മഹാഭാരതം മൂലം/ഉദ്യോഗപർവം/അധ്യായം113

മഹാഭാരതം മൂലം/ഉദ്യോഗപർവം
രചന:വ്യാസൻ
അധ്യായം113

1 [ൻ]
     ഏവം ഉക്തഃ സുപർണേന തഥ്യം വചനം ഉത്തമം
     വിമൃശ്യാവഹിതോ രാജാ നിശ്ചിത്യ ച പുനഃ പുനഃ
2 യഷ്ടാ ക്രതുസഹസ്രാണാം ദാതാ ദാനപതിഃ പ്രഭുഃ
     യയാതിർ വത്സ കാശീശ ഇദം വചനം അബ്രവീത്
3 ദൃഷ്ട്വാ പ്രിയസഖം താർക്ഷ്യം ഗാലവം ച ദ്വിജർഷഭം
     നിദർശനം ച തപസോ ഭിക്ഷാം ശ്ലാഘ്യാം ച കീർതിതാം
4 അതീത്യ ച നൃപാൻ അന്യാൻ ആദിത്യകുലസംഭവാൻ
     മത്സകാശം അനുപ്രാപ്താവ് ഏതൗ ബുദ്ധിം അവേക്ഷ്യ ച
5 അദ്യ മേ സഫലം ജന്മ താരിതം ചാദ്യ മേ കുലം
     അദ്യായം താരിതോ ദേശോ മമ താർക്ഷ്യ ത്വയാനഘ
6 വക്തും ഇച്ഛാമി തു സഖേ യഥാ ജാനാസി മാം പുരാ
     ന തഥാ വിത്തവാൻ അസ്മി ക്ഷീണം വിത്തം ഹി മേ സഖേ
7 ന ച ശക്തോ ഽസ്മി തേ കർതും മോഘം ആഗമനം ഖഗ
     ന ചാശാം അസ്യ വിപ്രർഷേർ വിതഥാം കർതും ഉത്സഹേ
8 തത് തു ദാസ്യാമി യത് കാര്യം ഇദം സമ്പാദയിഷ്യതി
     അഭിഗമ്യ ഹതാശോ ഹി നിവൃത്തോ ദഹതേ കുലം
9 നാതഃ പരം വൈനതേയ കിം ചിത് പാപിഷ്ഠം ഉച്യതേ
     യഥാശാ നാശനം ലോകേ ദേഹി നാസ്തീതി വാ വചഃ
10 ഹതാശോ ഹ്യ് അകൃതാർഥഃ സൻ ഹതഃ സംഭാവിതോ നരഃ
    ഹിനസ്തി തസ്യ പുത്രാംശ് ച പൗത്രാംശ് ചാകുർവതോ ഽർഥിനാം
11 തസ്മാച് ചതുർണാം വംശാനാം സ്ഥാപയിത്രീ സുതാ മമ
    ഇയം സുരസുത പ്രഖ്യാ സർവധർമോപചായിനീ
12 സദാ ദേവമനുഷ്യാണാം അസുരാണാം ച ഗാലവ
    കാങ്ക്ഷിതാ രൂപതോ ബാലാ സുതാ മേ പ്രതിഗൃഹ്യതാം
13 അസ്യാഃ ശുൽകം പ്രദാസ്യന്തി നൃപാ രാജ്യം അപി ധ്രുവം
    കിം പുനഃ ശ്യാമ കർണാനാം ഹയാനാം ദ്വേ ചതുഃശതേ
14 സ ഭവാൻ പ്രതിഗൃഹ്ണാതു മമേമാം മാധവീം സുതാം
    അഹം ദൗഹിത്രവാൻ സ്യാം വൈ വര ഏഷ മമ പ്രഭോ
15 പ്രതിഗൃഹ്യ ച താം കന്യാം ഗാലവഃ സഹ പക്ഷിണാ
    പുനർ ദ്രക്ഷ്യാവ ഇത്യ് ഉക്ത്വാ പ്രതസ്ഥേ സഹ കന്യയാ
16 ഉപലബ്ധം ഇദം ദ്വാരം അശ്വാനാം ഇതി ചാണ്ഡജഃ
    ഉക്ത്വാ ഗാലവം ആപൃച്ഛ്യ ജഗാമ ഭവനം സ്വകം
17 ഗതേ പതഗരാജേ തു ഗാലവഃ സഹ കന്യയാ
    ചിന്തയാനഃ ക്ഷമം ദാനേ രാജ്ഞാം വൈ ശുൽകതോ ഽഗമത്
18 സോ ഽഗച്ഛൻ മനസേക്ഷ്വാകും ഹര്യശ്വം രാജസത്തമം
    അയോധ്യായാം മഹാവീര്യം ചതുരംഗ ബലാന്വിതം
19 കോശധാന്യ ബലോപേതം പ്രിയ പൗരം ദ്വിജ പ്രിയം
    പ്രജാഭികാമം ശാമ്യന്തം കുർവാണം തപ ഉത്തമം
20 തം ഉപാഗമ്യ വിപ്രഃ സ ഹര്യശ്വം ഗാലവോ ഽബ്രവീത്
    കന്യേയം മമ രാജേന്ദ്ര പ്രസവൈഃ കുലവർധിനീ
21 ഇയം ശുക്ലേന ഭാര്യാർഥേ ഹര്യശ്വപ്രതിഗൃഹ്യതാം
    ശുൽകം തേ കീർതയിഷ്യാമി തച് ഛ്രുത്വാ സമ്പ്രധാര്യതാം