യപുഷ്പഫലഃ ശുഭഃ
ദ്വീപശ് ച യോജനോത്സേധഃ സിദ്ധചാരണസേവിതഃ
15 തത്ര തേ പുരുഷാഃ ശ്വേതാസ് തേജോയുക്താ മഹാബലാഃ
സ്ത്രിയഃ കുമുദവർണാശ് ച സുന്ദര്യഃ പ്രിയദർശനാഃ
16 ചന്ദ്രപ്രഭാശ് ചന്ദ്ര വർണാഃ പൂർണചന്ദ്രനിഭാനനാഃ
ചന്ദ്ര ശീതലഗാത്ര്യശ് ച നൃത്തഗീതവിശാരദാഃ
17 ദശവർഷസഹസ്രാണി തത്രായുർ ഭരതർഷഭ
കാലാമ്ര രസപീതാസ് തേ നിത്യം സംസ്ഥിത യൗവനാഃ
18 ദക്ഷിണേന തു നീലസ്യ നിഷധസ്യോത്തരേണ തു
സുദർശനോ നാമ മഹാഞ് ജാംബൂവൃക്ഷഃ സനാതനഃ
19 സർവകാമഫലഃ പുണ്യഃ സിദ്ധചാരണസേവിതഃ
തസ്യ നാമ്നാ സമാഖ്യാതോ ജംബൂദ്വീപഃ സനാതനഃ
20 യോജനാനാം സഹസ്രം ച ശതം ച ഭരതർഷഭ
ഉത്സേധോ വൃക്ഷരാജസ്യ ദിവസ്പൃൻ മനുജേശ്വര
21 അരത്നീനാം സഹസ്രം ച ശതാനി ദശ പഞ്ച ച
പരിണാഹസ് തു വൃക്ഷസ്യ ഫലാനാം രസഭേദിനാം
22 പതമാനാനി താന്യ് ഉർവ്യാം കുർവന്തി വിപുലം സ്വനം
മുഞ്ചന്തി ച രസം രാജംസ് തസ്മിൻ രജതസംനിഭം
23 തസ്യാ ജംബ്വാഃ ഫലരസോ നദീ ഭൂത്വാ ജനാധിപ
മേരും പ്രദക്ഷിണം കൃത്വാ സമ്പ്രയാത്യ് ഉത്തരാൻ കുരൂൻ
24 പിബന്തി തദ് രസം ഹൃഷ്ടാ ജനാ നിത്യം ജനാധിപ
തസ്മിൻ ഫലരസേ പീതേ ന ജരാ ബാധതേ ച താൻ
25 തത്ര ജാംബൂനദം നാമ കനകം ദേവ ഭൂഷണം
തരുണാദിത്യവർണാശ് ച ജായന്തേ തത്ര മാനവാഃ
26 തഥാ മാല്യവതഃ ശൃംഗേ ദീപ്യതേ തത്ര ഹവ്യവാട്
നാമ്നാ സംവർതകോ നാമ കാലാഗ്നിർ ഭരതർഷഭ
27 തഥാ മാല്യവതഃ ശൃംഗേ പൂർവേ പൂർവാന്ത ഗണ്ഡികാ
യോജനാനാം സഹസ്രാണി പഞ്ചാശൻ മാല്യവാൻ സ്ഥിതഃ
28 മഹാരജത സങ്കാശാ ജായന്തേ തത്ര മാനവാഃ
ബ്രഹ്മലോകാച് ച്യുതാഃ സർവേ സർവേ ച ബ്രഹ്മവാദിനഃ
29 തപസ് തു തപ്യമാനാസ് തേ ഭവന്തി ഹ്യ് ഊർധ്വരേതസഃ
രക്ഷണാർഥം തു ഭൂതാനാം പ്രവിശന്തി ദിവാകരം
30 ഷഷ്ടിസ് താനി സഹസ്രാണി ഷഷ്ടിർ ഏവ ശതാനി ച
അരുണസ്യാഗ്രതോ യാന്തി പരിവാര്യ ദിവാകരം
31 ഷഷ്ടിം വർഷസഹസ്രാണി ഷഷ്ടിം ഏവ ശതാനി ച
ആദിത്യതാപ തപ്താസ് തേ വിശന്തി ശശിമണ്ഡലം