മഹാഭാരതം മൂലം/ഭീഷ്മപർവം/അധ്യായം63

മഹാഭാരതം മൂലം/ഭീഷ്മപർവം
രചന:വ്യാസൻ
അധ്യായം63

1 [ദുർ]
     വാസുദേവോ മഹദ് ഭൂതം സർവലോകേഷു കഥ്യതേ
     തസ്യാഗമം പ്രതിഷ്ഠാം ച ജ്ഞാതും ഇച്ഛേ പിതാമഹ
2 [ഭ്സ്]
     വാസുദേവോ മഹദ് ഭൂതം സംഭൂതം സഹ ദൈവതൈഃ
     ന പരം പുണ്ഡരീകാക്ഷാദ് ദൃശ്യതേ ഭരതർഷഭ
     മാർകണ്ഡേയശ് ച ഗോവിന്ദം കഥയത്യ് അദ്ഭുതം മഹത്
3 സർവഭൂതാനി ഭൂതാത്മാ മഹാത്മാ പുരുഷോത്തമഃ
     ആപോ വായുശ് ച തേജശ് ച ത്രയം ഏതദ് അകൽപയത്
4 സ സൃഷ്ട്വാ പൃഥിവീം ദേവഃ സർവലോകേശ്വരഃ പ്രഭുഃ
     അപ്സു വൈ ശയനം ചക്രേ മഹാത്മാ പുരുഷോത്തമഃ
     സർവതോയമയോ ദേവോ യോഗാത് സുഷ്വാപ തത്ര ഹ
5 മുഖതഃ സോ ഽഗ്നിം അസൃജത് പ്രാണാദ് വായും അഥാപി ച
     സരസ്വതീം ച വേദാംശ് ച മനസഃ സസൃജേ ഽച്യുതഃ
6 ഏഷ ലോകാൻ സസർജാദൗ ദേവാംശ് ചർഷിഗണൈഃ സഹ
     നിധനം ചൈവ മൃത്യും ച പ്രജാനാം പ്രഭവോ ഽവ്യയഃ
7 ഏഷ ധർമശ് ച ധർമജ്ഞോ വരദഃ സർവകാമദഃ
     ഏഷ കർതാ ച കാര്യം ച പൂർവദേവഃ സ്വയമ്പ്രഭുഃ
8 ഭൂതം ഭവ്യം ഭവിഷ്യച് ച പൂർവം ഏതദ് അകൽപയത്
     ഉഭേ സന്ധ്യേ ദിശഃ ഖം ച നിയമം ച ജനാർദനഃ
9 ഋഷീംശ് ചൈവ ഹി ഗോവിന്ദസ് തപശ് ചൈവാനു കൽപയത്
     സ്രഷ്ടാരം ജഗതശ് ചാപി മഹാത്മാ പ്രഭുർ അവ്യയഃ
10 അഗ്രജം സർവഭൂതാനാം സങ്കർഷണം അകൽപയത്
    ശേഷം ചാകൽപയദ് ദേവം അനന്തം ഇതി യം വിദുഃ
11 യോ ധാരയതി ഭൂതാനി ധരാം ചേമാം സ പർവതാം
    ധ്യാനയോഗേന വിപ്രാശ് ച തം വദന്തി മഹൗജസം
12 കർണ സ്രോത ഉദ്ഭവം ചാപി മധും നാമ മഹാസുരം
    തം ഉഗ്രം ഉഗ്രകർമാണം ഉഗ്രാം ബുദ്ധിം സമാസ്ഥിതം
    ബ്രഹ്മണോ ഽപചിതിം കുർവഞ് ജഘാന പുരുഷോത്തമഃ
13 തസ്യ താത വധാദ് ഏവ ദേവദാനവ മാനവാഃ
    മധുസൂദനം ഇത്യ് ആഹുർ ഋഷയശ് ച ജനാർദനം
    വരാഹശ് ചൈവ സിംഹശ് ച ത്രിവിക്രമ ഗതിഃ പ്രഭുഃ
14 ഏഷ മാതാ പിതാ ചൈവ സർവേഷാം പ്രാണിനാം ഹരിഃ
    പരം ഹി പുണ്ഡരീകാക്ഷാൻ ന ഭൂതം ന ഭവിഷ്യതി
15 മുഖതോ ഽസൃജദ് ബ്രാഹ്മണാൻ ബാഹുഭ്യാം ക്ഷത്രിയാംസ് തഥാ
    വൈശ്യാംശ് ചാപ്യ് ഉരുതോ രാജഞ് ശൂദ്രാൻ പദ്ഭ്യാം തഥൈവ ച
    തപസാ നിയതോ ദേവോ നിധാനം സർവദേഹിനാം
16 ബ്രഹ്മഭൂതം അമാവാസ്യാം പൗർണമാസ്യാം തഥൈവ ച
    യോഗഭൂതം പരിചരൻ കേശവം മഹദ് ആപ്നുയാത്
17 കേശവഃ പരമം തേജഃ സർവലോകപിതാമഹഃ
    ഏവം ആഹുർ ഹൃഷീകേശം മുനയോ വൈ നരാധിപ
18 ഏവം ഏനം വിജാനീഹി ആചാര്യം പിതരം ഗുരും
    കൃഷ്ണോ യസ്യ പ്രസീദേത ലോകാസ് തേനാക്ഷയാ ജിതാഃ
19 യശ് ചൈവൈനം ഭയസ്ഥാനേ കേശവം ശരണം വ്രജേത്
    സദാ നരഃ പഠംശ് ചേദം സ്വസ്തിമാൻ സ സുഖീ ഭവേത്
20 യേ ച കൃഷ്ണം പ്രപദ്യന്തേ തേ ന മുഹ്യന്തി മാനവാഃ
    ഭയേ മഹതി യേ മഗ്നാഃ പാതി നിത്യം ജനാർദനഃ
21 ഏതദ് യുധിഷ്ഠിരോ ജ്ഞാത്വാ യാഥാതഥ്യേന ഭാരത
    സർവാത്മനാ മഹാത്മാനം കേശവം ജഗദ് ഈശ്വരം
    പ്രപന്നഃ ശരണം രാജൻ യോഗാനാം ഈശ്വരം പ്രഭും