മഹാഭാരതം മൂലം/ആദിപർവം/അധ്യായം65

മഹാഭാരതം മൂലം/ആദിപർവം
രചന:വ്യാസൻ
അധ്യായം 65

1 [വ്]
     തതോ ഗച്ഛൻ മഹാബാഹുർ ഏകോ ഽമാത്യാൻ വിസൃജ്യ താൻ
     നാപശ്യദ് ആശ്രമേ തസ്മിംസ് തം ഋഷിം സംശിതവ്രതം
2 സോ ഽപശ്യമാനസ് തം ഋഷിം ശൂന്യം ദൃഷ്ട്വാ തം ആശ്രമം
     ഉവാച ക ഇഹേത്യ് ഉച്ചൈർ വനം സംനാദയന്ന് ഇവ
3 ശ്രുത്വാഥ തസ്യ തം ശബ്ദം കന്യാ ശ്രീർ ഇവ രൂപിണീ
     നിശ്ചക്രാമാശ്രമാത് തസ്മാത് താപസീ വേഷധാരിണീ
4 സാ തം ദൃഷ്ട്വൈവ രാജാനം ദുഃഷന്തം അസിതേക്ഷണാ
     സ്വാഗതം ത ഇതി ക്ഷിപ്രം ഉവാച പ്രതിപൂജ്യ ച
5 ആസനേനാർചയിത്വാ ച പാദ്യേനാർഘ്യേണ ചൈവ ഹി
     പപ്രച്ഛാനാമയം രാജൻ കുശലം ച നരാധിപം
6 യഥാവദ് അർചയിത്വാ സാ പൃഷ്ട്വാ ചാനാമയം തദാ
     ഉവാച സ്മയമാനേവ കിം കാര്യം ക്രിയതാം ഇതി
7 താം അബ്രവീത് തതോ രാജാ കന്യാം മധുരഭാഷിണീം
     ദൃഷ്ട്വാ സർവാനവദ്യാംഗീം യഥാവത് പ്രതിപൂജിതഃ
8 ആഗതോ ഽഹം മഹാഭാഗം ഋഷിം കണ്വം ഉപാസിതും
     ക്വ ഗതോ ഭഗവാൻ ഭദ്രേ തൻ മമാചക്ഷ്വ ശോഭനേ
9 [ഷക്]
     ഗതഃ പിതാ മേ ഭഗവാൻ ഫലാന്യ് ആഹർതും ആശ്രമാത്
     മുഹൂർതം സമ്പ്രതീക്ഷസ്വ ദ്രക്ഷ്യസ്യ് ഏനം ഇഹാഗതം
10 [വ്]
    അപശ്യമാനസ് തം ഋഷിം തയാ ചോക്തസ് തഥാ നൃപഃ
    താം ച ദൃഷ്ട്വാ വരാരോഹാം ശ്രീമതീം ചാരുഹാസിനീം
11 വിഭ്രാജമാനാം വപുഷാ തപസാ ച ദമേന ച
    രൂപയൗവന സമ്പന്നാം ഇത്യ് ഉവാച മഹീപതിഃ
12 കാസി കസ്യാസി സുശ്രോണി കിമർഥം ചാഗതാ വനം
    ഏവംരൂപഗുണോപേതാ കുതസ് ത്വം അസി ശോഭനേ
13 ദർശനാദ് ഏവ ഹി ശുഭേ ത്വയാ മേ ഽപഹൃതം മനഃ
    ഇച്ഛാമി ത്വാം അഹം ജ്ഞാതും തൻ മമാചക്ഷ്വ ശോഭനേ
14 ഏവം ഉക്താ തദാ കന്യാ തേന രാജ്ഞാ തദാശ്രമേ
    ഉവാച ഹസതീ വാക്യം ഇദം സുമധുരാക്ഷരം
15 കണ്വഷ്യാഹം ഭഗവതോ ദുഃഷന്ത ദുഹിതാ മതാ
    തപസ്വിനോ ധൃതിമതോ ധർമജ്ഞസ്യ യശസ്വിനഃ
16 [ദു]
    ഊർധ്വരേതാ മഹാഭാഗോ ഭഗവാംൽ ലോകപൂജിതഃ
    ചലേദ് ധി വൃത്താദ് ധർമോ ഽപി ന ചലേത് സംശിതവ്രതഃ
17 കഥം ത്വം തസ്യ ദുഹിതാ സംഭൂതാ വരവർണിനീ
    സംശയോ മേ മഹാൻ അത്ര തം മേ ഛേത്തും ഇഹാർഹസി
18 [ഷക്]
    യഥായം ആഗമോ മഹ്യം യഥാ ചേദം അഭൂത് പുരാ
    ശൃണു രാജൻ യഥാതത്ത്വം യഥാസ്മി ദുഹിതാ മുനേഃ
19 ഋഷിഃ കശ് ചിദ് ഇഹാഗമ്യ മമ ജന്മാഭ്യചോദയത്
    തസ്മൈ പ്രോവാച ഭഗവാൻ യഥാ തച് ഛൃണു പാർഥിവ
20 തപ്യമാനഃ കില പുരാ വിശ്വാമിത്രോ മഹത് തപഃ
    സുഭൃശം താപയാം ആസ ശക്രം സുരഗണേശ്വരം
21 തപസാ ദീപ്തവീര്യോ ഽയം സ്ഥാനാൻ മാ ച്യാവയേദ് ഇതി
    ഭീതഃ പുരന്ദരസ് തസ്മാൻ മേനകാം ഇദം അബ്രവീത്
22 ഗുണൈർ ദിവ്യൈർ അപ്സരസാം മേനകേ ത്വം വിശിഷ്യസേ
