മഹാഭാരതം മൂലം/ഉദ്യോഗപർവം/അധ്യായം185
| ←അധ്യായം184 | മഹാഭാരതം മൂലം/ഉദ്യോഗപർവം രചന: അധ്യായം185 |
അധ്യായം186→ |
1 ഭീഷ്മ ഉവാച
തതോ രാത്ര്യാം വ്യതീതായാം പ്രതിബുദ്ധോ ഽസ്മി ഭാരത
തം ച സഞ്ചിന്ത്യ വൈ സ്വപ്നം അവാപം ഹർഷം ഉത്തമം
2 തതഃ സമഭവദ് യുദ്ധം മമ തസ്യ ച ഭാരത
തുമുലം സർവഭൂതാനാം ലോമഹർഷണം അദ്ഭുതം
3 തതോ ബാണമയം വർഷം വവർഷ മയി ഭാർഗവഃ
ന്യവാരയം അഹം തം ച ശരജാലേന ഭാരത
4 തതഃ പരമസങ്ക്രുദ്ധഃ പുനർ ഏവ മഹാതപാഃ
ഹ്യസ്തനേനൈവ കോപേന ശക്തിം വൈ പ്രാഹിണോൻ മയി
5 ഇന്ദ്രാശനിസമസ്പർശാം യമദണ്ഡോപമപ്രഭാം
ജ്വലന്തീം അഗ്നിവത് സംഖ്യേ ലേലിഹാനാം സമന്തതഃ
6 തതോ ഭരതശാർദൂല ധിഷ്ണ്യം ആകാശഗം യഥാ
സാ മാം അഭ്യഹനത് തൂർണം അംസദേശേ ച ഭാരത
7 അഥാസൃങ് മേ ഽസ്രവദ് ഘോരം ഗിരേർ ഗൈരികധാതുവത്
രാമേണ സുമഹാബാഹോ ക്ഷതസ്യ ക്ഷതജേക്ഷണ
8 തതോ ഽഹം ജാമദഗ്ന്യായ ഭൃശം ക്രോധസമന്വിതഃ
പ്രേഷയം മൃത്യുസങ്കാശം ബാണം സർപവിഷോപമം
9 സ തേനാഭിഹതോ വീരോ ലലാടേ ദ്വിജസത്തമഃ
അശോഭത മഹാരാജ സശൃംഗ ഇവ പർവതഃ
10 സ സംരബ്ധഃ സമാവൃത്യ ബാണം കാലാനകോപമം
സന്ദധേ ബലവത് കൃഷ്യ ഘോരം ശത്രുനിബർഹണം
11 സ വക്ഷസി പപാതോഗ്രഃ ശരോ വ്യാല ഇവ ശ്വസൻ
മഹീം രാജംസ് തതശ് ചാഹം അഗച്ഛം രുധിരാവിലഃ
12 അവാപ്യ തു പുനഃ സഞ്ജ്ഞാം ജാമദഗ്ന്യായ ധീമതേ
പ്രാഹിണ്വം വിമലാം ശക്തിം ജ്വലന്തീം അശനീം ഇവ
13 സാ തസ്യ ദ്വിജമുഖ്യസ്യ നിപപാത ഭുജാന്തരേ
വിഹ്വലശ് ചാഭവദ് രാജൻ വേപഥുശ് ചൈനം ആവിശത്
14 തത ഏനം പരിഷ്വജ്യ സഖാ വിപ്രോ മഹാതപാഃ
അകൃതവ്രണഃ ശുഭൈർ വാക്യൈർ ആശ്വാസയദ് അനേകധാ
15 സമാശ്വസ്തസ് തദാ രാമഃ ക്രോധാമർഷസമന്വിതഃ
പ്രാദുശ്ചക്രേ തദാ ബ്രാഹ്മം പരമാസ്ത്രം മഹാവ്രതഃ
16 തതസ് തത് പ്രതിഘാതാർഥം ബ്രാഹം ഏവാസ്ത്രം ഉത്തമം
മയാ പ്രയുക്തം ജജ്വാല യുഗാന്തം ഇവ ദർശയത്
17 തയോർ ബ്രഹ്മാസ്ത്രയോർ ആസീദ് അന്തരാ വൈ സമാഗമഃ
അസമ്പ്രാപ്യൈവ രാമം ച മാം ച ഭാരതസത്തമ
18 തതോ വ്യോമ്നി പ്രാദുരഭൂത് തേജ ഏവ ഹി കേവലം
ഭൂതാനി ചൈവ സർവാണി ജഗ്മുർ ആർതിം വിശാം പതേ
19 ഋഷയശ് ച സഗന്ധർവാ ദേവതാശ് ചൈവ ഭാരത
സന്താപം പരമം ജഗ്മുർ അസ്ത്രതേജോഽഭിപീഡിതാഃ
20 തതശ് ചചാല പൃഥിവീ സപർവതവനദ്രുമാ
സന്തപ്താനി ച ഭൂതാനി വിഷാദം ജഗ്മുർ ഉത്തമം
21 പ്രജജ്വാല നഭോ രാജൻ ധൂമായന്തേ ദിശോ ദശ
ന സ്ഥാതും അന്തരിക്ഷേ ച ശേകുർ ആകാശഗാസ് തദാ
22 തതോ ഹാഹാകൃതേ ലോകേ സദേവാസുരരാക്ഷസേ
ഇദം അന്തരം ഇത്യ് ഏവ യോക്തുകാമോ ഽസ്മി ഭാരത
23 പ്രസ്വാപം അസ്ത്രം ദയിതം വചനാദ് ബ്രഹ്മവാദിനാം
ചിന്തിതം ച തദ് അസ്ത്രം മേ മനസി പ്രത്യഭാത് തദാ