മഹാഭാരതം മൂലം/ആദിപർവം/അധ്യായം50

മഹാഭാരതം മൂലം/ആദിപർവം
രചന:വ്യാസൻ
അധ്യായം 50

1 [ആ]
     സോമസ്യ യജ്ഞോ വരുണസ്യ യജ്ഞഃ; പ്രജാപതേർ യജ്ഞ ആസീത് പ്രയാഗേ
     തഥാ യജ്ഞോ ഽയം തവ ഭാരതാഗ്ര്യ; പാരിക്ഷിത സ്വസ്തി നോ ഽസ്തു പ്രിയേഭ്യഃ
2 ശക്രസ്യ യജ്ഞഃ ശതസംഖ്യ ഉക്തസ്; തഥാപരസ് തുല്യസംഖ്യഃ ശതം വൈ
     തഥാ യജ്ഞോ ഽയം തവ ഭാരതാഗ്ര്യ; പാരിക്ഷിത സ്വസ്തി നോ ഽസ്തു പ്രിയേഭ്യഃ
3 യമസ്യ യജ്ഞോ ഹരി മേധസശ് ച; യഥാ യജ്ഞോ രന്തി ദേവസ്യ രാജ്ഞഃ
     തഥാ യജ്ഞോ ഽയം തവ ഭാരതാഗ്ര്യ; പാരിക്ഷിത സ്വസ്തി നോ ഽസ്തു പ്രിയേഭ്യഃ
4 ഗയസ്യ യജ്ഞഃ ശശബിന്ദോശ് ച രാജ്ഞോ; യജ്ഞസ് തഥാ വൈശ്രവണസ്യ രാജ്ഞഃ
     തഥാ യജ്ഞോ ഽയം തവ ഭാരതാഗ്ര്യ; പാരിക്ഷിത സ്വസ്തി നോ ഽസ്തു പ്രിയേഭ്യഃ
5 നൃഗസ്യ യജ്ഞസ് ത്വ് അജമീഢസ്യ ചാസീദ്; യഥാ യജ്ഞോ ദാശരഥേശ് ച രാജ്ഞഃ
     തഥാ യജ്ഞോ ഽയം തവ ഭാരതാഗ്ര്യ; പാരിക്ഷിത സ്വസ്തി നോ ഽസ്തു പ്രിയേഭ്യഃ
6 യജ്ഞഃ ശ്രുതോ നോ ദിവി ദേവ സൂനോർ; യുധിഷ്ഠിരസ്യാജമീഢസ്യ രാജ്ഞഃ
     തഥാ യജ്ഞോ ഽയം തവ ഭാരതാഗ്ര്യ; പാരിക്ഷിത സ്വസ്തി നോ ഽസ്തു പ്രിയേഭ്യഃ
7 കൃഷ്ണസ്യ യജ്ഞഃ സത്യവത്യാഃ സുതസ്യ; സ്വയം ച കർമ പ്രചകാര യത്ര
     തഥാ യജ്ഞോ ഽയം തവ ഭാരതാഗ്ര്യ; പാരിക്ഷിത സ്വസ്തി നോ ഽസ്തു പ്രിയേഭ്യഃ
8 ഇമേ ഹി തേ സൂര്യഹുതാശവർചസഃ; സമാസതേ വൃത്രഹണഃ ക്രതും യഥാ
     നൈഷാം ജ്ഞാനം വിദ്യതേ ജ്ഞാതും അദ്യ; ദത്തം യേഭ്യോ ന പ്രണശ്യേത് കഥം ചിത്
9 ഋത്വിക് സമോ നാസ്തി ലോകേഷു ചൈവ; ദ്വൈപായനേനേതി വിനിശ്ചിതം മേ
     ഏതസ്യ ശിഷ്യാ ഹി ക്ഷിതിം ചരന്തി; സർവർവിജഃ കർമസു സ്വേഷു ദക്ഷാഃ
10 വിഭാവസുശ് ചിത്രഭാനുർ മഹാത്മാ; ഹിരണ്യരേതാ വിശ്വഭുക് കൃഷ്ണ വർത്മാ
    പ്രദക്ഷിണാവർതശിഖഃ പ്രദീപ്തോ; ഹവ്യം തവേദം ഹുതഭുഗ് വഷ്ടി ദേവഃ
11 നേഹ ത്വദന്യോ വിദ്യതേ ജീവലോകേ; സമോ നൃപഃ പാലയിതാ പ്രജാനാം
    ധൃത്യാ ച തേ പ്രീതമനാഃ സദാഹം; ത്വം വാ രാജാ ധർമരാജോ യമോ വാ
12 ശക്രഃ സാക്ഷാദ് വജ്രപാണിർ യഥേഹ; ത്രാതാ ലോകേ ഽസ്മിംസ് ത്വം തഥേഹ പ്രജാനാം
    മതസ് ത്വം നഃ പുരുഷേന്ദ്രേഹ ലോകേ; ന ച ത്വദന്യോ ഗൃഹപതിർ അസ്തി യജ്ഞേ
13 ഖട്വാംഗനാഭാഗ ദിലീപ കൽപോ; യയാതി മാന്ധാതൃസമപ്രഭാവഃ
    ആദിത്യതേജഃ പ്രതിമാനതേജാ; ഭീഷ്മോ യഥാ ഭ്രാജസി സുവ്രതസ് ത്വം
14 വാൽമീകിവത് തേ നിഭൃതം സുധൈര്യം; വസിഷ്ഠവത് തേ നിയതശ് ച കോപഃ
    പ്രഭുത്വം ഇന്ദ്രേണ സമം മതം മേ; ദ്യുതിശ് ച നാരായണവദ് വിഭാതി
15 യമോ യഥാ ധർമവിനിശ്ചയജ്ഞഃ; കൃഷ്ണോ യഥാ സർവഗുണോപപന്നഃ
    ശ്രിയാം നിവാസോ ഽസി യഥാ വസൂനാം; നിധാന ഭൂതോ ഽസി തഥാ ക്രതൂനാം
16 ദംഭോദ്ഭവേനാസി സമോ ബലേന; രാമോ യഥാ ശസ്ത്രവിദ് അസ്ത്രവിച് ച
    ഔർവ ത്രിതാഭ്യാം അസി തുല്യതേജാ; ദുഷ്പ്രേക്ഷണീയോ ഽസി ഭഗീരഥോ വാ
17 [സ്]
    ഏവം സ്തുതാഃ സർവ ഏവ പ്രസന്നാ; രാജാ സദസ്യാ ഋത്വിജോ ഹവ്യവാഹഃ
    തേഷാം ദൃഷ്ട്വാ ഭാവിതാനീംഗിതാനി; പ്രോവാച രാജാ ജനമേജയോ ഽഥ