മഹാഭാരതം മൂലം/കർണപർവം/അധ്യായം43

←അധ്യായം42

മഹാഭാരതം മൂലം/കർണപർവം രചന:വ്യാസൻ അധ്യായം43

അധ്യായം44→

1 [സ്]
     ഏതസ്മിന്ന് അന്തരേ കൃഷ്ണഃ പാർഥം വചനം അബ്രവീത്
     ദർശയന്ന് ഇവ കൗന്തേയം ധർമരാജം യുധിഷ്ഠിരം
 2 ഏഷ പാണ്ഡവ തേ ഭ്രാതാ ധാർതരാഷ്ട്രൈർ മഹാബലൈഃ
     ജിഘാംസുഭിർ മഹേഷ്വാസൈർ ദ്രുതം പാർഥാനുസര്യതേ
 3 തഥാനുയാന്തി സംരബ്ധാഃ പാഞ്ചാലാ യുദ്ധദുർമദാഃ
     യുധിഷ്ഠിരം മഹാത്മാനം പരീപ്സന്തോ മഹാജവാഃ
 4 ഏഷ ദുര്യോധനഃ പാർഥരഥാനീകേന ദംശിതഃ
     രാജാ സർവസ്യ ലോകസ്യ രാജാനം അനുധാവതി
 5 ജിഘാംസുഃ പുരുഷവ്യാഘ്രം ഭ്രാതൃഭിഃ സഹിതോ ബലീ
     ആശീവിഷാ സമസ്പർശൈഃ സർവയുദ്ധവിശാരദൈഃ
 6 ഏതേ ജിഘൃക്ഷവോ യാന്തി ദ്വിപാശ്വരഥപത്തയഃ
     യുധിഷ്ഠിരം ധാർതരാഷ്ട്രാ രത്നോത്തമം ഇവാർഥിനഃ
 7 പശ്യ സാത്വത ഭീമാഭ്യാം നിരുദ്ധാധിഷ്ഠിതഃ പ്രഭുഃ
     ജിഹീർഷവോ ഽമൃതം ദൈത്യാഃ ശക്രാഗ്നിഭ്യാം ഇവാവശാഃ
 8 ഏതേ ബഹുത്വാത് ത്വരിതാഃ പുനർ ഗച്ഛന്തി പാണ്ഡവം
     സമുദ്രം ഇവ വാര്യോഘാഃ പ്രാവൃട്കാലേ മഹാരഥഃ
 9 നദന്തഃ സിംഹനാദാംശ് ച ധമന്തശ് ചാപി വാരിജാൻ
     ബലവന്തോ മഹേഷ്വാസാ വിധുന്വന്തോ ധനൂംഷി ച
 10 മൃത്യോർ മുഖഗതം മന്യേ കുന്തീപുത്രം യുധിഷ്ട്ഷ്ഹിരം
    ഹുതം അഗ്നൗ ച ഭദ്രം തേ ദുര്യോധന വശംഗതം
11 യഥാ യുക്തം അനീകം ഹി ധാർതരാഷ്ട്രസ്യ പാണ്ഡവ
    നാസ്യ ശക്രോ ഽപി മുച്യേത സമ്പ്രാപ്തോ ബാണഗോച്ചരം
12 ദുര്യോധനസ്യ ശൂരസ്യ ദ്രൗണേഃ ശാരദ്വതസ്യ ച
    കർണസ്യ ചേഷു വേഗോ വൈ പർവതാൻ അപി ദാരയേത്
13 ദുര്യോധനസ്യ ശൂരസ്യ ശരൗഘാഞ് ശീഘ്രം അസ്യതഃ
    സങ്ക്രുദ്ധസ്യാന്തകസ്യേവ കോ വേഗം സംസഹേദ് രണേ
14 കർണേന ച കൃതോ രാജാ വിമുഖഃ ശത്രുതാപനഃ
    ബലവാംൽ ലഘു തസ്തശ് ച കൃതീ യുദ്ധവിശാരദഃ
15 രാധേയഃ പാണ്ഡവശ്രേഷ്ഠം ശക്തഃ പീഡയിതും രണേ
    സഹിതോ ധൃതരാഷ്ട്രസ്യ പുത്രൈഃ ശൂരോ മഹാത്മഭിഃ