    ശ്രേയോ മേ കുരു കല്യാണി യത് ത്വാം വക്ഷ്യാമി തച് ഛൃണു
23 അസാവ് ആദിത്യസങ്കാശോ വിശ്വാമിത്രോ മഹാതപാഃ
    തപ്യമാനസ് തപോ ഘോരം മമ കമ്പയതേ മനഃ
24 മേനകേ തവ ഭാരോ ഽയം വിശ്വാമിത്രഃ സുമധ്യമേ
    സംശിതാത്മാ സുദുർധർഷ ഉഗ്രേ തപസി വർതതേ
25 സ മാം ന ച്യാവയേത് സ്ഥാനാത് തം വൈ ഗത്വാ പ്രലോഭയ
    ചര തസ്യ തപോവിഘ്നം കുരു മേ പ്രിയം ഉത്തമം
26 രൂപയൗവന മാധുര്യചേഷ്ടിത സ്മിതഭാഷിതൈഃ
    ലോഭയിത്വാ വരാരോഹേ തപസഃ സംനിവർതയ
27 [ം]
    മഹാതേജാഃ സ ഭഗവാൻ സദൈവ ച മഹാതപാഃ
    കോപനശ് ച തഥാ ഹ്യ് ഏനം ജാനാതി ഭഗവാൻ അപി
28 തേജസസ് തപസശ് ചൈവ കോപസ്യ ച മഹാത്മനഃ
    ത്വം അപ്യ് ഉദ്വിജസേ യസ്യ നോദ്വിജേയം അഹം കഥം
29 മഹാഭാഗം വസിഷ്ഠം യഃ പുത്രൈർ ഇഷ്ടൈർ വ്യയോജയത്
    ക്ഷത്രേ ജാതശ് ച യഃ പൂർവം അഭവദ് ബ്രാഹ്മണോ ബലാത്
30 ശൗചാർഥം യോ നദീം ചക്രേ ദുർഗമാം ബഹുഭിർ ജലൈഃ
    യാം താം പുണ്യതമാം ലോകേ കൗശികീതി വിദുർ ജനാഃ
31 ബഭാര യത്രാസ്യ പുരാ കാലേ ദുർഗേ മഹാത്മനഃ
    ദാരാൻ മതംഗോ ധർമാത്മാ രാജർഷിർ വ്യാധതാം ഗതഃ
32 അതീതകാലേ ദുർഭക്ഷേ യത്രൈത്യ പുനർ ആശ്രമം
    മുനിഃ പാരേതി നദ്യാ വൈ നാമ ചക്രേ തദാ പ്രഭുഃ
33 മതംഗം യാജയാം ചക്രേ യത്ര പ്രീതമനാഃ സ്വയം
    ത്വം ച സോമം ഭയാദ് യസ്യ ഗതഃ പാതും ശുരേശ്വര
34 അതി നക്ഷത്രവംശാംശ് ച ക്രുദ്ധോ നക്ഷത്രസമ്പദാ
    പ്രതി ശ്രവണപൂർവാണി നക്ഷത്രാണി സസർജ യഃ
35 ഏതാനി യസ്യ കർമാണി തസ്യാഹം ഭൃശം ഉദ്വിജേ
    യഥാ മാം ന ദഹേത് ക്രുദ്ധസ് തഥാജ്ഞാപയ മാം വിഭോ
36 തേജസാ നിർദഹേൽ ലോകാൻ കമ്പയേദ് ധരണീം പദാ
    സങ്ക്ഷിപേച് ച മഹാമേരും തൂർണം ആവർതയേത് തഥാ
37 താദൃശം തപസാ യുക്തം പ്രദീപ്തം ഇവ പാവകം
    കഥം അസ്മദ്വിധാ ബാലാ ജിതേന്ദ്രിയം അഭിസ്പൃശേത്
38 ഹുതാശനമുഖം ദീപ്തം സൂര്യചന്ദ്രാക്ഷി താരകം
    കാലജിഹ്വം സുരശ്രേഷ്ഠ കഥം അസ്മദ്വിധാ സ്പൃശേത്
39 യമശ് ച സോമശ് ച മഹർഷയശ് ച; സാധ്യാ വിശ്വേ വാലഖില്യാശ് ച സർവേ
    ഏതേ ഽപി യസ്യോദ്വിജന്തേ പ്രഭാവാത്; കസ്മാത് തസ്മാൻ മാദൃശീ നോദ്വിജേത
40 ത്വയൈവം ഉക്താ ച കഥം സമീപം; ഋഷേർ ന ഗച്ഛേയം അഹം സുരേന്ദ്ര
    രക്ഷാം തു മേ ചിന്തയ ദേവരാജ; യഥാ ത്വദർഥം രക്ഷിതാഹം ചരേയം
41 കാമം തു മേ മാരുതസ് തത്ര വാസഃ; പ്രക്രീഡിതായാ വിവൃണോതു ദേവ
    ഭവേച് ച മേ മന്മഥസ് തത്ര കാര്യേ; സഹായഭൂതസ് തവ ദേവപ്രസാദാത്
42 വനാച് ച വായുഃ സുരഭിഃ പ്രവായേത്; തസ്മിൻ കാലേ തം ഋഷിം ലോഭയന്ത്യാഃ
    തഥേത്യ് ഉക്ത്വാ വിഹിതേ ചൈവ തസ്മിംസ്; തതോ യയൗ സാശ്രമം കൗശികസ്യ