മഹാഭാരതം മൂലം/ആദിപർവം/അധ്യായം32

മഹാഭാരതം മൂലം/ആദിപർവം
രചന:വ്യാസൻ
അധ്യായം 32

1 [ഷ്]
     ജാതാ വൈ ഭുജഗാസ് താത വീര്യവന്തോ ദുരാസദാഃ
     ശാപം തം ത്വ് അഥ വിജ്ഞായ കൃതവന്തോ നു കിം പരം
2 [സ്]
     തേഷാം തു ഭഗവാഞ് ശേഷസ് ത്യക്ത്വാ കദ്രൂം മഹായശാഃ
     തപോ വിപുലം ആതസ്ഥേ വായുഭക്ഷോ യതവ്രതഃ
3 ഗന്ധമാദനം ആസാദ്യ ബദര്യാം ച തപോ രതഃ
     ഗോകർണേ പുഷ്കരാരണ്യേ തഥാ ഹിമവതസ് തടേ
4 തേഷു തേഷു ച പുണ്യേഷു തീർഥേഷ്വ് ആയതനേഷു ച
     ഏകാന്തശീലീ നിയതഃ സതതം വിജിതേന്ദ്രിയഃ
5 തപ്യമാനം തപോ ഘോരം തം ദദർശ പിതാമഹഃ
     പരിശുഷ്കമാംസത്വക് സ്നായും ജടാചീരധരം പ്രഭും
6 തം അബ്രവീത് സത്യധൃതിം തപ്യമാനം പിതാമഹഃ
     കിം ഇദം കുരുഷേ ശേഷപ്രജാനാം സ്വസ്തി വൈ കുരു
7 ത്വം ഹി തീവ്രേണ തപസാ പ്രജാസ് താപയസേ ഽനഘ
     ബ്രൂഹി കാമം ച മേ ശേഷയത് തേ ഹൃദി ചിരം സ്ഥിതം
8 [ഷേസ]
     സോദര്യാ മമ സർവേ ഹി ഭ്രാതരോ മന്ദചേതസഃ
     സഹ തൈർ നോത്സഹേ വസ്തും തദ് ഭവാൻ അനുമന്യതാം
9 അഭ്യസൂയന്തി സതതം പരസ്പരം അമിത്രവത്
     തതോ ഽഹം തപ ആതിഷ്ഠേ നൈതാൻ പശ്യേയം ഇത്യ് ഉത
10 ന മർഷയന്തി സതതം വിനതാം സസുതാം ച തേ
    അസ്മാകം ചാപരോ ഭ്രാതാ വൈനതേയഃ പിതാമഹ
11 തം ച ദ്വിഷന്തി തേ ഽത്യർഥം സ ചാപി സുമഹാബലഃ
    വരപ്രദാനാത് സ പിതുഃ കശ്യപസ്യ മഹാത്മനഃ
12 സോ ഽഹം തപഃ സമാസ്ഥായ മോക്ഷ്യാമീദം കലേവരം
    കഥം മേ പ്രേത്യ ഭാവേ ഽപി ന തൈഃ സ്യാത് സഹ സംഗമഃ
13 [ബ്രഹ്മാ]
    ജാനാമി ശേഷസർവേഷാം ഭ്രാതൄണാം തേ വിചേഷ്ടിതം
    മാതുശ് ചാപ്യ് അപരാധാദ് വൈ ഭ്രാതൄണാം തേ മഹദ് ഭയം
14 കൃതോ ഽത്ര പരിഹാരശ് ച പൂർവം ഏവ ഭുജംഗമ
    ഭ്രാതൄണാം തവ സർവേഷാം ന ശോകം കർതും അർഹസി
15 വൃണീഷ്വ ച വരം മത്തഃ ശേഷയത് തേ ഽഭികാങ്ക്ഷിതം
    ദിത്സാമി ഹി വരം തേ ഽദ്യ പ്രീതിർ മേ പരമാ ത്വയി
16 ദിഷ്ട്യാ ച ബുദ്ധിർ ധർമേ തേ നിവിഷ്ടാ പന്നഗോത്തമ
    അതോ ഭൂയശ് ച തേ ബുദ്ധിർ ധർമേ ഭവതു സുസ്ഥിരാ
17 [ഷേസ]
    ഏഷ ഏവ വരോ മേ ഽദ്യ കാങ്ക്ഷിതഃ പ്രപിതാമഹ
    ധർമേ മേ രമതാം ബുദ്ധിഃ ശമേ തപസി ചേശ്വര
18 [ബ്ര്]
    പ്രീതോ ഽസ്മ്യ് അനേന തേ ശേഷദമേന പ്രശമേന ച
    ത്വയാ ത്വ് ഇദം വചഃ കാര്യം മന്നിയോഗാത് പ്രജാഹിതം
19 ഇമാം മഹീം ശൈലവനോപപന്നാം; സസാഗരാം സാകര പത്തനാം ച
    ത്വം ശേഷസമ്യക് ചലിതാം യഥാവത്; സംഗൃഹ്യ തിഷ്ഠസ്വ യഥാചലാ സ്യാത്
20 [ഷേസ]
    യഥാഹ ദേവോ വരദഃ പ്രജാപതിർ; മഹീപതിർ ഭൂതപതിർ ജഗത്പതിഃ
    തഥാ മഹീം ധാരയിതാസ്മി നിശ്ചലാം; പ്രയച്ഛ താം മേ ശിരസി പ്രജാപതേ
21 [ബ്ര്]
    അധോ മഹീം ഗച്ഛ ഭുജംഗമോത്തമ; സ്വയം തവൈഷാ വിവരം പ്രദാസ്യതി
    ഇമാം ധരാം ധാരയതാ ത്വയാ ഹി മേ; മഹത് പ്രിയം ശേഷകൃതം ഭവിഷ്യതി
22 [സ്]
    തഥേതി കൃത്വാ വിവരം പ്രവിശ്യ സ; പ്രഭുർ ഭുവോ ഭുജഗ വരാഗ്രജഃ സ്ഥിതഃ
    ബിഭർതി ദേവീം ശിരസാ മഹീം ഇമാം; സമുദ്രനേമിം പരിഗൃഹ്യ സർവതഃ
23 [ബ്ര്]
    ശേഷോ ഽസി നാഗോത്തമ ധർമദേവോ; മഹീം ഇമാം ധാരയസേ യദ് ഏകഃ
    അനന്ത ഭോഗഃ പരിഗൃഹ്യ സർവാം; യഥാഹം ഏവം ബലഭിദ് യഥാ വാ
24 [സ്]
    അധോ ഭൂമേർ വസത്യ് ഏവം നാഗോ ഽനന്തഃ പ്രതാപവാൻ
    ധാരയൻ വസുധാം ഏകഃ ശാസനാദ് ബ്രഹ്മണോ വിഭുഃ
25 സുപർണം ച സഖായം വൈ ഭഗവാൻ അമരോത്തമഃ
    പ്രാദാദ് അനന്തായ തദാ വൈനതേയം പിതാമഹഃ