മഹാഭാരതം മൂലം/ആദിപർവം/അധ്യായം80

മഹാഭാരതം മൂലം/ആദിപർവം
രചന:വ്യാസൻ
അധ്യായം 80

1 [വ്]
     പൗരവേണാഥ വയസാ യയാതിർ നഹുഷാത്മജഃ
     പ്രീതിയുക്തോ നൃപശ്രേഷ്ഠശ് ചചാര വിഷയാൻ പ്രിയാൻ
2 യഥാകാമം യഥോത്സാഹം യഥാകാലം യഥാസുഖം
     ധർമാവിരുദ്ധാൻ രാജേന്ദ്രോ യഥാർഹതി സ ഏവ ഹി
3 ദേവാൻ അതർപയദ് യജ്ഞൈഃ ശ്രാദ്ധൈസ് തദ്വത് പിതൄൻ അപി
     ദീനാൻ അനുഗ്രഹൈർ ഇഷ്ടൈഃ കാമൈശ് ച ദ്വിജസത്തമാൻ
4 അതിഥീൻ അന്നപാനൈശ് ച വിശശ് ച പരിപാലനൈഃ
     ആനൃശംസ്യേന ശൂദ്രാംശ് ച ദസ്യൂൻ സംനിഗ്രഹേണ ച
5 ധർമേണ ച പ്രജാഃ സർവാ യഥാവദ് അനുരഞ്ജയൻ
     യയാതിഃ പാലയാം ആസ സാക്ഷാദ് ഇന്ദ്ര ഇവാപരഃ
6 സ രാജാ സിംഹവിക്രാന്തോ യുവാ വിഷയഗോചരഃ
     അവിരോധേന ധർമസ്യ ചചാര സുഖം ഉത്തമം
7 സ സമ്പ്രാപ്യ ശുഭാൻ കാമാംസ് തൃപ്തഃ ഖിന്നശ് ച പാർഥിവഃ
     കാലം വർഷസഹസ്രാന്തം സസ്മാര മനുജാധിപഃ
8 പരിസംഖ്യായ കാലജ്ഞഃ കലാഃ കാഷ്ഠാശ് ച വീര്യവാൻ
     പൂർണം മത്വാ തതഃ കാലം പൂരും പുത്രം ഉവാച ഹ
9 യഥാകാമം യഥോത്സാഹം യഥാകാലം അരിന്ദമ
     സേവിതാ വിഷയാഃ പുത്ര യൗവനേന മയാ തവ
10 പൂരോ പ്രീതോ ഽസ്മി ഭദ്രം തേ ഗൃഹാണേദം സ്വയൗവനം
    രാജ്യം ചൈവ ഗൃഹാണേദം ത്വം ഹി മേ പ്രിയകൃത് സുതഃ
11 പ്രതിപേദേ ജരാം രാജാ യയാതിർ നാഹുഷസ് തദാ
    യൗവനം പ്രതിപേദേ ച പൂരുഃ സ്വം പുനർ ആത്മനഃ
12 അഭിഷേക്തു കാമം നൃപതിം പൂരും പുത്രം കനീയസം
    ബ്രാഹ്മണ പ്രമുഖാ വർണാ ഇദം വചനം അബ്രുവൻ
13 കഥം ശുക്രസ്യ നപ്താരം ദേവ യാന്യാഃ സുതം പ്രഭോ
    ജ്യേഷ്ഠം യദും അതിക്രമ്യ രാജ്യം പൂരോഃ പ്രദാസ്യസി
14 യദുർ ജ്യേഷ്ഠസ് തവ സുതോ ജാതസ് തം അനു തുർവസുഃ
    ശർമിഷ്ഠായാഃ സുതോ ദ്രുഹ്യുസ് തതോ ഽനുഃ പൂരുർ ഏവ ച
15 കഥം ജ്യേഷ്ഠാൻ അതിക്രമ്യ കനീയാൻ രാജ്യം അർഹതി
    ഏതത് സംബോധയാമസ് ത്വാം ധർമം ത്വം അനുപാലയ
16 [യ്]
    ബ്രാഹ്മണ പ്രമുഖാ വർണാഃ സർവേ ശൃണ്വന്തു മേ വചഃ
    ജ്യേഷ്ഠം പ്രതി യഥാ രാജ്യം ന ദേയം മേ കഥം ചന
17 മമ ജ്യേഷ്ഠേന യദുനാ നിയോഗോ നാനുപാലിതഃ
    പ്രതികൂലഃ പിതുർ യശ് ച ന സപുത്രഃ സതാം മതഃ
18 മാതാപിത്രോർ വചനകൃദ് ധിതഃ പഥ്യശ് ച യഃ സുതഃ
    സപുത്രഃ പുത്രവദ് യശ് ച വർതതേ പിതൃമാതൃഷു
19 യദുനാഹം അവജ്ഞാതസ് തഥാ തുർവസുനാപി ച
    ദ്രുഹ്യുനാ ചാനുനാ ചൈവ മയ്യ് അവജ്ഞാ കൃതാ ഭൃശം
20 പൂരുണാ മേ കൃതം വാക്യം മാനിതശ് ച വിശേഷതഃ
    കനീയാൻ മമ ദായാദോ ജരാ യേന ധൃതാ മമ
    മമ കാമഃ സ ച കൃതഃ പൂരുണാ പുത്ര രൂപിണാ
21 ശുക്രേണ ച വരോ ദത്തഃ കാവ്യേനോശനസാ സ്വയം
    പുത്രോ യസ് ത്വാനുവർതേത സ രാജാ പൃഥിവീപതിഃ
    ഭവതോ ഽനുനയാമ്യ് ഏവം പൂരൂ രാജ്യേ ഽഭിഷിച്യതാം
22 [പ്രകൃതയഹ്]
    യഃ പുത്രോ ഗുണസമ്പന്നോ മാതാപിത്രോർ ഹിതഃ സദാ
    സർവം അർഹതി കല്യാണം കനീയാൻ അപി സ പ്രഭോ
23 അർഹഃ പൂരുർ ഇദം രാജ്യം യഃ സുതഃ പ്രിയകൃത് തവ
    വരദാനേന ശുക്രസ്യ ന ശക്യം വക്തും ഉത്തരം
24 [വ്]
    പൗരജാനപദൈസ് തുഷ്ടൈർ ഇത്യ് ഉക്തോ നാഹുഷസ് തദാ
    അഭ്യഷിഞ്ചത് തതഃ പൂരും രാജ്യേ സ്വേ സുതം ആത്മജം
25 ദത്ത്വാ ച പൂരവേ രാജ്യം വനവാസായ ദീക്ഷിതഃ
    പുരാത് സ നിര്യയൗ രാജാ ബ്രാഹ്മണൈസ് താപസൈഃ സഹ
26 യദോസ് തു യാദവാ ജാതാസ് തുർവസോർ യവനാഃ സുതാഃ
    ദ്രുഹ്യോർ അപി സുതാ ഭോജാ അനോസ് തു മ്ലേച്ഛ ജാതയഃ
27 പൂരോസ് തു പൗരവോ വംശോ യത്ര ജാതോ ഽസി പാർഥിവ
    ഇദം വർഷസഹസ്രായ രാജ്യം കാരയിതും വശീ