നമ്മുടെ രാജ്യത്തിന്റെ തലസ്ഥാനമാണല്ലോ, ഡെൽഹി. വളരെക്കാലം മുമ്പു് ആ പ്രദേശത്ത് ഹസ്തിനപുരം എന്നൊരു നഗരം ഉണ്ടായിരുന്നു. ഹസ്തിനപുരത്തിലെ രാജകുമാരന്മാരായിരുന്നു പഞ്ചപാണ്ഡവന്മാർ. അവരുടെ ചെറുപ്പത്തിൽ തന്നെ അച്ഛനായ പാണ്ഡു മരിച്ചു പോയി. വലിയച്ഛനായ ധൃതരാഷ്ട്രരാണു് അവരെ വളൎത്തിപ്പോന്നതു് അദ്ദേഹത്തിനും നൂററു മക്കളുണ്ടായിരുന്നു. ആ നൂറുവരും ഈ ഐവരും തമ്മിൽ കുട്ടിക്കാലം മുതൽക്കേ കലഹം തുടങ്ങി. കുട്ടികൾ വളരുന്തോറും കലഹം മൂത്തു വന്നതേ ഉള്ളൂ. ഒടുവിൽ, അമ്മയായ കുന്തീദേവിയോടുകൂടി നാടുവിട്ടുപോന്നു്, ദൂരെ ഏക ചക്ര എന്ന രാജ്യത്തു് പാണ്ഡവന്മാൎക്കു് ഒളിച്ചു താമസിക്കേണ്ടിവന്നു.
ബ്രാഹ്മണരെന്ന ഭാവത്തിൽ അവർ ഒരു ബ്രാഹ്മണഗൃഹത്തിൽ പാൎത്തു. അഞ്ചുപേരും ഇരന്നാണു് നിത്യവൃത്തി കഴിച്ചുപോന്നതു്. ഇവരിൽവച്ച് ഏറ്റവും കൂടുതൽ ബലം ഭീമസേനന്നാണ്; അതിനു തക്കവണ്ണം അയാൾക്കു ധാരാളം ഉണ്ണുകയും വേണം. ഇരന്നാൽ അത്രകൊയ്ന്നും കിട്ടില്ലല്ലോ. അതുകൊണ്ടു്
