വനമാല/എഡ്വാർഡ് ചക്രവർത്തിയുടെ പ്രിയപ്പെട്ട പ്രാർത്ഥന

വിക്കിഗ്രന്ഥശാല സംരംഭത്തിൽ നിന്ന്
(എഡ്വാർഡ് ചക്രവർത്തിയുടെ പ്രിയപ്പെട്ട പ്രാർത്ഥന (കുമാരനാശാൻ) എന്ന താളിൽ നിന്നും തിരിച്ചുവിട്ടതു പ്രകാരം)
Jump to navigation Jump to search

കുമാരനാശാന്റെ
കൃതികൾ

കുമാരനാശാൻ
കാവ്യങ്ങൾ

വീണ പൂവ് · ഒരു സിംഹപ്രസവം
നളിനി · ലീല
ബാലരാമായണം · ശ്രീബുദ്ധചരിതം
ഗ്രാമവൃക്ഷത്തിലെ കുയിൽ · പ്രരോദനം
ചിന്താവിഷ്ടയായ സീത · ദുരവസ്ഥ
ചണ്ഡാലഭിക്ഷുകി · കരുണ

കവിതാസമാഹാരം

പുഷ്പവാടി · വനമാല
മണിമാല

വിവർത്തനം

സൗന്ദര്യലഹരി
ഭാഷാമേഘസന്ദേശം
രാജയോഗം

സ്തോത്ര കൃതികൾ

സ്തോത്ര കൃതികൾ

മറ്റു രചനകൾ

മറ്റു രചനകൾ


വനമാല എന്ന കവിതാസമാഹാരത്തിൽ നിന്ന്

അൻ‌പിടെന്നരികത്തിലന്തി ജവമായ്
     വന്നെത്തിടുന്നു വിഭോ!
വമ്പിച്ചോരിരുൾ മുത്തിടു,ന്നരികിൽ
     വന്നൻ‌പോടുമൻ‌പീടു നീ;
കമ്പം ബാന്ധവർ തേടവേ, സുഖമശേഷം
     കൈവെടിഞ്ഞീടവേ-
യെൻ‌പോറ്റി! ഗതിയറ്റവർക്കു ഗതിയേ!-
     യെൻ‌മുൻപിലൻപീടു നീ.

ജീവൻ‌തൻ ചെറുതാം ദിനം ഝടിതി
     പാഞ്ഞന്തം ഗമിക്കുന്നിതാ
ഭൂവിൽ ഭൂതികൾ മങ്ങിടുന്നതിലെഴും
     പ്രഖ്യാതി മായുന്നിതേ,
ഭാവങ്ങൾക്കു വികാരവും വിലയവും
     താൻ കാണ്മതെല്ലാടവും,
ദേവാധീശ്വര! നിർവ്വികാര! തുണയാ-
     യെൻ‌മുമ്പിലൻ‌പീടു നീ!

വന്നീടൊല്ല ഭയങ്കരാകൃതിയെഴും
     രാജാധിരാജത്വമാർ-
ന്നെ,ന്നാൽ നന്മയുമൻ‌പുമായ്, കരയുഗത്തിൽ
     ശാന്തി കയ്യേന്തിയും,
എന്നല്ലശ്രുവൊടും വിപത്തി,ലലി-
     വർത്ഥിച്ചാലെഴും ഹൃത്തൊടും
വന്നാമട്ടയി! ദീനബാന്ധവമണേ!-
     യെൻ‌മുമ്പിലൻപീടു നീ.

പോകും നാഴികതോറുമെന്നരികിൽ നീ-
     യെത്താൻ കൊതിക്കുന്നു ഞാ-
നാകുന്നേതിനു മോഹശക്തിയെയകറ്റാൻ
     നിൻ‌കൃപയ്ക്കെന്നിയേ?
ഏകൻ നിന്നൊടു തുല്യനാരിവനു
     നേതാ!വാവിഭോ! താങ്ങുമാ-
റാകാം ദുർദ്ദിനമോയിനിസ്സുദിനമോ-
     യെന്മുമ്പിലൻപീടു നീ.

പേടിക്കാ രിപുതന്നെ ഞാനരികി-
     ലാശിസ്സിന്നു നീ വാഴവേ
തേടാ കഷ്ടത ഭാരവും കദന-
     മേകാ തെല്ലു കണ്ണീരുമേ!
കേടേകും യമദംഷ്ട്രയെങ്ങു! മൃതിയെങ്ങോ
     നിൻ തദീയം ജയം?
മൂടുന്നെൻ മിഴി മുമ്പു നിന്നഭയഹസ്തം
     പോക്കി നിൽക്കീശ! നീ.

നിന്നീടെൻ തിരുമേനിതാൻ മറയുമെൻ
     കൺ‌മുമ്പു കണ്ടീടുമാ-
റെന്നല്ലായിരുളുടെ മിന്നുകയെനി-
     ക്കായ് ദ്യോവൂ കാട്ടീടുക
വന്നു സ്വർഗ്ഗമതിന്നുഷസ്സ,വനി മായാ-
     ച്ഛായ മായുന്നുതേ-
യൊന്നായ് വാഴുകിലും, മരിക്കിലുമടു-
     ത്തൻപീടുകെൻ പോറ്റി നീ
                                                  - 1909

വനമാല എന്ന സമാഹാരത്തിലെ മറ്റു കവിതകൾ