മഹാഭാരതം മൂലം/വിരാടപർവം/അധ്യായം28
| ←അധ്യായം27 | മഹാഭാരതം മൂലം/വിരാടപർവം രചന: അധ്യായം28 |
അധ്യായം29→ |
1 [വൈ]
തതഃ ശാരദ്വതോ വാക്യം ഇത്യ് ഉവാച കൃപസ് തദാ
യുക്തം പ്രാപ്തം ച വൃദ്ധേന പാണ്ഡവാൻ പ്രതി ഭാഷിതം
2 ധർമാർഥസഹിതം ശ്ലക്ഷ്ണം തത്ത്വതശ് ച സ ഹേതുമത്
തത്രാനുരൂപം ഭീഷ്മേണ മമാപ്യ് അത്ര ഗിരം ശൃണു
3 തേഷാം ചൈവ ഗതിസ് തീർഥൈർ വാസശ് ചൈഷാം പ്രചിന്ത്യതാം
നീതിർ വിധീയതാം ചാപി സാമ്പ്രതം യാ ഹിതാ ഭവേത്
4 നാവജ്ഞേയോ രിപുസ് താത പ്രാകൃതോ ഽപി ബുഭൂഷതാ
കിം പുനഃ പാണ്ഡവാസ് താത സർവാസ്ത്രകുശലാ രണേ
5 തസ്മാത് സത്രം പ്രവിഷ്ടേഷു പാണ്ഡവേഷു മഹാത്മസു
ഗൂഢഭാവേഷു ഛന്നേഷു കാലേ ചോദയം ആഗതേ
6 സ്വരാഷ്ട്ര പരരാഷ്ട്രേഷു ജ്ഞാതവ്യം ബലം ആത്മനഃ
ഉദയേ പാണ്ഡവാനാം ച പ്രാപ്തേ കാലേ ന സംശയഃ
7 നിവൃത്തസമയാഃ പാർഥാ മഹാത്മാനോ മഹാബലാഃ
മഹോത്സാഹാ ഭവിഷ്യന്തി പാണ്ഡവാ ഹ്യ് അതി തേജസഃ
8 തസ്മാദ് ബലം ച കോശം ച നീതിശ് ചാപി വിധീയതാം
യഥാകാലോദയേ പ്രാപ്തേ സമ്യക് തൈഃ സന്ദധാമഹേ
9 താത മന്യാമി തത് സർവം ബുധ്യസ്വ ബലം ആത്മനഃ
നിയതം സർവമിത്രേഷു ബലവത്സ്വ് അബലേഷു ച
10 ഉച്ചാവചം ബലം ജ്ഞാത്വാ മധ്യസ്ഥം ചാപി ഭാരത
പ്രഹൃഷ്ടം അപ്രഹൃഷ്ടം ച സന്ദധാമ തഥാ പരൈഃ
11 സാമ്നാ ഭേദേന ദാനേന ദണ്ഡേന ബലികർമണാ
ന്യായേനാനമ്യ ച പരാൻ ബലാച് ചാനമ്യ ദുർബലാൻ
12 സാന്ത്വയിത്വാ ച മിത്രാണി ബലം ചാഭാഷ്യതാം സുഖം
സകോശ ബലസംവൃദ്ധഃ സമ്യക് സിദ്ധിം അവാപ്സ്യസി
13 യോത്സ്യസേ ചാപി ബലിഭിർ അരിഭിഃ പ്രത്യുപസ്ഥിതൈഃ
അന്യൈസ് ത്വം പാണ്ഡവൈർ വാപി ഹീനസ്വബലവാഹനൈഃ
14 ഏവം സർവം വിനിശ്ചിത്യ വ്യവസായം സ്വധർമതഃ
യഥാകാലം മനുഷ്യേന്ദ്ര ചിരം സുഖം അവാപ്സ്യസി