മഹാഭാരതം മൂലം/ആദിപർവം/അധ്യായം8

വിക്കിഗ്രന്ഥശാല സംരംഭത്തിൽ നിന്ന്
മഹാഭാരതം മൂലം/ആദിപർവം
രചന:വ്യാസൻ
അധ്യായം 8


1 [സ്]
     സ ചാപി ച്യവനോ ബ്രഹ്മൻ ഭാർഗവോ ഽജനയത് സുതം
     സുകന്യായാം മഹാത്മാനം പ്രമതിം ദീപ്തതേജസം
 2 പ്രമതിസ് തു രുരും നാമ ഘൃതാച്യാം സമജീജനത്
     രുരുഃ പ്രമദ്വരായാം തു ശുനകം സമജീജനത്
 3 തസ്യ ബ്രഹ്മൻ രുരോഃ സർവം ചരിതം ഭൂരി തേജസഃ
     വിസ്തരേണ പ്രവക്ഷ്യാമി തച് ഛൃണു ത്വം അശേഷതഃ
 4 ഋഷിർ ആസീൻ മഹാൻ പൂർവം തപോ വിദ്യാ സമന്വിതഃ
     സ്ഥൂലകേശ ഇതി ഖ്യാതഃ സർവഭൂതഹിതേ രതഃ
 5 ഏതസ്മിന്ന് ഏവ കാലേ തു മേനകായാം പ്രജജ്ഞിവാൻ
     ഗന്ധർവരാജോ വിപ്രർഷേ വിശ്വാവസുർ ഇതി ശ്രുതഃ
 6 അഥാപ്സരാ മേനകാ സാ തം ഗർഭം ഭൃഗുനന്ദന
     ഉത്സസർജ യഥാകാലം സ്ഥൂലകേശാശ്രമം പ്രതി
 7 ഉത്സൃജ്യ ചൈവ തം ഗർഭം നദ്യാസ് തീരേ ജഗാമ ഹ
     കന്യാം അമര ഗർഭാഭാം ജ്വലന്തീം ഇവ ച ശ്രിയാ
 8 താം ദദർശ സമുത്സൃഷ്ടാം നദീതീരേ മഹാൻ ഋഷിഃ
     സ്ഥൂലകേശഃ സ തേജസ്വീ വിജനേ ബന്ധുവർജിതാം
 9 സ താം ദൃഷ്ട്വാ തദാ കന്യാം സ്ഥൂലകേശോ ദ്വിജോത്തമഃ
     ജഗ്രാഹാഥ മുനിശ്രേഷ്ഠഃ കൃപാവിഷ്ടഃ പുപോഷ ച
     വവൃധേ സാ വരാരോഹാ തസ്യാശ്രമപദേ ശുഭാ
 10 പ്രമദാഭ്യോ വരാ സാ തു സർവരൂപഗുണാന്വിതാ
    തതഃ പ്രമദ്വരേത്യ് അസ്യാ നാമ ചക്രേ മഹാൻ ഋഷിഃ
11 താം ആശ്രമപദേ തസ്യ രുരുർ ദൃഷ്ട്വാ പ്രമദ്വരാം
    ബഭൂവ കില ധർമാത്മാ മദനാനുഗതാത്മവാൻ
12 പിതരം സഖിഭിഃ സോ ഽഥ വാചയാം ആസ ഭാർഗവഃ
    പ്രമതിശ് ചാഭ്യയാച് ഛ്രുത്വാ സ്ഥൂലകേശം യശസ്വിനം
13 തതഃ പ്രാദാത് പിതാ കന്യാം രുരവേ താം പ്രമദ്വരാം
    വിവാഹം സ്ഥാപയിത്വാഗ്രേ നക്ഷത്രേ ഭഗദൈവതേ
14 തതഃ കതി പയാഹസ്യ വിവാഹേ സമുപസ്ഥിതേ
    സഖീഭിഃ ക്രീഡതീ സാർധം സാ കന്യാ വരവർണിനീ
15 നാപശ്യത പ്രസുപ്തം വൈ ഭുജഗം തിര്യഗ് ആയതം
    പദാ ചൈനം സമാക്രാമൻ മുമൂർഷുഃ കാലചോദിതാ
16 സ തസ്യാഃ സമ്പ്രമത്തായാശ് ചോദിതഃ കാലധർമണാ
    വിഷോപലിപ്താൻ ദശനാൻ ഭൃശം അംഗേ ന്യപാതയത്
17 സാ ദഷ്ടാ സഹസാ ഭൂമൗ പതിതാ ഗതചേതനാ
    വ്യസുർ അപ്രേക്ഷണീയാപി പ്രേക്ഷണീയതമാകൃതിഃ
18 പ്രസുപ്തേവാഭവച് ചാപി ഭുവി സർപവിഷാർദിതാ
    ഭൂയോ മനോഹരതരാ ബഭൂവ തനുമധ്യമാ
19 ദദർശ താം പിതാ ചൈവ തേ ചൈവാന്യേ തപസ്വിനഃ
    വിചേഷ്ടമാനാം പതിതാം ഭൂതലേ പദ്മവർചസം
20 തതഃ സർവേ ദ്വിജ വരാഃ സമാജഗ്മുഃ കൃപാന്വിതാഃ
    സ്വസ്ത്യ് ആത്രേയോ മഹാജാനുഃ കുശികഃ ശംഖമേഖലഃ
21 ഭാരദ്വാജഃ കൗണകുത്സ ആർഷ്ടിഷേണോ ഽഥ ഗൗതമഃ
    പ്രമതിഃ സഹ പുത്രേണ തഥാന്യേ വനവാസിനഃ
22 താം തേ കന്യാം വ്യസും ദൃഷ്ട്വാ ഭുജഗസ്യ വിഷാർദിതാം
    രുരുദുഃ കൃപയാവിഷ്ടാ രുരുസ് ത്വ് ആർതോ ബഹിർ യയൗ