മഹാഭാരതം മൂലം/ആദിപർവം/അധ്യായം35
| ←അധ്യായം34 | മഹാഭാരതം മൂലം/ആദിപർവം രചന: അധ്യായം 35 |
അധ്യായം36→ |
1 [സ്]
ഏലാപത്രസ്യ തു വചഃ ശ്രുത്വാ നാഗാ ദ്വിജോത്തമ
സർവേ പ്രഹൃഷ്ടമനസഃ സാധു സാധ്വ് ഇത്യ് അപൂജയൻ
2 തതഃ പ്രഭൃതി താം കന്യാം വാസുകിഃ പര്യരക്ഷത
ജരത്കാരും സ്വസാരം വൈ പരം ഹർഷം അവാപ ച
3 തതോ നാതിമഹാൻ കാലഃ സമതീത ഇവാഭവത്
അഥ ദേവാസുരാഃ സർവേ മമന്ഥുർ വരുണാലയം
4 തത്ര നേത്രം അഭൂൻ നാഗോ വാസുകിർ ബലിനാം വരഃ
സമാപ്യൈവ ച തത് കർമ പിതാമഹം ഉപാഗമൻ
5 ദേവാ വാസുകിനാ സാർധം പിതാമഹം അഥാബ്രുവൻ
ഭഗവഞ് ശാപഭീതോ ഽയം വാസുകിസ് തപ്യതേ ഭൃശം
6 തസ്യേദം മാനസം ശല്യം സമുദ്ധർതും ത്വം അർഹസി
ജനന്യാഃ ശാപജം ദേവ ജ്ഞാതീനാം ഹിതകാങ്ക്ഷിണഃ
7 ഹിതോ ഹ്യ് അയം സദാസ്മാകം പ്രിയകാരീ ച നാഗരാട്
കുരു പ്രസാദം ദേവേശ ശമയാസ്യ മനോ ജ്വരം
8 [ബ്ര്]
മയൈവൈതദ് വിതീർണം വൈ വചനം മനസാമരാഃ
ഏലാപത്രേണ നാഗേന യദ് അസ്യാഭിഹിതം പുരാ
9 തത് കരോത്വ് ഏഷ നാഗേന്ദ്രഃ പ്രാപ്തകാലം വചസ് തഥാ
വിനശിഷ്യന്തി യേ പാപാ ന തു യേ ധർമചാരിണഃ
10 ഉത്പന്നഃ സ ജരത് കാരുസ് തപസ്യ് ഉഗ്രേ രതോ ദ്വിജഃ
തസ്യൈഷ ഭഗിനീം കാലേ ജരത്കാരും പ്രയച്ഛതു
11 യദ് ഏലാപത്രേണ വചസ് തദോക്തം ഭുജഗേന ഹ
പന്നഗാനാം ഹിതം ദേവാസ് തത് തഥാ ന തദ് അന്യഥാ
12 [സ്]
ഏതച് ഛ്രുത്വാ സ നാഗേന്ദ്രഃ പിതാമഹവചസ് തദാ
സർപാൻ ബനൂഞ് ജരത്കാരൗ നിത്യയുക്താൻ സമാദധത്
13 ജരത്കാരുർ യദാ ഭാര്യാം ഇച്ഛേദ് വരയിതും പ്രഭുഃ
ശീഘ്രം ഏത്യ മമാഖ്യേയം തൻ നഃ ശ്രേയോ ഭവിഷ്യതി