താൾ:Karthaveeryarjunavijayam.djvu/24

പലനാളിങ്ങനെ പട്ടിണിയിട്ടും

പലരും കണ്ടുടനാനകളിച്ചും

വലയിൽപ്പെട്ട കുരങ്ങുകണക്കേ

വലയണമെന്നേ മതിയാവുള്ളൂ;

കൊലചെയ്താൽ പുനരന്തകനവനെ

വലയ്ക്കുന്നതിഹ നമുക്കറിയാമോ?"

" അതു നേരാണിഹ നമ്മെക്കാളും

അതികാരുണ്യം പെരുതു തനിക്ക്; "

രാവണമുറവിളി കേട്ടിട്ടിങ്ങനെ

രാവും പകലും ഘോഷിക്കുന്നു;

ദേവകളെത്ര പ്രസാദിക്കുന്നു;

ദേവസ്ത്രീകൾക്കതിലും മോദം;

ഓജസ്സും തേജസ്സും പലനാ-

ളായുസ്സും ശ്രേയസ്സും വരുവതി-

നന്തണവരരും മുനിവരരും ദിശി

സന്തതവും ഹേഹയനൃപവരനെ-

പ്പാരമനുഗ്രഹമേകി നടന്നു

പാരിലതിശ്രമമേറിയിരുന്നഥ

ഭീതികലർന്ന ജഗത്ത്രയവാസികൾ

ഭീതിവെടിഞ്ഞുവസിച്ചീടുന്നു

ദേഹം മെലിഞ്ഞു പാരം കാരാഗൃഹംതന്നുള്ളിൽ

ദാഹം വിശപ്പുകൊണ്ടും മോഹം വളർന്നു തത്ര

സ്നേഹം തരിമ്പുമുള്ള ദേഹങ്ങളാരുമില്ല

ആഹന്ത കഷ്ടം ! ദശകണ്ഠന്റെ വർത്തമാനം

സ്നാനവുമില്ല മദ്യപാനവുമില്ല പാരം

നാണവും പൂണ്ടു ദേഹക്ഷീണവുമകപ്പെട്ടു

കൂറില്ലാത്തവരോടു ചോറുമേടിച്ചുതിന്നു

കീറത്തുണിയുടുത്തു ചേറുമണിഞ്ഞങ്ങനെ

ആറുമാസം കഴിഞ്ഞിട്ടാരുമൊരുത്തൻ കുറ്റം

തീരുവാൻ ശ്രമിക്കുന്നില്ലേറുന്നു സന്താപങ്ങൾ;

പിണ്ഡമുരുട്ടിയോരോ കിണ്ണത്തിൽ വച്ചുകൊണ്ടു

പെണ്ണുങ്ങൾ വന്നുനിന്നീവണ്ണം പറഞ്ഞീടുന്നു;

"ലങ്കാധിപതേ! നിന്റെ കാൽമേൽ കിടക്കും നല്ല

ശൃംഖല കിലുങ്ങാതെ ചിങ്കുകളിച്ചെന്നാകിൽ

പാക്കു വെറ്റില നല്ല തൂക്കുപുകയിലയും

പാർക്കാതെ തരുന്നുണ്ടു ഭോഷ്ക്കല്ല പംക്തികണ്ഠ!'

പത്തു മുഖങ്ങൾകൊണ്ടു പത്തു പദങ്ങൾ പാടി

തിത്തിത്തൈ എന്നു ചാടി നൃത്തംവയ്ക്ക രാവണ!