വാക്യവൃത്തി
| വാക്യവൃത്തിഃ രചന: |
വാക്യവൃത്തിഃ
[തിരുത്തുക]- സർഗസ്ഥിതിപ്രലയഹേതുമചിന്ത്യശക്തിം വിശ്വേശ്വരം വിദിതവിശ്വമനന്തമൂർതിം
- നിർമുക്തബന്ധനമപാരസുഖാംബുരാശിം ശ്രീവല്ലഭം വിമലബോധഘനം നമാമി 1
- യസ്യ പ്രസാദാദഹമേവ വിഷ്ണുർമയ്യേവ സർവം പരികൽപിതം ച
- ഇത്ഥം വിജാനാമി സദാത്മരൂപം തസ്യാംഘ്രിപദ്മം പ്രണതോഽസ്മി നിത്യം 2
- താപത്രയാർകസന്തപ്തഃ കശ്ചിദുദ്വിഗ്നമാനസഃ
- ശമാദിസാധനൈര്യുക്തഃ സദ്ഗുരും പരിപൃച്ഛതി 3
- അനായാസേന യേനാസ്മാന്മുച്ച്യേയം ഭവബന്ധനാത്
- തന്മേ സങ്ക്ഷിപ്യ ഭഗവൻകേവലം കൃപയാ വദ 4
- ഗുരുരുവാച
- സാധ്വീതേ വചനവ്യക്തിഃ പ്രതിഭാതി വദാമി തേ
- ഇദം തദിതി വിസ്പഷ്ടം സാവധാനമനാഃ ശൃണു 5
- തത്ത്വമസ്യാദിവാക്യോത്ഥം യജ്ജീവപരമാത്മനോഃ
- താദാത്മ്യവിഷയം ജ്ഞാനം തദിദം മുക്തിസാധനം 6
- ശിഷ്യ ഉവാച
- കോ ജീവഃ കഃ പരശ്ചാത്മാ താദാത്മ്യം വാ കഥം തയോഃ
- തത്ത്വമസ്യാദിവാക്യം വാ കഥം തത്പ്രതിപാദയേത് 7
- ഗുരുരുവാച
- അത്ര ബ്രൂമഃ സമാധാനം കോഽന്യോ ജീവസ്ത്വമേവ ഹി
- യസ്ത്വം പൃച്ഛസി മാം കോഽഹം ബ്രഹ്മൈവാസി ന സംശയഃ 8
- ശിഷ്യ ഉവാച
- പദാർഥമേവ ജാനാമി നാദ്യാപി ഭഗവൻസ്ഫുടം
- അഹം ബ്രഹ്മേതി വാക്യാർഥം പ്രതിപദ്യേ കഥം വദ 9
- ഗുരുരുവാച
- സത്യമാഹ ഭവാനത്ര വിഗാനം നൈവ വിദ്യതേ (വിജ്ഞാനം)
- ഹേതുഃ പദാർഥബോധോ ഹി വാക്യാർഥാവഗതേരിഹ 10
- അന്തഃകരണതദ്വൃത്തിസാക്ഷിചൈതന്യവിഗ്രഹഃ
- ആനന്ദരൂപഃ സത്യഃ സൻകിം നാത്മാനം പ്രപദ്യസേ 11
- സത്യാനന്ദസ്വരൂപം ധീസാക്ഷിണം ബോധവിഗ്രഹം
- ചിന്തയാത്മതയാ നിത്യം ത്യക്ത്വാ ദേഹാദിഗാം ധിയം 12
- രൂപാദിമാന്യതഃ പിണ്ഡസ്തതോ നാത്മാ ഘടാദിവത്
- വിയദാദിമഹാഭൂതവികാരത്വാച്ച കുംഭവത് 13
- അനാത്മാ യദി പിണ്ഡോഽയമുക്തഹേതുബലാന്മതഃ
- കരാമലകവത്സാക്ഷാദാത്മാനം പ്രതിപാദയ 14
- ഘടദ്രഷ്ടാ ഘടാദ്ഭിന്നഃ സർവഥാ ന ഘടോ യഥാ
- ദേഹദ്രഷ്ടാ തഥാ ദേഹോ നാഹമിത്യവധാരയ 15
- ഏവമിന്ദ്രിയദൃങ്നാഹമിന്ദ്രിയാണീതി നിശ്ചിനു
- മനോബുദ്ധിസ്തഥാ പ്രാണോ നാഹമിത്യവധാരയ 16
