മഹാഭാരതം മൂലം/ഉദ്യോഗപർവം/അധ്യായം66
| ←അധ്യായം65 | മഹാഭാരതം മൂലം/ഉദ്യോഗപർവം രചന: അധ്യായം66 |
അധ്യായം67→ |
1 [സ്]
അർജുനോ വാസുദേവശ് ച ധന്വിനൗ പരമാർചിതൗ
കാമാദ് അന്യത്ര സംഭൂതൗ സർവാഭാവായ സംമിതൗ
2 ദ്യാം അന്തരം സമാസ്ഥായ യഥാ യുക്തം മനസ്വിനഃ
ചക്രം തദ് വാസുദേവസ്യ മായയാ വർതതേ വിഭോ
3 സാപഹ്നവം പാണ്ഡവേഷു പാണ്ഡവാനാം സുസംമതം
സാരാസാര ബലം ജ്ഞാത്വാ തത് സമാസേന മേ ശൃണു
4 നരകം ശംബരം ചൈവ കംസം ചൈദ്യം ച മാധവഃ
ജിതവാൻ ഘോരസങ്കാശാൻ ക്രീഡന്ന് ഇവ ജനാർദനഃ
5 പൃഥിവീം ചാന്തരിക്ഷം ച ദ്യാം ചൈവ പുരുഷോത്തമഃ
മനസൈവ വിശിഷ്ടാത്മാ നയത്യ് ആത്മവശം വശീ
6 ഭൂയോ ഭൂയോ ഹി യദ് രാജൻ പൃച്ഛസേ പാണ്ഡവാൻ പ്രതി
സാരാസാര ബലം ജ്ഞാതും തൻ മേ നിഗദതഃ ശൃണു
7 ഏകതോ വാ ജഗത് കൃത്സ്നം ഏകതോ വാ ജനാർദനഃ
സാരതോ ജഗതഃ കൃത്സ്നാദ് അതിരിക്തോ ജനാർദനഃ
8 ഭസ്മ കുര്യാജ് ജഗദ് ഇദം മനസൈവ ജനാർദനഃ
ന തു കൃത്സ്നം ജഗച് ഛക്തം ഭസ്മ കർതും ജനാർദനം
9 യതഃ സത്യം യതോ ധർമോ യതോ ഹ്രീർ ആർജവം യതഃ
തതോ ഭവതി ഗോവിന്ദോ യതഃ കൃഷ്ണസ് തതോ ജയഃ
10 പൃഥിവീം ചാന്തരിക്ഷം ച ദിവം ച പുരുഷോത്തമഃ
വിചേഷ്ടയതി ഭൂതാത്മാ ക്രീഡന്ന് ഇവ ജനാർദനഃ
11 സ കൃത്വാ പാണ്ഡവാൻ സത്രം ലോകം സംമോഹയന്ന് ഇവ
അധർമനിരതാൻ മൂഢാൻ ദഗ്ധും ഇച്ഛതി തേ സുതാൻ
12 കാലചക്രം ജഗച് ചക്രം യുഗചക്രം ച കേശവഃ
ആത്മയോഗേന ഭഗവാൻ പരിവർതയതേ ഽനിശം
13 കാലസ്യ ച ഹി മൃത്യോശ് ച ജംഗമ സ്ഥാവരസ്യ ച
ഈശതേ ഭഗവാൻ ഏകഃ സത്യം ഏതദ് ബ്രവീമി തേ
14 ഈശന്ന് അപി മഹായോഗീ സർവസ്യ ജഗതോ ഹരിഃ
കർമാണ്യ് ആരഭതേ കർതും കീനാശ ഇവ ദുർബലഃ
15 തേന വഞ്ചയതേ ലോകാൻ മായായോഗേന കേശവഃ
യേ തം ഏവ പ്രപദ്യന്തേ ന തേ മുഹ്യന്തി മാനവാഃ