മഹാഭാരതം മൂലം/ആദിപർവം/അധ്യായം95
| ←അധ്യായം94 | മഹാഭാരതം മൂലം/ആദിപർവം രചന: അധ്യായം 95 |
അധ്യായം96→ |
1 [വ്]
തതോ വിവാഹേ നിർവൃത്തേ സ രാജാ ശന്തനുർ നൃപഃ
താം കന്യാം രൂപസമ്പന്നാം സ്വഗൃഹേ സംന്യവേശയത്
2 തതഃ ശാന്തനവോ ധീമാൻ സത്യവത്യാം അജായത
വീരശ് ചിത്രാംഗദോ നാമ വീര്യേണ മനുജാൻ അതി
3 അഥാപരം മഹേഷ്വാസം സത്യവത്യാം പുനഃ പ്രഭുഃ
വിചിത്രവീര്യം രാജാനം ജനയാം ആസ വീര്യവാൻ
4 അപ്രാപ്തവതി തസ്മിംശ് ച യൗവനം ഭരതർഷഭ
സ രാജാ ശന്തനുർ ധീമാൻ കാലധർമം ഉപേയിവാൻ
5 സ്വർഗതേ ശന്തനൗ ഭീഷ്മശ് ചിത്രാംഗദം അരിന്ദമം
സ്ഥാപയാം ആസ വൈ രാജ്യേ സത്യവത്യാ മതേ സ്ഥിതഃ
6 സ തു ചിത്രാംഗദഃ ശൗര്യാത് സർവാംശ് ചിക്ഷേപ പാർഥിവാൻ
മനുഷ്യം ന ഹി മേനേ സ കം ചിത് സദൃശം ആത്മനഃ
7 തം ക്ഷിപന്തം സുരാംശ് ചൈവ മനുഷ്യാൻ അസുരാംസ് തഥാ
ഗന്ധർവരാജോ ബലവാംസ് തുല്യനാമാഭ്യയാത് തദാ
തേനാസ്യ സുമഹദ് യുദ്ധം കുരുക്ഷേത്രേ ബഭൂവ ഹ
8 തയോർ ബലവതോസ് തത്ര ഗന്ധർവകുരുമുഖ്യയോഃ
നദ്യാസ് തീരേ ഹിരണ്വത്യാഃ സമാസ് തിസ്രോ ഽഭവദ് രണഃ
9 തസ്മിൻ വിമർദേ തുമുലേ ശസ്ത്രവൃഷ്ടിം സമാകുലേ
മായാധികോ ഽവധീദ് വീരം ഗന്ധർവഃ കുരുസത്തമം
10 ചിത്രാംഗദം കുരുശ്രേഷ്ഠം വിചിത്രശരകാർമുകം
അന്തായ കൃത്വാ ഗന്ധർവോ ദിവം ആചക്രമേ തതഃ
11 തസ്മിൻ നൃപതിശാർദൂലേ നിഹതേ ഭൂരി വർചസി
ഭീഷ്മഃ ശാന്തനവോ രാജൻ പ്രേതകാര്യാണ്യ് അകാരയത്
12 വിചിത്രവീര്യം ച തദാ ബാലം അപ്രാപ്തയൗവനം
കുരുരാജ്യേ മഹാബാഹുർ അഭ്യഷിഞ്ചദ് അനന്തരം
13 വിചിത്രവീര്യസ് തു തദാ ഭീഷ്മസ്യ വചനേ സ്ഥിതഃ
അന്വശാസൻ മഹാരാജ പിതൃപൈതാമഹം പദം
14 സ ധർമശാസ്ത്രകുശലോ ഭീഷ്മം ശാന്തനവം നൃപഃ
പൂജയാം ആസ ധർമേണ സ ചൈനം പ്രത്യപാലയത്