മഹാഭാരതം മൂലം/ഉദ്യോഗപർവം/അധ്യായം74

മഹാഭാരതം മൂലം/ഉദ്യോഗപർവം
രചന:വ്യാസൻ
അധ്യായം74

1 [വ്]
     തഥോക്തോ വാസുദേവേന നിത്യമന്യുർ അമർഷണഃ
     സദശ്വവത് സമാധാവദ് ബഭാഷേ തദനന്തരം
2 അന്യഥാ മാം ചികീർഷന്തം അന്യഥാ മന്യസേ ഽച്യുത
     പ്രണീത ഭാവം അത്യന്തം യുധി സത്യപരാക്രമം
3 വേത്ഥ ദാശാർഹ സത്ത്വം മേ ദീർഘകാലം സഹോഷിതഃ
     ഉത വാ മാം ന ജാനാസി പ്ലവൻ ഹ്രദ ഇവാൽപവഃ
     തസ്മാദ് അപ്രതിരൂപാഭിർ വാഗ്ഭിർ മാം ത്വം സമർഛസി
4 കഥം ഹി ഭീമസേനം മാം ജാനൻ കശ് ചന മാധവ
     ബ്രൂയാദ് അപ്രതിരൂപാണി യഥാ മാം വക്തും അർഹസി
5 തസ്മാദ് ഇദം പ്രവക്ഷ്യാമി വചനം വൃഷ്ണിനന്ദന
     ആത്മനഃ പൗരുഷം ചൈവ ബലം ച ന സമം പരൈഃ
6 സർവഥാ നാര്യ കർമൈതത് പ്രശംസാ സ്വയം ആത്മനഃ
     അതിവാദാപവിദ്ധസ് തു വക്ഷ്യാമി ബലം ആത്മനഃ
7 പശ്യേമേ രോദസീ കൃഷ്ണ യയോർ ആസന്ന് ഇമാഃ പ്രജാഃ
     അചലേ ചാപ്യ് അനന്തേ ച പ്രതിഷ്ഠേ സർവമാതരൗ
8 യദീമേ സഹസാ ക്രുദ്ധേ സമേയാതാം ശിലേ ഇവ
     അമം ഏതേ നിഗൃഹ്ണീയാം ബാഹുഭ്യാം സചരാചരേ
9 പശ്യൈതദ് അന്തരം ബാഹ്വോർ മഹാപരിഘയോർ ഇവ
     യ ഏതത് പ്രാപ്യ മുച്യേത ന തം പശ്യാമി പൂരുഷം
10 ഹിമവാംശ് ച സമുദ്രശ് ച വജ്രീ ച ബലഭിത് സ്വയം
    മയാഭിപന്നം ത്രായേരൻ ബലം ആസ്ഥായ ന ത്രയഃ
11 യുധ്യേയം ക്ഷത്രിയാൻ സർവാൻ പാണ്ഡവേഷ്വ് ആതതായിനഃ
    അധഃ പാദതലേനൈതാൻ അധിഷ്ഠാസ്യാമി ഭൂതലേ
12 ന ഹി ത്വം നാഭിജാനാസി മമ വിക്രമം അച്യുത
    യഥാ മയാ വിനിർജിത്യ രാജാനോ വശഗാഃ കൃതാഃ
13 അഥ ചേൻ മാം ന ജാനാസി സൂര്യസ്യേവോദ്യതഃ പ്രഭാം
    വിഗാഢേ യുധി സംബാധേ വേത്സ്യസേ മാം ജനാർദന
14 കിം മാത്യവാക്ഷീഃ പരുഷൈർ വ്രണം സൂച്യാ ഇവാനഘ
    യഥാമതി ബ്രവീമ്യ് ഏതദ് വിദ്ധി മാം അധികം തതഃ
15 ദ്രഷ്ടാസി യുധി സംബാധേ പ്രവൃത്തേ വൈശസേ ഽഹനി
    മയാ പ്രണുന്നാൻ മാതംഗാൻ രഥിനഃ സാദിനസ് തഥാ
16 തഥാ നരാൻ അഭിക്രുദ്ധം നിഘ്നന്തം ക്ഷത്രിയർഷഭാൻ
    ദ്രഷ്ടാ മാം ത്വം ച ലോകശ് ച വികർഷന്തം വരാൻ വരാൻ
17 ന മേ സീദന്തി മജ്ജാനോ ന മമോദ്വേപതേ മനഃ
    സർവലോകാദ് അഭിക്രുദ്ധാൻ ന ഭയം വിദ്യതേ മമ
18 കിം തു സൗഹൃദം ഏവൈതത് കൃപയാ മധുസൂദന
    സർവാംസ് തിതിക്ഷേ സങ്ക്ലേശാൻ മാ സ്മ നോ ഭരതാ നശൻ