മഹാഭാരതം മൂലം/ഉദ്യോഗപർവം/അധ്യായം150

മഹാഭാരതം മൂലം/ഉദ്യോഗപർവം
രചന:വ്യാസൻ
അധ്യായം150

1 [ജ്]
     യുധിഷ്ഠിരം സഹാനീകം ഉപയാന്തം യുയുത്സയാ
     സംനിവിഷ്ടം കുരുക്ഷേത്രം വാസുദേവേന പാലിതം
2 വിരാടദ്രുപദാഭ്യാം ച സപുത്രാഭ്യാം സമന്വിതം
     കേകയൈർ വൃഷ്ണിഭിശ് ചൈവ പാർഥിവൈഃ ശതശോ വൃതം
3 മഹേന്ദ്രം ഇവ ചാദിത്യൈർ അഭിഗുപ്തം മഹാരഥൈഃ
     ശ്രുത്വാ ദുര്യോധനോ രാജാ കിം കാര്യം പ്രത്യപദ്യത
4 ഏതദ് ഇച്ഛാമ്യ ഹം ശ്രോതും വിസ്തരേണ തപോധന
     സംഭ്രമേ തുമുലേ തസ്മിൻ യദാസീത് കുരുജാംഗലേ
5 വ്യഥയേയുർ ഹി ദേവാനാം സേനാം അപി സമാഗമേ
     പാണ്ഡവാ വാസുദേവശ് ച വിരാടദ്രുപദൗ തഥാ
6 ധൃഷ്ടദ്യുമ്നശ് ച പാഞ്ചാല്യഃ ശിഖണ്ഡീ ച മഹാരഥഃ
     യുയുധാനശ് ച വിക്രാന്തോ ദേവൈർ അപി ദുരാസദഃ
7 ഏതദ് ഇച്ഛാമ്യ് അഹം ശ്രോതും വിസ്തരേണ തപോധന
     കുരൂണാം പാണ്ഡവാനാം ച യദ് യദ് ആസീദ് വിചേഷ്ടിതം
8 പ്രതിയാതേ തു ദാശാർഹേ രാജാ ദുര്യോധനസ് തദാ
     കർണം ദുഃശാസനം ചൈവ ശകുനിം ചാബ്രവീദ് ഇദം
9 അകൃതേനൈവ കാര്യേണ ഗതഃ പാർഥാൻ അധോക്ഷജഃ
     സ ഏനാൻ മന്യുനാവിഷ്ടോ ധ്രുവം വക്ഷ്യത്യ് അസംശയം
10 ഇഷ്ടോ ഹി വാസുദേവസ്യ പാണ്ഡവൈർ മമ വിഗ്രഹഃ
    ഭീമസേനാർജുനൗ ചൈവ ദാശാർഹസ്യ മതേ സ്ഥിതൗ
11 അജാതശത്രുർ അപ്യ് അദ്യ ഭീമാർജുനവശാനുഗഃ
    നികൃതശ് ച മയാ പൂർവം സഹ സർവൈഃ സഹോദരൈഃ
12 വിരാടദ്രുപദൗ ചൈവ കൃതവൈരൗ മയാ സഹ
    തൗ ച സേനാ പ്രണേതാരൗ വാസുദേവ വശാനുഗൗ
13 ഭവിതാ വിഗ്രഹഃ സോ ഽയം തുമുലോ ലോമഹർഷണഃ
    തസ്മാത് സാംഗ്രാമികം സർവം കാരയധ്വം അതന്ദ്രിതാഃ
14 ശിബിരാണി കുരുക്ഷേത്രേ ക്രിയന്താം വസുധാധിപാഃ
    സുപര്യാപ്താവകാശാനി ദുരാദേയാനി ശത്രുഭിഃ
15 ആസന്ന ജലകാണ്ഠാനി ശതശോ ഽഥ സഹസ്രശഃ
    അച്ഛേദ്യാഹാര മാർഗാണി രത്നോച്ചയ ചിതാനി ച
    വിവിധായുധപൂർണാനി പതാകാധ്വജവന്തി ച
16 സമാശ് ച തേഷാം പന്ഥാനഃ ക്രിയന്താം നഗരാദ് ബഹിഃ
    പ്രയാണം ഘുഷ്യതാം അദ്യ ശ്വോഭൂത ഇതി മാചിരം
17 തേ തഥേതി പ്രതിജ്ഞായ ശ്വോഭൂതേ ചക്രിരേ തഥാ
    ഹൃഷ്ടരൂപാ മഹാത്മാനോ വിനാശായ മഹീക്ഷിതാം
18 തതസ് തേ പാർഥിവാഃ സർവേ തച് ഛ്രുത്വാ രാജശാസനം
    ആസനേഭ്യോ മഹാർഹേഭ്യ ഉദതിഷ്ഠന്ന് അമർഷിതാഃ
19 ബാഹൂൻ പരിഘസങ്കാശാൻ സംസ്ക്പൃശന്തഃ ശനൈഃ ശനൈഃ
    കാഞ്ചനാംഗദദീപ്താംശ് ച ചന്ദനാഗരുഭൂഷിതാൻ
20 ഉഷ്ണീഷാണി നിയച്ഛന്ന്തഃ പുണ്ഡരീകനിഭൈഃ കരൈഃ
    അന്തരീയോത്തരീയാണി ഭൂഷണാനി ച സർവശഃ
21 തേ രഥാൻ രഥിനഃ ശ്രേഷ്ഠാ ഹയാംശ് ച ഹയകോവിദാഃ
    സജ്ജയന്തി സ്മ നാഗാംശ് ച നാഗശിക്ഷാസു നിഷ്ഠിതാഃ
22 അഥ വർമാണി ചിത്രാണി കാഞ്ചനാനി ബഹൂനി ച
    വിവിധാനി ച ശസ്ത്രാണി ചക്രുഃ സജ്ജാനി സർവശഃ
23 പദാതയശ് ച പുരുഷാഃ ശസ്ത്രാണി വിവിധാനി ച
    ഉപജഹ്രുഃ ശരീരേഷു ഹേമചിത്രാണ്യ് അനേകശഃ
24 തദ് ഉത്സവ ഇവോദഗ്രം സമ്പ്രഹൃഷ്ടനരാവൃതം
    നഗരം ധാർതരാഷ്ട്രസ്യ ഭാരതാസീത് സമാകുലം
25 ജനൗഘസലിലാവർതോ രഥനാഗാശ്വമീനവാൻ
    ശംഖദുന്ദുഭിനിർഘോഷഃ കോശസഞ്ചയ രത്നവാൻ
26 ചിത്രാഭരണ വർമോർമിഃ ശസ്ത്രനിർമല ഫേനവാൻ
    പ്രാസാദമാലാദ്രിവൃതോ രഥ്യാപണ മഹാഹ്രദഃ
27 യോധചന്ദ്രോദയോദ്ഭൂതഃ കുരുരാജമഹാർണവഃ
    അദൃശ്യത തദാ രാജംശ് ചന്ദ്രോദയ ഇവാർണവഃ