16 തസ്യൈവം യുധ്യമാനസ്യ സംഗ്രാമേ സംയതാത്മനഃ
    അന്യൈർ അപി ച പാർഥസ്യ ഹൃതം വർമ മഹാരഥൈഃ
17 ഉപവാസകൃശോ രാജാ ഭൃശം ഭരതസത്തമ
    ബ്രാഹ്മേ ബലേ സ്ഥിതോ ഹ്യ് ഏഷ ന ക്ഷത്രേ ഽതിബലേ വിഭോ
18 ന ജീവതി മഹാരാജോ മന്യേ പാർഥ യുധിഷ്ഠിരഃ
    യദ് ഭീമസേനഃ സഹതേ സിംഹനാദം അമർഷണഃ
19 നർദതാം ധാർതരാഷ്ട്രാണാം പുനഃ പുനർ അരിന്ദമ
    ധമതാം ച മഹാശംഖാൻ സംഗ്രാമേ ജിതകർശിനാം
20 യുധിഷ്ഠിരം പാണ്ഡവേയം ഹതേതി ഭരതർഷഭ
    സഞ്ചോദയത്യ് അസൗ കർണോ ധാർതരാഷ്ട്രാൻ മഹാബലാൻ
21 സ്ഥൂണാകർണേന്ദു ജാലേന പാർഥ പാശുപതേന ച
    പ്രച്ഛാദയന്തോ രാജാനം അനുയാന്തി മഹാരഥാഃ
    ആതുരോ മേ മതോ രാജാ സംനിഷേവ്യശ് ച ഭാരത
22 യഥൈനം അനുവർതന്തേ പാഞ്ചാലാഃ സഹ പാണ്ഡവൈഃ
    ത്വരമാണാസ് ത്വരാ കാലേ സർവശസ്ത്രഭൃതാം വരാഃ
    മജ്ജന്തം ഇവ പാതാലേ ബലിനോ ഽപ്യ് ഉജ്ജിഹീർഷവഃ
23 ന കേതുർ ദൃശ്യതേ രാജ്ഞഃ കർണേന നിഹതഃ ശരൈഃ
    പശ്യതോർ യമയോഃ പാർഥ സാത്യകേശ് ച ശിഖണ്ഡിനഃ
24 ധൃഷ്ടദ്യുമ്നസ്യ ഭീമസ്യ ശതാനീകസ്യ വാ വിഭോ
    പാഞ്ചാലാനാം ച സർവേഷാം ചേദീനാം ചൈവ ഭാരത
25 ഏഷ കർണോ രണേ പാർഥ പാണ്ഡവാനാം അനീകിനീം
    ശരൈർ വിധ്വംസയതി വൈ നലിനീം ഇവ കുഞ്ജരഃ
26 ഏതേ ദ്രവന്തി രഥിനസ് ത്വദീയാഃ പാണ്ഡുനന്ദന
    പശ്യ പശ്യ യഥാ പാർഥ ഗച്ഛന്ത്യ് ഏതേ മഹാരഥാഃ
27 ഏതേ ഭാരത മാതംഗാഃ കർണേനാഭിഹതാ രണേ
    ആർതനാദാൻ വികുർവാണാ വിദ്രവന്തി ദിശോ ദശ
28 രഥാനാം ദ്രവതാം വൃന്ദം പശ്യ പാർഥ സമന്തതഃ
    ദ്രാവ്യമാണം രണേ ചൈവ കർണേനാമിത്ര കർശിനാ
29 ഹസ്തികക്ഷ്യാം രണേ പശ്യ ചരന്തീം തത്ര തത്ര ഹ
    രഥസ്ഥം സൂതപുത്രസ്യ കേതും കേതുമതാം വര
30 അസൗ ധാവതി രാധേയോ ഭീമസേനരഥം പ്രതി
    കിരഞ് ശരശതാനീവ വിനിഘ്നംസ് തവ വാഹിനീം
31 ഏതാൻ പശ്യ ച പാഞ്ചാലാൻ ദ്രാവ്യമാണാൻ മഹാത്മനാ
    ശക്രേണേവ യഥാ ദൈത്യാൻ ഹന്യമാനാൻ മഹാഹവേ
