മഹാഭാരതം മൂലം/ഉദ്യോഗപർവം/അധ്യായം161
| ←അധ്യായം160 | മഹാഭാരതം മൂലം/ഉദ്യോഗപർവം രചന: അധ്യായം161 |
അധ്യായം162→ |
1 [സ്]
ഉലൂകസ്യ വചഃ ശ്രുത്വാ കുന്തീപുത്രോ യുധിഷ്ഠിരഃ
സേനാം നിര്യാപയാം ആസ ധൃഷ്ടദ്യുമ്നപുരോഗമാം
2 പദാതിനീം നാഗവതീം രഥിനീം അശ്വവൃന്ദിനീം
ചതുർവിധ ബലാം ഭീമാം അകമ്പ്യാം പൃഥിവീം ഇവ
3 ഭീമസേനാദിഭിർ ഗുപ്താം സാർജുനൈശ് ച മഹാരഥൈഃ
ധൃഷ്ടദ്യുമ്ന വശാം ദുർഗാം സാഗരസ്തിമിതോപമാം
4 തസ്യാസ് ത്വ് അഗ്രേ മഹേഷ്വാസഃ പാഞ്ചാല്യോ യുദ്ധദുർമദഃ
ദ്രോണ പ്രേപ്സുർ അനീകാനി ധൃഷ്ടദ്യുമ്നഃ പ്രകർഷതി
5 യഥാബലം യഥോത്സാഹം രഥിനഃ സമുപാദിശത്
അർജുനം സൂതപുത്രായ ഭീമം ദുര്യോധനായ ച
6 അശ്വത്ഥാമ്നേ ച നകുലം ശൈബ്യം ച കൃതവർമണേ
സൈന്ധവായ ച വാർഷ്ണേയം യുയുധാനം ഉപാദിശത്
7 ശിഖണ്ഡിനം ച ഭീഷ്മായ പ്രമുഖേ സമകൽപയത്
സഹദേവം ശകുനയേ ചേകിതാനം ശലായ ച
8 ധൃഷ്ടകേതും ച ശല്യായ ഗൗതമായോത്തമൗജസം
ദ്രൗപദേയാംശ് ച പഞ്ചഭ്യസ് ത്രിഗർതേഭ്യഃ സമാദിശത്
9 വൃഷസേനായ സൗഭദ്രം ശേഷാണാം ച മഹീക്ഷിതാം
സമർഥം തം ഹി മേനേ വൈ പാർഥാദ് അഭ്യധികം രണേ
10 ഏവം വിഭജ്യ യോധാംസ് താൻ പൃഥക് ച സഹ ചൈവ ഹ
ജ്വാലാ വർണോ മഹേഷ്വാസോ ദ്രോണം അംശം അകൽപയത്
11 ധൃഷ്ടദ്യുമ്നോ മഹേഷ്വാസഃ സേനാപതിപതിസ് തതഃ
വിധിവദ് വ്യൂഢ്യ മേധാവീ യുദ്ധായ ധൃതമാനസഃ
12 യഥാദിഷ്ടാന്യ് അനീകാനി പാണ്ഡവാനാം അയോജയത്
ജയായ പാണ്ഡുപുത്രാണാം യത്തസ് തസ്ഥൗ രണാജിരേ