- സംഘാതോഽപി തഥാ നാഹമിതി ദൃശ്യവിലക്ഷണം
- ദ്രഷ്ടാരമനുമാനേന നിപുണം സമ്പ്രധാരയ 17
- ദേഹേന്ദ്രിയാദയോ ഭാവാ ഹാനാദിവ്യാപൃതിക്ഷമാഃ
- യസ്യ സന്നിധിമാത്രേണ സോഽഹമിത്യവധാരയ 18
- അനാപന്നവികാരഃ സന്നയസ്കാന്തവദേവ യഃ
- ബുദ്ധ്യാദീംശ്ചാലയേത്പ്രത്യക് സോഽഹമിത്യവധാരയ 19
- അജഡാത്മവദാഭാന്തി യത്സാന്നിധ്യാജ്ജഡാ അപി
- ദേഹേന്ദ്രിയമനഃപ്രാണാഃ സോഽഹമിത്യവധാരയ 20
- അഗമന്മേ മനോഽന്യത്ര സാമ്പ്രതം ച സ്ഥിരീകൃതം
- ഏവം യോ വേത്തി ധീവൃത്തിം സോഽഹമിത്യവധാരയ 21
- സ്വപ്നജാഗരിതേ സുപ്തിം ഭാവാഭാവൗ ധിയാം തഥാ
- യോ വേത്ത്യവിക്രിയഃ സാക്ഷാത്സോഽഹമിത്യവധാരയ 22
- ഘടാവഭാസകോ ദീപോ ഘടാദന്യോ യഥേഷ്യതേ
- ദേഹാവഭാസകോ ദേഹീ തഥാഹം ബോധവിഗ്രഹഃ 23
- പുത്രവിത്താദയോ ഭാവാ യസ്യ ശേഷതയാ പ്രിയാഃ
- ദ്രഷ്ടാ സർവപ്രിയതമഃ സോഽഹമിത്യവധാരയ 24
- പരപ്രേമാസ്പദതയാ മാ ന ഭൂവമഹം സദാ
- ഭൂയാസമിതി യോ ദ്രഷ്ടാ സോഽഹമിത്യവധാരയ 25
- യഃ സാക്ഷിലക്ഷണോ ബോധസ്ത്വമ്പദാർഥഃ സ ഉച്യതേ
- സാക്ഷിത്വമപി ബോദ്ധൃത്വമവികാരിതയാത്മനഃ 26
- ദേഹേന്ദ്രിയമനഃപ്രാണാഹങ്കൃതിഭ്യോ വിലക്ഷണഃ
- പ്രോജ്ഝിതാശേശഷഡ്ഭാവവികാരസ്ത്വമ്പദാഭിധഃ 27
- ത്വമർഥമേവം നിശ്ചിത്യ തദർഥം ചിന്തയേത്പുനഃ
- അതദ്വ്യാവൃത്തിരൂപേണ സാക്ഷാദ്വിധിമുഖേന ച 28
- നിരസ്താശേഷസംസാരദോഷോഽസ്ഥുലാദിലക്ഷണഃ
- അദൃശ്യത്വാദിഗുണകഃ പരാകൃതതമോമലഃ 29
- നിരസ്താതിശയാനന്ദഃ സത്യപ്രജ്ഞാനവിഗ്രഹഃ
- സത്താസ്വലക്ഷണഃ പൂർണ പരമാത്മേതി ഗീയതേ 30
- സർവജ്ഞത്വം പരേശത്വം തഥാ സമ്പൂർണശക്തിതാ
- വേദൈഃ സമർഥ്യതേ യസ്യ തദ്ബ്രഹ്മേത്യവധാരയ 31
- യജ്ജ്ഞാനാത്സർവവിജ്ഞാനം ശ്രുതിഷു പ്രതിപാദിതം
- മൃദാദ്യനേകദൃഷ്ടാന്തൈസ്തദ്ബ്രഹ്മേത്യവധാരയ 32
- യദാനന്ത്യം പ്രതിജ്ഞായ ശ്രുതിസ്തത്സിദ്ധയേ ജഗൗ
- തത്കാര്യത്വം പ്രപഞ്ചസ്യ തദ്ബ്രഹ്മേത്യവധാരയ 33
- വിജിജ്ഞാസ്യതയാ യച്ച വേദാന്തേഷു മുമുക്ഷുഭിഃ
- സമർഥ്യതേഽതിയത്നേന തദ്ബ്രഹ്മേത്യവധാരയ 34
- ജീവാത്മനാ പ്രവേശശ്ച നിയന്തൃത്വം ച താൻ പ്രതി
