ഊണും കഴിഞ്ഞിരവിലൊന്നു മുറുക്കി മിന്നൽ-
നാണിച്ചിടുന്ന മടവാരൊടുമൊത്തു മച്ചിൽ
വാണീടുമപ്പൊഴവളുള്ളിൽ നിന്നപ്പ,തിന്ന-
താണെന്നറിഞ്ഞവളൊടിങ്ങനെ ഞാൻ പറഞ്ഞു. 1
നാൾതോറുമിങ്ങനെ പറഞ്ഞതുതന്നെ വീണ്ടു-
മോതുന്നൊരിപ്പണിയിനിക്കഴിയില്ലിനിയ്ക്ക്
നീതാനുറങ്ങുവതിനുള്ളിലൊരറ്റമെത്തീ-
ടാതുള്ളതൊന്നുമിനി ഞാനുരചെയ്കയില്ല. 2
തെറ്റില്ലിനിക്കു പറയുന്നതു നല്ലതായാൽ
പറ്റില്ലുറക്കമൊരുനാളിലുമെന്നിവണ്ണം
കുറ്റം‌പറഞ്ഞു വെറുതേ കളയേണ്ട നേരം
കറ്റക്കരിംകുഴലി തെറ്റിവനേറ്റു പോരെ ? 3
കേട്ടാലുമാവെടിമരുന്നു വരുന്നതിൻമു-
മ്പൊട്ടല്ല പോരിൽ വിരുതാർന്നിടുവാൻ ഞെരുക്കം
കട്ടിത്തമേറുമുട്ടൽ പോര മുറയ്ക്കു കച്ച-
കെട്ടും പയറ്റുമെവനും പതിവായിരുന്നൂ. 4
മന്നിങ്കൽ മറ്റെവിടെയും തിരിയാത്തമട്ടാ-
ണന്നാളിലീവക പയറ്റു കടത്തനാട്ട്
ഒന്നൂറതാമരിയവീടൊടെതിർത്ത പാലാ-
ട്ടെന്നുള്ള നല്ല തറവാടവിടത്തിലല്ലോ. 5
മുമ്പോതിയോരവിടെ നല്ല കറുപ്പു മറ്റോർ
തേൻപെയ്തിടുന്നമൊഴി, നായരുമായിരുന്നു;
മുമ്പേതിനും കരുതിനിയ്ക്കതിനിയ്ക്കിവണ്ണ-
മമ്പോ! തിരക്കുമവർതമ്മിൽ മുഴുത്തിരുന്നു. 6
കോമപ്പനെന്നൊരുവനന്നുളവായി പാലാ-
ട്ടാ മൂപരോടമരിടുന്നവർ തോറ്റു മണ്ടും
നാമിപ്പൊഴൂക്കുടയ തോക്കുകൾകൊണ്ടെടുക്കും
ശീമപ്പയറ്റുമുറയന്നറിവില്ലയല്ലോ. 7
താൾ:കോമപ്പൻ.djvu/1
ഈ താളിൽ തെറ്റുതിരുത്തൽ വായന നടന്നിരിക്കുന്നു
കോമപ്പൻ