32 ഏഷ കർണോ രണേ ജിത്വാ പാഞ്ചാലാൻ പാണ്ഡുസൃഞ്ജയാൻ
    ദിശോ വിപ്രേക്ഷതേ സർവാസ് ത്വദർഥം ഇതി മേ മതിഃ
33 പശ്യ പാർഥധനുഃശ്രേഷ്ഠം വികർഷൻ സാധു ശോഭതേ
    ശത്രൂഞ് ജിത്വാ യഥാ ശക്രോ ദേവസംഘൈഃ സമാവൃതഃ
34 ഏതേ നദന്തി കൗരവ്യാ ദൃഷ്ട്വാ കർണസ്യ വിക്രമം
    ത്രാസയന്തോ രണേ പാർഥാൻ സൃഞ്ജയാംശ് ച സഹസ്രശഃ
35 ഏഷ സർവാത്മനാ പാണ്ഡൂംസ് ത്രാസയിത്വാ മഹാരണേ
    അഭിഭാഷതി രാധേയഃ സർവസൈന്യാനി മാനദ
36 അഭിദ്രവത ഗച്ഛധ്വം ദ്രുതം ദ്രവത കൗരവാഃ
    യഥാ ജീവൻ ന വഃ കശ് ചിൻ മുച്യതേ യുധി സൃഞ്ജയഃ
37 തഥാ കുരുത സംയത്താ വയം യാസ്യാമ പൃഷ്ഠതഃ
    ഏവം ഉക്ത്വാ യയാവ് ഏഷ പൃഷ്ഠതോ വികിരഞ് ശരൈഃ
38 പശ്യ കർണം രണേ പാർഥ ശ്വേതച്ഛവി വിരാജിതം
    ഉദയം പർവതം യദ്വച് ഛോഭയൻ വൈ ദിവാകരഃ
39 പൂർണചന്ദ്ര നികാശേന മൂർധ്നി ഛത്രേണ ഭാരത
    ധ്രിയമാണേന സമരേ തഥാ ശതശലാകിനാ
40 ഏഷ ത്വാം പ്രേക്ഷതേ കർണഃ സകതാക്ഷോ വിശാം പതേ
    ഉത്തമം യത്നം ആസ്ഥായ ധ്രുവാം ഏഷ്യതി സംയുഗേ
41 പശ്യ ഹ്യ് ഏനം മഹാബാഹോ വിധുന്വാനം മഹദ് ധനുഃ
    ശരാംശ് ചാശീവിഷാകാരാൻ വിസൃജന്തം മഹാബലം
42 അസൗ നിവൃത്തോ രാധേയോ ദൃശ്യതേ വാനരധ്വജ
    വധായ ചാത്മനോ ഽഭ്യേതി ദീപസ്യ ശലഭോ യഥാ
43 കർണം ഏകാകിനം ദൃഷ്ട്വാ രഥാനീകേന ഭാരത
    രിരക്ഷിഷുഃ സുസംയത്തോ ധാർതരാഷ്ട്രോ ഽഭിവർതതേ
44 സാർവൈഃ സഹൈഭിർ ദുഷ്ടാത്മാ വധ്യ ഏഷ പ്രയത്നതഃ
    ത്വയാ യശശ് ച രാജ്യം ച സുഖം ചോത്തമം ഇച്ഛതാ
45 ആത്മാനം ച കൃതാത്മാനം സമീക്ഷ്യ ഭരതർഷഭ
    കൃതാഗസം ച രാധേയം ധർമാത്മനി യുധിഷ്ഠിരേ
46 പ്രതിപദ്യസ്വ രാധേയം പ്രാപ്തകാലം അനന്തരം
    ആര്യാം യുദ്ധേ മതിം കൃത്വാ പ്രത്യേഹി രഥയൂഥപം
47 പഞ്ച ഹ്യ് ഏതാനി മിഖ്യാനാം രഥാനാം രഥസത്തമ
    ശതാന്യ് ആയാന്തി വേഗേന ബലിനാം ഭീമ തേജസാം
48 പഞ്ച നാഗസഹസ്രാണി ദ്വിഗുണാ വാജിനസ് തഥാ
    അഭിസംഹത്യ കൗന്തേയ പദാതിപ്രയുതാനി ച
