മഹാഭാരതം മൂലം/വിരാടപർവം/അധ്യായം33

മഹാഭാരതം മൂലം/വിരാടപർവം
രചന:വ്യാസൻ
അധ്യായം33

1 [വൈ]
     യാതേ ത്രിഗർതം മത്സ്യേ തു പശൂംസ് താൻ സ്വാൻ പരീപ്സതി
     ദുര്യോധനഃ സഹാമാത്യോ വിരാടം ഉപയാദ് അഥ
2 ഭീഷ്മോ ദ്രോണശ് ച കർണശ് ച കൃപശ് ച പരമാസ്ത്ര വിത്
     ദ്രൗണിശ് ച സൗബലശ് ചൈവ തഥാ ദുഃക്ശാസനഃ പ്രഭുഃ
3 വിവിംശതിർ വികർണശ് ച ചിത്രസേനശ് ച വീര്യവാൻ
     ദുർമുഖോ ദുഃസഹശ് ചൈവ യേ ചൈവാന്യേ മരാ രഥാഃ
4 ഏതേ മത്സ്യാൻ ഉപാഗമ്യ വിരാടസ്യ മഹീപതേഃ
     ഘോഷാൻ വിദ്രാവ്യ തരസാ ഗോധനം ജഹ്രുർ ഓജസാ
5 ഷഷ്ടിം ഗവാം സഹസ്രാണി കുരവഃ കാലയന്തി തേ
     മഹതാ രഥവംശേന പരിവാര്യ സമന്തതഃ
6 ഗോപാലാനാം തു ഘോഷേഷു ഹന്യതാം തർ മഹാരഥൈഃ
     ആരാവഃ സുമഹാൻ ആസീത് സമ്പ്രഹാരേ ഭയങ്കരേ
7 ഗവാധ്യക്ഷസ് തു സന്ത്രസ്തോ രഥം ആസ്ഥായ സ ത്വരഃ
     ജഗാമ നഗരായൈവ പരിക്രോശംസ് തദാർതവത്
8 സ പ്രവിശ്യ പുരം രാജ്ഞോ നൃപ വേശ്മാഭ്യയാത് തതഃ
     അവതീര്യ രഥാത് തൂർണം ആഖ്യാതും പ്രവിവേശ ഹ
9 ദൃഷ്ട്വാ ഭൂമിഞ്ജയം നാമ പുത്രം മത്സ്യസ്യ മാനിനം
     തസ്മൈ തത് സർവം ആചഷ്ട രാഷ്ട്രസ്യ പശുകർഷണം
10 ഷഷ്ടിം ഗവാം സഹസ്രാണി കുരവഃ കാലയന്തി തേ
    തദ് വിജേതും സമുത്തിഷ്ഠ ഗോധനം രാഷ്ട്രവർധനം
11 രാജപുത്ര ഹിതപ്രേപ്സുഃ ക്ഷിപ്രം നിര്യാഹി വൈ സ്വയം
    ത്വാം ഹി മത്സ്യോ മഹീപാലഃ ശൂന്യപാലം ഇഹാകരോത്
12 ത്വയാ പരിഷദോ മധ്യേ ശ്ലാഘതേ സ നരാധിപഃ
    പുത്രോ മമാനുരൂപശ് ച ശൂരശ് ചേതി കുലോദ്വഹഃ
13 ഇഷ്വസ്ത്രേ നിപുണോ യോധഃ സദാ വീരശ് ച മേ സുതഃ
    തസ്യ തത് സത്യം ഏവാസ്തു മനുഷ്യേന്ദ്രസ്യ ഭാഷിതം
14 ആവർതയ കുരൂഞ് ജിത്വാ പശൂൻ പശുമതാം വര
    നിർദഹൈഷാം അനീകാനി ഭീമേന ശരതേജസാ
15 ധനുശ്ച്യുതൈ രുക്മപുംഖൈഃ ശരൈഃ സംനതപർവഭിഃ
    ദ്വിഷതാം ഭിന്ധ്യ് അനീകാനി ഗജാനാം ഇവ യൂഥപഃ
16 പാശോപധാനാം ജ്യാതന്ത്രീം ചാപദണ്ഡാം മഹാസ്വനാം
    ശരവർണാം ധനുർ വീണാം ശത്രുമധ്യേ പ്രവാദയ
17 ശ്വേതാ രജതസങ്കാശാ രഥേ യുജ്യന്തു തേ ഹയാഃ
    ധ്വജം ച സിംഹം സൗവർണം ഉച്ഛ്രയന്തു തവാഭിഭോഃ
18 രുക്മപംഖാഃ പ്രസന്നാഗ്രാ മുക്താ ഹസ്തവതാ ത്വയാ
    ഛാദയന്തു ശരാഃ സൂര്യം രാജ്ഞാം ആയുർ നിരോധിനഃ
19 രണേ ജിത്വാ കുരൂൻ സർവാൻ വർജ പാണിർ ഇവാസുരാൻ
    യശോ മഹദ് അവാപ്യ ത്വം പ്രവിശേദം പുരം പുനഃ
20 ത്വം ഹി രാഷ്ട്രസ്യ പരമാ ഗതിർ മത്സ്യപതേഃ സുതഃ
    ഗതിമന്തോ ഭവന്ത്വ് അദ്യ സർവേ വിഷയവാസിനഃ
21 സ്ത്രീമധ്യ ഉക്തസ് തേനാസൗ തദ് വാക്യം അഭയങ്കരം
    അന്തഃപുരേ ശ്ലാഘമാന ഇദം വചനം അബ്രവീത്