മഹാഭാരതം മൂലം/വിരാടപർവം/അധ്യായം25

വിക്കിഗ്രന്ഥശാല സംരംഭത്തിൽ നിന്ന്
മഹാഭാരതം മൂലം/വിരാടപർവം
രചന:വ്യാസൻ
അധ്യായം25

1 [വൈ]
     തതോ ദുര്യോധനോ രാജാ ശ്രുത്വാ തേഷാം വചസ് തദാ
     ചിരം അന്തർ മനാ ഭൂത്വാ പ്രത്യുവാച സഭാ സദഃ
 2 സുദുഃഖാ ഖലു കാര്യാണാം ഗതിർ വിജ്ഞാതും അന്തതഃ
     തസ്മാത് സർവേ ഉദീക്ഷധ്വം ക്വ നു സ്യുഃ പാണ്ഡവാ ഗതാഃ
 3 അൽപാവശിഷ്ടം കാലസ്യ ഗതഭൂയിഷ്ഠം അന്തതഃ
     തേഷാം അജ്ഞാതചര്യായാം അസ്മിൻ വർഷേ ത്രയോദശേ
 4 അസ്യ വർഷസ്യ ശേഷം ചേദ് വ്യതീയുർ ഇഹ പാണ്ഡവാഃ
     നിവൃത്തസമയാസ് തേ ഹി സത്യവ്രതപരായണാഃ
 5 ക്ഷരന്ത ഇവ നാഗേന്ദ്രാഃ സർവ ആശീവിഷോപമാഃ
     ദുഃഖാ ഭവേയുഃ സംരബ്ധാഃ കൗരവാൻ പ്രതി തേ ധ്രുവം
 6 അർവാക് കാലസ്യ വിജ്ഞാതാഃ കൃച്ഛ്രരൂപധരാഃ പുനഃ
     പ്രവിശേയുർ ജിതക്രോധാസ് താവദ് ഏവ പുനർ വനം
 7 തസ്മാത് ക്ഷിപ്രം ബുഭുത്സധ്വം യഥാ നോ ഽത്യന്തം അവ്യയം
     രാജ്യം നിർദ്വന്ദ്വം അവ്യഗ്രം നിഃസപത്നം ചിരം ഭവേത്
 8 അഥാബ്രവീത് തതഃ കർണഃ ക്ഷിപ്രം ഗച്ഛന്തു ഭാരത
     അന്യേ ധൂർതതരാ ദക്ഷാ നിഭൃതാഃ സാധുകാരിണഃ
 9 ചരന്തു ദേശാൻ സംവീതാഃ സ്ഫീതാഞ് ജനപദാകുലാൻ
     തത്ര ഗോഷ്ഠീഷ്വ് അഥാന്യാസു സിദ്ധപ്രവ്രജിതേഷു ച
 10 പരിചാരേഷു തീർഥേഷു വിവിധേഷ്വ് ആകരേഷു ച
    വിജ്ഞാതവ്യാ മനുഷ്യൈസ് തൈസ് തർകയാ സുവിനീതയാ
11 വിവിധൈസ് തത്പരൈഃ സമ്യക് തജ്ജ്ഞൈർ നിപുണ സംവൃതൈഃ
    അന്വേഷ്ടവ്യാശ് ച നിപുണം പാണ്ഡവാശ് ഛന്നവാസിനഃ
12 നദീ കുഞ്ജേഷു തീർഥേഷു ഗ്രാമേഷു നഗരേഷു ച
    ആശ്രമേഷു ച രമ്യേഷു പർവതേഷു ഗുഹാസു ച
13 അഥാഗ്രജാനന്തരജഃ പാപഭാവാനുരാഗിണം
    ജ്യേഷ്ഠം ദുഃശാസനസ് തത്ര ഭ്രാതാ ഭ്രാതരം അബ്രവീത്
14 ഏതച് ച കർണോ യത് പ്രാഹ സർവം ഈക്ഷാമഹേ തഥാ
    യഥോദ്ദിഷ്ടം ചരാഃ സർവേ മൃഗയന്തു തതസ് തതഃ
    ഏതേ ചാന്യേ ച ഭൂയാംസോ ദേശാദ് ദേശം യഥാവിധി
15 ന തു തേഷാം ഗതിർ വാസഃ പ്രവൃത്തിശ് ചോപലഭ്യതേ
    അത്യാഹിതം വാ ഗൂഢാസ് തേ പാരം വോർമിമതോ ഗതാഃ
16 വ്യാലൈർ വാപി മഹാരണ്യേ ഭക്ഷിതാഃ ശൂരമാനിനഃ
    അഥ വാ വിഷമം പ്രാപ്യ വിനഷ്ടാഃ ശാശ്വതീഃ സമാഃ
17 തസ്മാൻ മാനസം അവ്യഗ്രം കൃത്വാ ത്വം കുരുനന്ദന
    കുരു കാര്യം യഥോത്സാഹം മന്യസേ യൻ നരാധിപ