മഹാഭാരതം മൂലം/ഭീഷ്മപർവം/അധ്യായം76

മഹാഭാരതം മൂലം/ഭീഷ്മപർവം
രചന:വ്യാസൻ
അധ്യായം76

1 [സ്]
     അഥ ശൂരാ മഹാരാജ പരസ്പരകൃതാഗസഃ
     ജഗ്മുഃ സ്വശിബിരാണ്യ് ഏവ രുധിരേണ സമുക്ഷിതാഃ
2 വിശ്രമ്യ ച യഥാന്യായം പൂജയിത്വാ പരസ്പരം
     സംനധാഃ സമദൃശ്യന്ത ഭൂയോ യുദ്ധചികീർഷയാ
3 തതസ് തവ സുതോ രാജംശ് ചിന്തയാഭിപരിപ്ലുതഃ
     വിസ്രവച് ഛോണിതാക്താംഗഃ പപ്രച്ഛേദം പിതാമഹം
4 സൈന്യാനി രൗദ്രാണി ഭയാനകാനി; വ്യൂഢാനി സമ്യഗ് ബഹുല ധ്വജാനി
     വിദാര്യ ഹത്വാ ച നിപീഡ്യ ശൂരാസ്; തേ പാണ്ഡവാനാം ത്വരിതാ രഥൗഘാഃ
5 സംമോഹ്യ സർവാൻ യുധി കീർതിമന്തോ; വ്യൂഹം ച തം മകരം വജ്രകൽപം
     പ്രവിശ്യ ഭീമേന നിബർഹിതോ ഽസ്മി; ഘോരൈഃ ശരൈർ മൃത്യുദണ്ഡപ്രകാശൈഃ
6 ക്രുദ്ധം തം ഉദ്വീക്ഷ്യ ഭയേന രാജൻ; സംമൂർഛിതോ നാലഭം ശാന്തിം അദ്യ
     ഇച്ഛേ പ്രസാദാത് തവ സത്യസംഘ; പ്രാപ്തും ജയം പാണ്ഡവേയാംശ് ച ഹന്തും
7 തേനൈവം ഉക്തഃ പ്രഹസൻ മഹാത്മാ; ദുര്യോധനം ജാതമന്യും വിദിത്വാ
     തം പ്രത്യുവാചാവിമനാ മനസ്വീ; ഗംഗാസുതഃ ശസ്ത്രഭൃതാം വരിഷ്ഠഃ
8 പരേണ യത്നേന വിഗാഹ്യ സേനാം; സർവാത്മനാഹം തവ രാജപുത്ര
     ഇച്ഛാമി ദാതും വിജയം സുഖം ച; ന ചാത്മാനം ഛാദയേ ഽഹം ത്വദർഥേ
9 ഏതേ തു രൗദ്രാ ബഹവോ മഹാരഥാ; യശസ്വിനഃ ശൂരതമാഃ കൃതാസ്ത്രാഃ
     യേ പാണ്ഡവാനാം സമരേ സഹായാ; ജിതക്ലമാഃ ക്രോധവിഷം വമന്തി
10 തേ നേഹ ശക്യാഃ സഹസാ വിജേതും; വീര്യോന്നദ്ധാഃ കൃതവൈരാസ് ത്വയാ ച
    അഹം ഹ്യ് ഏതാൻ പ്രതിയോത്സ്യാമി രാജൻ; സർവാത്മനാ ജീവിതം ത്യജ്യ വീര
11 രണേ തവാർഥായ മഹാനുഭാവ; ന ജീവിതം രക്ഷ്യതമം മമാദ്യ
    സർവാംസ് തവാർഥായ സ ദേവ ദൈത്യാംൽ; ലോകാൻ ദഹേയം കിം ഉ ശത്രൂംസ് തവേഹ
12 തത് പാണ്ഡവാൻ യോധയിഷ്യാമി രാജൻ; പ്രിയം ച തേ സർവം അഹം കരിഷ്യേ
    ശ്രുത്വൈവ ചൈതത് പരമപ്രതീതോ; ദുര്യോധനഃ പ്രീതിമനാ ബഭൂവ
13 സർവാണി സൈന്യാനി തതഃ പ്രഹൃഷ്ടോ; നിർഗച്ഛതേത്യ് ആഹ നൃപാംശ് ച സർവാൻ
    തദ് ആജ്ഞയാ താനി വിനിര്യയുർ ദ്രുതം; രഥാശ്വപാദാതഗജായുതാനി
14 പ്രഹർഷയുക്താനി തു താനി രാജൻ; മഹാന്തി നാനാവിധ ശസ്ത്രവന്തി
    സ്ഥിതാനി നാഗാശ്വപദാതിമന്തി; വിരേജുർ ആജൗ തവ രാജൻ ബലാനി
15 വൃന്ദൈഃ സ്ഥിതാശ് ചാപി സുസമ്പ്രയുക്താശ്; ചകാശിരേ ദന്തി ഗണാഃ സമന്താത്
    ശസ്ത്രാസ്ത്രവിദ്ഭിർ നരദേവ യോധൈർ; അധിഷ്ഠിതാഃ സൈന്യഗണാസ് ത്വദീയാഃ
16 രഥൈശ് ച പാദാതഗജാശ്വസംഘൈഃ; പ്രയാദ്ഭിർ ആജൗ വിധിവത് പ്രണുന്നൈഃ
    സമുദ്ധതം വൈ തരുണാർകവർണം; രജോ ബഭൗ ഛാദയത് സൂര്യരശ്മീൻ
17 രേജുഃ പതാകാ രഥദന്ത സംസ്ഥാ; വാതേരിതാ ഭ്രാമ്യമാണാഃ സമന്താത്
    നാനാ രംഗാഃ സമരേ തത്ര രാജൻ; മേഘൈർ യുക്താ വിദ്യുതഃ ഖേ യഥൈവ
18 ധനൂംഷി വിസ്ഫാരയതാം നൃപാണാം; ബഭൂവ ശബ്ദസ് തുമുലോ ഽതിഘോരഃ
    വിമഥ്യതോ ദേവമഹാസുരൗഘൈർ; യഥാർണവസ്യാദി യുഗേ തദാനീം
19 തദ് ഉഗ്രനാദം ബഹുരൂപവർണം; തവാത്മജാനാം സമുദീർണം ഏവ
    ബഭൂവ സൈന്യം രിപുസൈന്യഹന്തൃ; യുഗാന്തമേഘൗഘനിഭം തദാനീം