    അന്യോന്യരക്ഷിതം വീര ബലം ത്വാം അഭിവർതതേ
49 സൂതപുത്രേ മഹേഷ്വാസേ ദർശയാത്മാനം ആത്മനാ
    ഉത്തമം യത്നം ആസ്ഥായ പ്രത്യേഹി ഭരതർഷഭ
50 അസൗ കർണഃ സുസംരബ്ധഃ പാഞ്ചാലാൻ അഭിധാവതി
    കേതും അസ്യ ഹി പശ്യാമി ധൃഷ്ടദ്യുമ്ന രഥം പ്രതി
    സമുച്ഛേത്സ്യതി പാഞ്ചാലാൻ ഇതി മന്യേ പരന്തപ
51 ആചക്ഷേ തേ പ്രിയം പാർഥ തദ് ഏവം ഭരതർഷഭ
    രാജാ ജീവതി കൗരവ്യോ ധർമപുത്രോ യുധിഷ്ഠിരഃ
52 അസൗ ഭിമോ മഹാബാഹുഹ്ല് സംനിവൃത്തശ് ചമൂമുഖേ
    വൃതഃ സൃഞ്ജയ സൈന്യേന സാത്യകേന ച ഭാതത
53 വധ്യന്ത ഏതേ സമരേ കൗരവാ നിശിതൈഃ ശരൈഃ
    ഭീമസേനേന കൗന്തേയ പാഞ്ചാലൈശ് ച മഹാത്മഭിഃ
54 സേനാ ഹി ധാർതരാഷ്ട്രസ്യ വിമുഖാ ചാഭവദ് രണാത്
    വിപ്രധാവതി വേഗേന ഭീമസ്യ നിഹതാ ശരൈഃ
55 വിപന്നസസ്യേവ മഹീ രുധിരേണ സമുക്ഷിതാ
    ഭാരതീ ഭരതശ്രേഷ്ഠ സേനാ കൃപണ ദർശനാ
56 നിവൃത്തം പശ്യ കൗന്തേയ ഭീമസേനം യുധാം പതിം
    ആശീവിഷം ഇവ ക്രുദ്ധം തസ്മാദ് ദ്രവതി വാഹിനീ
57 പീതരക്താസിത സിതാസ് താരാ ചന്ദ്രാർക മണ്ഡിതാഃ
    പതാകാവിപ്രകീര്യന്തേ ഛത്രാണ്യ് ഏതാനി ചാർജുന
58 സൗവർണാ രാജതാശ് ചൈവ തൈജസാശ് ച പൃഥഗ്വിധാഃ
    കേതവോ വിനിപാത്യന്തേ ഹസ്ത്യശ്വം വിപ്രകീര്യതേ
59 രഥേഭ്യഃ പ്രപതന്ത്യ് ഏതേ രഥിനോ വിഗതാസവഃ
    നാനാവർണൈർ ഹതാ ബാണൈഃ പാഞ്ചാലൈർ അപലായിഭിഃ
60 നിർമനുഷ്യാൻ ഗജാൻ അശ്വാൻ രഥാംശ് ചൈവ ധനഞ്ജയ
    സമാദ്രവന്തി പാഞ്ചാലാ ധാർതരാഷ്ട്രാംസ് തരസ്വിനഃ
61 മൃദ്നന്തി ച നരവ്യാഘ്രാ ഭീമസേനവ്യപാശ്രയാത്
    ബലം പരേഷാം ദുർധർഷം ത്യക്ത്വാ പ്രാണാൻ അരിന്ദമ
62 ഏതേ നദന്തി പാഞ്ചാലാ ധമന്ത്യ് അപി ച വാരിജാൻ
    അഭിദ്രവന്തി ച രണേ നിഘ്നന്തഃ സായകൈഃ പരാൻ
63 പശ്യ സ്വർഗസ്യ മാഹാത്മ്യം പാഞ്ചാലാ ഹി പരന്തപ
    ധാർതരാഷ്ട്രാൻ വിനിഘ്നന്തി ക്രുദ്ധാഃ സിംഹാ ഇവ ദ്വിപാൻ
64 സർവതശ് ചാഭിപന്നൈഷാ ധാർതരാഷ്ട്രീ മഹാചമൂഃ
