മഹാഭാരതം മൂലം/ആദിപർവം/അധ്യായം81

മഹാഭാരതം മൂലം/ആദിപർവം
രചന:വ്യാസൻ
അധ്യായം 81

1 [വ്]
     ഏവം സ നാഹുഷോ രാജാ യയാതിഃ പുത്രം ഈപ്സിതം
     രാജ്യേ ഽഭിഷിച്യ മുദിതോ വാനപ്രസ്ഥോ ഽഭവൻ മുനിഃ
2 ഉഷിത്വാ ച വനേവാസം ബ്രാഹ്മണൈഃ സഹ സംശ്രിതഃ
     ഫലമൂലാശനോ ദാന്തോ യഥാ സ്വർഗം ഇതോ ഗതഃ
3 സ ഗതഃ സുരവാസം തം നിവസൻ മുദിതഃ സുഖം
     കാലസ്യ നാതിമഹതഃ പുനഃ ശക്രേണ പാതിതഃ
4 നിപതൻ പ്രച്യുതഃ സ്വർഗാദ് അപ്രാപ്തോ മേദിനീ തലം
     സ്ഥിത ആസീദ് അന്തരിക്ഷേ സ തദേതി ശ്രുതം മയാ
5 തത ഏവ പുനശ് ചാപി ഗതഃ സ്വർഗം ഇതി ശ്രുതിഃ
     രാജ്ഞാ വസുമതാ സാർധം അഷ്ടകേന ച വീര്യവാൻ
     പ്രതർദനേന ശിബിനാ സമേത്യ കില സംസദി
6 [ജ്]
     കർമണാ കേന സ ദിവം പുനഃ പ്രാപ്തോ മഹീപതിഃ
     സർവം ഏതദ് അശേഷേണ ശ്രോതും ഇച്ഛാമി തത്ത്വതഃ
     കഥ്യമാനം ത്വയാ വിപ്ര വിപ്രർഷിഗണസംനിധൗ
7 ദേവരാജസമോ ഹ്യ് ആസീദ് യയാതിഃ പൃഥിവീപതിഃ
     വർധനഃ കുരുവംശസ്യ വിഭാവസു സമദ്യുതിഃ
8 തസ്യ വിസ്തീർണയശസഃ സത്യകീർതേർ മഹാത്മനഃ
     ചരിതം ശ്രോതും ഇച്ഛാമി ദിവി ചേഹ ച സർവശഃ
9 [വ്]
     ഹന്ത തേ കഥയിഷ്യാമി യയാതേർ ഉത്തരാം കഥാം
     ദിവി ചേഹ ച പുണ്യാർഥാം സർവപാപപ്രണാശിനീം
10 യയാതിർ നാഹുഷോ രാജാ പൂരും പുത്രം കനീയസം
    രാജ്യേ ഽഭിഷിച്യ മുദിതഃ പ്രവവ്രാജ വനം തദാ
11 അന്തേഷു സ വിനിക്ഷിപ്യ പുത്രാൻ യദുപുരോഗമാൻ
    ഫലമൂലാശനോ രാജാ വനേ സംന്യവസച് ചിരം
12 സംശിതാത്മാ ജിതക്രോധസ് തർപയൻ പിതൃദേവതാഃ
    അഗ്നീംശ് ച വിധിവജ് ജുഹ്വൻ വാനപ്രസ്ഥവിധാനതഃ
13 അതിഥീൻ പൂജയാം ആസ വന്യേന ഹവിഷാ വിഭുഃ
    ശിലോഞ്ഛ വൃത്തിം ആസ്ഥായ ശേഷാന്ന കൃതഭോജനഃ
14 പൂർണം വർഷസഹസ്രം സ ഏവംവൃത്തിർ അഭൂൻ നൃപഃ
    അബ്ഭക്ഷഃ ശരദസ് ത്രിംശദ് ആസീൻ നിയതവാൻ മനാഃ
15 തതശ് ച വായുഭക്ഷോ ഽഭൂത് സംവത്സരം അതന്ദ്രിതഃ
    പഞ്ചാഗ്നിമധ്യേ ച തപസ് തേപേ സംവത്സരം നൃപഃ
16 ഏകപാദസ്ഥിതശ് ചാസീത് ഷൺ മാസാൻ അനിലാശനഃ
    പുണ്യകീർതിസ് തതഃ സ്വർഗം ജഗാമാവൃത്യ രോദസീ