മഹാഭാരതം മൂലം/ആദിപർവം/അധ്യായം66

വിക്കിഗ്രന്ഥശാല സംരംഭത്തിൽ നിന്ന്
മഹാഭാരതം മൂലം/ആദിപർവം
രചന:വ്യാസൻ
അധ്യായം 66

1 [ഷക്]
     ഏവം ഉക്തസ് തയാ ശക്രഃ സന്ദിദേശ സദാഗതിം
     പ്രാതിഷ്ഠത തദാ കാലേ മേനകാ വായുനാ സഹ
 2 അഥാപശ്യദ് വരാരോഹാ തപസാ ദഗ്ധകിൽബിഷം
     വിശ്വാമിത്രം തപസ്യന്തം മേനകാ ഭീരുർ ആശ്രമേ
 3 അഭിവാദ്യ തതഃ സാ തം പ്രാക്രീഡദ് ഋഷിസംനിധൗ
     അപോവാഹ ച വാസോ ഽസ്യാ മാരുതഃ ശശിസംനിഭം
 4 സാഗച്ഛത് ത്വരിതാ ഭൂമിം വാസസ് തദ് അഭിലിംഗതീ
     ഉത്സ്മയന്തീവ സവ്രീഡം മാരുതം വരവർണിനീ
 5 ഗൃദ്ധാം വാസസി സംഭ്രാന്താം മേനകാം മുനിസത്തമഃ
     അനിർദേശ്യ വയോ രൂപാം അപശ്യദ് വിവൃതാം തദാ
 6 തസ്യാ രൂപഗുണം ദൃഷ്ട്വാ സ തു വിപ്രർഷഭസ് തദാ
     ചകാര ഭാവം സംസർഗേ തയാ കാമവശം ഗതഃ
 7 ന്യമന്ത്രയത ചാപ്യ് ഏനാം സാ ചാപ്യ് ഐച്ഛദ് അനിന്ദിതാ
     തൗ തത്ര സുചിരം കാലം വനേ വ്യഹരതാം ഉഭൗ
     രമമാണൗ യഥാകാമം യഥൈക ദിവസം തഥാ
 8 ജനയാം ആസ സ മുനിർ മേനകായാം ശകുന്തലാം
     പ്രസ്ഥേ ഹിമവതോ രമ്യേ മാലിനീം അഭിതോ നദീം
 9 ജാതം ഉത്സൃജ്യ തം ഗർഭം മേനകാ മാലിനീം അനു
     കൃതകാര്യാ തതസ് തൂർണം അഗച്ഛച് ഛക്ര സംസദം
 10 തം വനേ വിജനേ ഗർഭം സിംഹവ്യാഘ്ര സമാകുലേ
    ദൃഷ്ട്വാ ശയാനം ശകുനാഃ സമന്താത് പര്യവാരയൻ
11 നേമാം ഹിംസ്യുർ വനേ ബാലാം ക്രവ്യാദാ മാംസഗൃദ്ധിനഃ
    പര്യരക്ഷന്ത താം തത്ര ശകുന്താ മേനകാത്മജാം
12 ഉപസ്പ്രഷ്ടും ഗതശ് ചാഹം അപശ്യം ശയിതാം ഇമാം
    നിർജനേ വിപിനേ ഽരണ്യേ ശകുന്തൈഃ പരിവാരിതാം
    ആനയിത്വാ തതശ് ചൈനാം ദുഹിതൃത്വേ ന്യയോജയം
13 ശരീരകൃത് പ്രാണദാതാ യസ്യ ചാന്നാനി ഭുഞ്ജതേ
    ക്രമേണ തേ ത്രയോ ഽപ്യ് ഉക്താഃ പിതരോ ധർമനിശ്ചയേ
14 നിർജനേ ച വനേ യസ്മാച് ഛകുന്തൈഃ പരിരക്ഷിതാ
    ശകുന്തലേതി നാമാസ്യാഃ കൃതം ചാപി തതോ മയാ
15 ഏവം ദുഹിതരം വിദ്ധി മമ സൗമ്യ ശകുന്തലാം
    ശകുന്തലാ ച പിതരം മന്യതേ മാം അനിന്ദിതാ
16 ഏതദ് ആചഷ്ട പൃഷ്ടഃ സൻ മമ ജന്മ മഹർഷയേ
    സുതാം കണ്വസ്യ മാം ഏവം വിദ്ധി ത്വം മനുജാധിപ
17 കണ്വം ഹി പിതരം മന്യേ പിതരം സ്വം അജാനതീ
    ഇതി തേ കഥിതം രാജൻ യഥാവൃത്തം ശ്രുതം മയാ