    പാഞ്ചാലൈർ മാനസാദ് ഏത്യ ഹംസൈർ ഗംഗേവ വേഗിതൈഃ
65 സുഭൃശം ച പരാക്രാന്താഃ പാഞ്ചാലാനാം നിവാരണേ
    കൃപ കർണാദയോ വീരാ ഋഷഭാണാം ഇവർഷഭാഃ
66 സുനിമഗ്നാംശ് ച ഭീമാസ്ത്രൈർ ധാർതരാഷ്ട്രാൻ മഹാരഥാൻ
    ധൃഷ്ടദ്യുമ്നമുഖാ വീരാ ഘ്നന്തി ശത്രൂൻ സഹസ്രശഃ
    വിഷണ്ണഭൂയിഷ്ഠ രഥാ ധാർതരാഷ്ട്രീ മഹാചമൂഃ
67 പശ്യ ഭീമേന നാരാചൈശ് ഛിന്നാ നാഗാഃപതന്ത്യ് അമീ
    വജ്രിവജ്രാഹതാനീവ ശിഖരാണി മഹീഭൃതാം
68 ഭീമസേനസ്യ നിർവിദ്ധാ ബാണൈഃ സംനതപർവഭിഃ
    സ്വാന്യ് അനീകാനി മൃദ്നന്തോ ദ്രവത്യ് ഏതേ മഹാഗജാഃ
69 നാഭിജാനാസി ഭീമസ്യ സിംഹനാദം ദുരുത്സഹം
    നദതോ ഽർജുന സംഗ്രാമേ വീരസ്യ ജിതകാശിനഃ
70 ഏഷ നൈഷാദിർ അബ്ഭ്യേതി ദ്വിപമുഖ്യേന പാണ്ഡവം
    ജിഘാംസുസ് തോമരൈഃ ക്രുദ്ധോ ദണ്ഡാ പാണിർ ഇവാന്തകഃ
71 സതോമരാവ് അസ്യ ഭുജൗ ഛിന്നൗ ഭീമേന ഗർജതഃ
    തീക്ഷ്ണൈർ അഗ്നിശിഖാ പ്രഖ്യൈർ നാരാചൈർ ദശഭിർ ഹതഃ
72 ഹത്വൈനം പുനർ ആയാതി നാഗാൻ അന്യാൻ പ്രഹാരിണഃ
    പശ്യ നീലാംബുദനിഭാൻ മഹാമാത്രൈർ അധിഷ്ഠിതാൻ
    ശക്തിതോമരസങ്കാശൈർ വിനിഘ്നന്തം വൃകോദരം
73 സപ്ത സപ്ത ച നാഗംസ് താൻ വൈജയന്തീശ് ച സധ്വജാഃ
    നിഹത്യ നിശിതൈർ ബാണൈശ് ഛിന്നാഃ പാർഥാഗ്രജേന തേ
    ദശഭിർ ദശഭിശ് ചൈകോ നാരാചൈർ നിഹതോ ഗജഃ
74 ന ചാസൗ ധാർതരാഷ്ട്രാണാം ശ്രൂയതേ നിനദസ് തഥാ
    പുരന്ദരസമേ ക്രുദ്ധേ നിവൃത്തേ ഭരതർഷഭേ
75 അക്ഷൗഹിണ്യസ് തഥാ തിസ്രോ ധാർതരാഷ്ട്രസ്യ സംഹതാഃ
    ക്രുദ്ധേന നരസിംഹേന ഭീമസേനേന വാരിതാഃ
76 [സ്]
    ഭീമസേനേന തത് കർമകൃതം ദൃഷ്ട്വാ സുദുഷ്കരം
    അർജുനോ വ്യധമച് ഛിഷ്ടാൻ അഹിതാൻ നിശിതൈഃ ശരൈഃ
77 തേ വധ്യമാനാഃ സമരേ സംശപ്തക ഗണാഃ പ്രഭോ
    ശക്രസ്യാതിഥിതാം ഗത്വാ വിശോകാ ഹ്യ് അഭവൻ മുദാ
78 പാർഥശ് ച പുരുഷവ്യാഘ്രഃ ശരൈഃ സംനതപർവഭിഃ
    ജഘാന ധാർതരാഷ്ട്രസ്യ ചതുർവിധ ബലാം ചമൂം