മഹാഭാരതം മൂലം/ഭീഷ്മപർവം/അധ്യായം101

മഹാഭാരതം മൂലം/ഭീഷ്മപർവം
രചന:വ്യാസൻ
അധ്യായം101

1 [സ്]
     ദൃഷ്ട്വാ ഭീഷ്മം രണേ ക്രുദ്ധം പാണ്ഡവൈർ അഭിസംവൃതം
     യഥാ മേഘൈർ മഹാരാജ തപാന്തേ ദിവി ഭാസ്കരം
2 ദുര്യോധനോ മഹാരാജ ദുഃശാസനം അഭാഷത
     ഏഷ ശൂരോ മഹേഷ്വാസോ ഭീഷ്മഃ ശത്രുനിഷൂദനഃ
3 ഛാദിതഃ പാണ്ഡവൈഃ ശൂരൈഃ സമന്താദ് ഭരതർഷഭ
     തസ്യ കാര്യം ത്വയാ വീര രക്ഷണം സുമഹാത്മനഃ
4 രക്ഷ്യമാണോ ഹി സമരേ ഭീഷ്മോ ഽസ്മാകം പിതാമഹഃ
     നിഹന്യാത് സമരേ യത്താൻ പാഞ്ചാലാൻ പാണ്ഡവൈഃ സഹ
5 തത്ര കാര്യം അഹം മന്യേ ഭീഷ്മസ്യൈവാഭിരക്ഷണം
     ഗോപ്താ ഹ്യ് ഏഷ മഹേഷ്വാസോ ഭീഷ്മോ ഽസ്മാകം പിതാമഹഃ
6 സ ഭവാൻ സർവസൈന്യേന പരിവാര്യ പിതാമഹം
     സമരേ ദുഷ്കരം കർമ കുർവാണം പരിരക്ഷതു
7 ഏവം ഉക്തസ് തു സമരേ പുത്രോ ദുഃശാസനസ് തവ
     പരിവാര്യ സ്ഥിതോ ഭീഷ്മം സൈന്യേന മഹതാ വൃതഃ
8 തതഃ ശതസഹസ്രേണ ഹയാനാം സുബലാത്മജഃ
     വിമലപ്രാസഹസ്താനാം ഋഷ്ടിതോമരധാരിണാം
9 ദർപിതാനാം സുവേഗാനാം ബലസ്ഥാനാം പതാകിനാം
     ശിക്ഷിതൈർ യുദ്ധകുശലൈർ ഉപേതാനാം നരോത്തമൈഃ
10 നകുലം സഹദേവം ച ധർമരാജം ച പാണ്ഡവം
    ന്യവാരയൻ നരശ്രേഷ്ഠം പരിവാര്യ സമന്തതഃ
11 തതോ ദുര്യോധനോ രാജാ ശൂരാണാം ഹയസാദിനാം
    അയുതം പ്രേഷയാം ആസ പാണ്ഡവാനാം നിവാരണേ
12 തൈഃ പ്രവിഷ്ടൈർ മഹാവേഗൈർ ഗരുത്മദ്ഭിർ ഇവാഹവേ
    ഖുരാഹതാ ധരാ രാജംശ് ചകമ്പേ ച നനാദ ച
13 ഖുരശബ്ദശ് ച സുമഹാൻ വാജിനാം ശുശ്രുവേ തദാ
    മഹാവംശവനസ്യേവ ദഹ്യമാനസ്യ പർവതേ
14 ഉത്പതദ്ഭിശ് ച തൈസ് തത്ര സമുദ്ധൂതം മഹദ് രജഃ
    ദിവാകരപഥം പ്രാപ്യ ഛാദയാം ആസ ഭാസ്കരം
15 വേഗവദ്ഭിർ ഹയൈസ് തൈസ് തു ക്ഷോഭിതം പാണ്ഡവം ബലം
    നിപതദ്ഭിർ മഹാവേഗൈർ ഹംസൈർ ഇവ മഹത് സരഃ
    ഹേഷതാം ചൈവ ശബ്ദേന ന പ്രാജ്ഞായത കിം ചന
16 തതോ യുധിഷ്ഠിരോ രാജാ മാദ്രീപുത്രൗ ച പാണ്ഡവൗ
    പ്രത്യഘ്നംസ് തരസാ വേഗം സമരേ ഹയസാദിനാം
17 ഉദ്വൃത്തസ്യ മഹാരാജ പ്രാവൃട്കാലേന പൂര്യതഃ