- ശ്രൂയതേ യസ്യ വേദേഷു തദ്ബ്രഹ്മേത്യവധാരയ 35
- കർമണാം ഫലദാതൃത്വം യസ്യൈവ ശ്രൂയതേ ശ്രുതൗ
- ജീവാനാം ഹേതുകർതൃത്വം തദ്ബ്രഹ്മേത്യവധാരയ 36
- തത്ത്വമ്പദാർഥൗ നിർണീതൗ വാക്യാർഥശ്ചിന്ത്യതേഽധുനാ
- താദാത്മ്യമത്ര വാക്യാർഥസ്തയോരേവ പദാർഥയോഃ 37
- സംസർഗോ വാ വിശിഷ്ടോ വാ വാക്യാർഥോ നാത്ര സമ്മതഃ
- അഖണ്ഡൈകരസത്വേന വാക്യാർഥോ വിദുഷാം മതഃ 38
- പ്രത്യഗ്ബോധോ യ ആഭാതി സോഽദ്വയാനന്ദലക്ഷണഃ
- അദ്വയാനന്ദരൂപശ്ച പ്രത്യഗ്ബോധൈകലക്ഷണഃ 39
- ഇത്ഥമന്യോന്യതാദാത്മ്യപ്രതിപത്തിര്യദാ ഭവേത്
- അബ്രഹ്മത്വം ത്വമർഥസ്യ വ്യാവർതേത തദൈവ ഹി 40
- തദർഥസ്യ പാരോക്ഷ്യം യദ്യേവം കിം തതഃ ശ്രുണു
- പൂർണാനന്ദൈകരൂപേണ പ്രത്യഗ്ബോധോവതിഷ്ഠതേ 41
- തത്ത്വമസ്യാദിവാക്യം ച താദാത്മ്യപ്രതിപാദനേ
- ലക്ഷ്യൗ തത്ത്വമ്പദാർഥൗ ദ്വാവുപാദായ പ്രവർതതേ 42
- ഹിത്വാ ദ്വൗ ശബലൗ വാച്യൗ വാക്യം വാക്യാർഥബോധനേ
- യഥാ പ്രവർതതേഽസ്മാഭിസ്തഥാ വ്യാഖ്യാതമാദരാത് 43
- ആലംബനതയാഭാതി യോഽസ്മത്പ്രത്യയശബ്ദയോഃ
- അന്തഃകരണസംഭിന്നബോധഃ സ ത്വമ്പദാഭിധഃ 44
- മായോപാധിർജഗദ്യോനിഃ സർവജ്ഞത്വാദിലക്ഷണഃ
- പരോക്ഷ്യശബലഃ സത്യാദ്യാത്മകസ്തത്പദാഭിധഃ 45
- പ്രത്യക്പരോക്ഷതൈകസ്യ സദ്വിതീയത്വപൂർണതാ
- വിരുധ്യതേ യതസ്തസ്മാല്ലക്ഷണാ സമ്പ്രവർതതേ 46
- മാനാന്തരവിരോധേ തു മുഖ്യാർഥസ്യ പരിഗ്രഹേ
- മുഖ്യാർഥേനാവിനാഭൂതേ പ്രതീതിർലക്ഷണോച്യതേ 47
- തത്ത്വമസ്യാദിവാക്യേഷു ലക്ഷണാ ഭാഗലക്ഷണാ
- സോഽയമിത്യാദിവാക്യസ്ഥപദയോരിവ നാപരാ 48
- അഹം ബ്രഹ്മേതിവാക്യാർഥബോധോ യാവദ്ദൃഢീഭവേത്
- ശമാദിസഹിതസ്താവദഭ്യസേച്ഛ്രവണാദികം 49
- ശ്രുത്യാചാര്യപ്രസാദേന ദൃഢോ ബോധോ യഥാ ഭവേത്
- നിരസ്താശേഷസംസാരനിദാനഃ പുരുഷസ്തദാ 50
- വിശീർണകാര്യകരണോ ഭൂതസൂക്ഷ്മൈരനാവൃതഃ
- വിമുക്തകർമനിഗഡഃ സദ്യ ഏവ വിമുച്യതേ 51
- പ്രാരബ്ധകർമവേഗേന ജീവന്മുക്തോ യദാ ഭവേത്
- നിരസ്താതിശയാനന്ദം വൈഷ്ണവം പരമം പദം
- പുനരാവൃത്തിരഹിതം കൈവല്യം പ്രതിപദ്യതേ 53