മഹാഭാരതം മൂലം/ഉദ്യോഗപർവം/അധ്യായം75

മഹാഭാരതം മൂലം/ഉദ്യോഗപർവം
രചന:വ്യാസൻ
അധ്യായം75

1 [ഭഗവാൻ]
     ഭാവം ജിജ്ഞാസമാനോ ഽഹം പ്രണയാദ് ഇദം അബ്രുവം
     ന ചാക്ഷേപാൻ ന പാണ്ഡിത്യാൻ ന ക്രോധാൻ ന വിവക്ഷയാ
2 വേദാഹം തവ മാഹാത്മ്യം ഉത തേ വേദ യദ് ബലം
     ഉത തേ വേദ കർമാണി ന ത്വാം പരിഭവാമ്യ് അഹം
3 യഥാ ചാത്മനി കല്യാണം സംഭാവയസി പാണ്ഡവ
     സഹസ്രഗുണം അപ്യ് ഏതത് ത്വയി സംഭാവയാമ്യ് അഹം
4 യാദൃശേ ച കുലേ ജന്മ സർവരാജാഭിപൂജിതേ
     ബന്ധുഭിശ് ച സുഹൃദ്ഭിശ് ച ഭീമ ത്വം അസി താദൃശഃ
5 ജിജ്ഞാസന്തോ ഹി ധർമസ്യ സന്ദിഗ്ധസ്യ വൃകോദര
     പര്യായം ന വ്യവസ്യന്തി ദൈവമാനുഷയോർ ജനാഃ
6 സ ഏവ ഹേതുർ ഭൂത്വാ ഹി പുരുഷസ്യാർതസിദ്ധിഷു
     വിനാശേ ഽപി സ ഏവാസ്യ സന്ദിഗ്ധം കർമ പൗരുഷം
7 അന്യഥാ പരിദൃഷ്ടാനി കവിഭിർ ദോഷദർശിഭിഃ
     അന്യഥാ പരിവർതന്തേ വേഗാ ഇവ നഭസ്വതഃ
8 സുമന്ത്രിതം സുനീതം ച ന്യായതശ് ചോപപാദിതം
     കൃതം മാനുഷ്യകം കർമ ദൈവേനാപി വിരുധ്യതേ
9 ദൈവം അപ്യ് അകൃതം കർമ പൗരുഷേണ വിഹന്യതേ
     ശീതം ഉഷ്ണം തഥാ വർഷം ക്ഷുത്പിപാസേ ച ഭാരത
10 യദ് അന്യദ് ദിഷ്ട ഭാവസ്യ പുരുഷസ്യ സ്വയം കൃതം
    തസ്മാദ് അനവരോധശ് ച വിദ്യതേ തത്ര ലക്ഷണം
11 ലോകസ്യ നാന്യതോ വൃത്തിഃ പാണ്ഡവാന്യത്ര കർമണഃ
    ഏവം ബുദ്ധിഃ പ്രവർതേത ഫലം സ്യാദ് ഉഭയാന്വയാത്
12 യ ഏവം കൃതബുദ്ധിഃ സൻ കർമസ്വ് ഏവ പ്രവർതതേ
    നാസിദ്ധൗ വ്യഥതേ തസ്യ ന സിദ്ധൗ ഹർഷം അശ്നുതേ
13 തത്രേയം അർഥമാത്രാ മേ ഭീമസേന വിവക്ഷിതാ
    നൈകാന്ത സിദ്ധിർ മന്തവ്യാ കുരുഭിഃ സഹ സംയുഗേ
14 നാതിപ്രണീത രശ്മിഃ സ്യാത് തഥാ ഭവതി പര്യയേ
    വിഷാദം അർഛേദ് ഗ്ലാനിം വാ ഏതദർഥം ബ്രവീമി തേ
15 ശ്വോഭൂതേ ധൃതരാഷ്ട്രസ്യ സമീപം പ്രാപ്യ പാണ്ഡവ
    യതിഷ്യേ പ്രശമം കർതും യുഷ്മദർഥം അഹാപയൻ
16 ശമം ചേത് തേ കരിഷ്യന്തി തതോ ഽനന്തം യശോ മമ
    ഭവതാം ച കൃതഃ കാമസ് തേഷാം ച ശ്രേയ ഉത്തമം
17 തേ ചേദ് അഭിനിവേക്ഷ്യന്തി നാഭ്യുപൈഷ്യന്തി മേ വചഃ
    കുരവോ യുദ്ധം ഏവാത്ര രൗദ്രം കർമ ഭവിഷ്യതി
18 അസ്മിൻ യുദ്ധേ ഭീമസേന ത്വയി ഭാരഃ സമാഹിതഃ
    ധൂർ അർജുനേന ധാര്യാ സ്യാദ് വോഢവ്യ ഇതരോ ജനഃ
19 അഹം ഹി യന്താ ബീഭത്സോർ ഭവിതാ സംയുഗേ സതി
    ധനഞ്ജയസ്യൈഷ കാമോ ന ഹി യുദ്ധം ന കാമയേ
20 തസ്മാദ് ആശങ്കമാനോ ഽഹം വൃകോദര മതിം തവ
    തുദന്ന് അക്ലീബയാ വാചാ തേജസ് തേ സമദീപയം