    പൗർണമാസ്യാം അംബുവേഗം യഥാ വേലാ മഹോദധേഃ
18 തതസ് തേ രഥിനോ രാജഞ് ശരൈഃ സംനതപർവഭിഃ
    ന്യകൃന്തന്ന് ഉത്തമാംഗാനി കായേഭ്യോ ഹയസാദിനാം
19 തേ നിപേതുർ മഹാരാജ നിഹതാ ദൃഢധന്വിഭിഃ
    നാഗൈർ ഇവ മഹാനാഗാ യഥാ സ്യുർ ഗിരിഗഹ്വരേ
20 തേ ഽപി പ്രാസൈഃ സുനിശിതൈഃ ശരൈഃ സംനതപർവഭിഃ
    ന്യകൃന്തന്ന് ഉത്തമാംഗാനി വിചരന്തോ ദിശോ ദശ
21 അത്യാസന്നാ ഹയാരോഹാ ഋഷ്ടിഭിർ ഭരതർഷഭ
    അച്ഛിനന്ന് ഉത്തമാംഗാനി ഫലാനീവ മഹാദ്രുമാത്
22 സ സാദിനോ ഹയാ രാജംസ് തത്ര തത്ര നിഷൂദിതാഃ
    പതിതാഃ പാത്യമാനാശ് ച ശതശോ ഽഥ സഹസ്രശഃ
23 വധ്യമാനാ ഹയാസ് തേ തു പ്രാദ്രവന്ത ഭയാർദിതാഃ
    യഥാ സിംഹാൻ സമാസാദ്യ മൃഗാഃ പ്രാണപരായണാഃ
24 പാണ്ഡവാസ് തു മഹാരാജ ജിത്വാ ശത്രൂൻ മഹാഹവേ
    ദധ്മുഃ ശംഖാംശ് ച ഭേരീശ് ച താഡയാം ആസുർ ആഹവേ
25 തതോ ദുര്യോധനോ ദൃഷ്ട്വാ ദീനം സൈന്യം അവസ്ഥിതം
    അബ്രവീദ് ഭരതശ്രേഷ്ഠ മദ്രരാജം ഇദം വചഃ
26 ഏഷ പാണ്ഡുസുതോ ജ്യേഷ്ഠോ ജിത്വാ മാതുലമാമകാൻ
    പശ്യതാം നോ മഹാബാഹോ സേനാം ദ്രാവയതേ ബലീ
27 തം വാരയ മഹാബാഹോ വേലേവ മകരാലയം
    ത്വം ഹി സംശ്രൂയസേ ഽത്യർഥം അസഹ്യ ബലവിക്രമഃ
28 പുത്രസ്യ തവ തദ് വാക്യം ശ്രുത്വാ ശല്യഃ പ്രതാപവാൻ
    പ്രയയൗ രഥവംശേന യത്ര രാജാ യുധിഷ്ഠിരഃ
29 തദ് ആപതദ് വൈ സഹസാ ശല്യസ്യ സുമഹദ് ബലം
    മഹൗഘവേഗം സമരേ വാരയാം ആസ പാണ്ഡവഃ
30 മദ്രരാജം ച സമരേ ധർമരാജോ മഹാരഥഃ
    ദശഭിഃ സായകൈസ് തൂർണം ആജഘാന സ്തനാന്തരേ
    നകുലഃ സഹദേവശ് ച ത്രിഭിസ് ത്രിഭിർ അജിഹ്മഗൈഃ
31 മദ്രരാജോ ഽപി താൻ സർവാൻ ആജഘാന ത്രിഭിസ് ത്രിഭിഃ
    യുധിഷ്ഠിരം പുനഃ ഷഷ്ട്യാ വിവ്യാധ നിശിതൈഃ ശരൈഃ
    മാദ്രീപുത്രൗ ച സംരബ്ധൗ ദ്വാഭ്യാം ദ്വാഭ്യാം അതാഡയത്
32 തതോ ഭീമോ മഹാബാഹുർ ദൃഷ്ട്വാ രാജാനം ആഹവേ
    മദ്രരാജവശം പ്രാപ്തം മൃത്യോർ ആസ്യ ഗതം യഥാ
    അഭ്യദ്രവത സംഗ്രാമേ യുധിഷ്ഠിരം അമിത്രജിത്
33 തതോ യുദ്ധം മഹാഘോരം പ്രാവർതത സുദാരുണം
    അപരാം ദിശം ആസ്ഥായ ദ്യോതമാനേ ദിവാകരേ