മഹാഭാരതം മൂലം/വിരാടപർവം/അധ്യായം23
| ←അധ്യായം22 | മഹാഭാരതം മൂലം/വിരാടപർവം രചന: അധ്യായം23 |
അധ്യായം24→ |
1 [വൈ]
തേ ദൃഷ്ട്വാ നിഹതാൻ സൂതാൻ രാജ്ഞേ ഗത്വാ ന്യവേദയൻ
ഗന്ധർവൈർ നിഹതാ രാജൻ സൂതപുത്രാഃ പരഃശതാഃ
2 യഥാ വജ്രേണ വൈ ദീർണം പർവതസ്യ മഹച് ഛിരഃ
വിനികീർണം പ്രദൃശ്യേത തഥാ സൂതാ മഹീതലേ
3 സൈരന്ധ്രീ ച വിമുക്താസൗ പുനർ ആയാതി തേ ഗൃഹം
സർവം സംശയിതം രാജൻ നഗരം തേ ഭവിഷ്യതി
4 തഥാരൂപാ ഹി സൈരന്ധ്രീ ഗന്ധർവാശ് ച മഹാബലാഃ
പുംസാം ഇഷ്ടശ് ച വിഷയോ മൈഥുനായ ന സംശയഃ
5 യഥാ സൈരന്ധ്രി വേഷേണ ന തേ രാജന്ന് ഇദം പുരം
വിനാശം ഏതി വൈ ക്ഷിപ്രം തഥാ നീതിർ വിധീയതാം
6 തേഷാം തദ് വചനം ശ്രുത്വാ വിരാടോ വാഹിനീപതിഃ
അബ്രവീത് ക്രിയതാം ഏഷാം സൂതാനാം പരമക്രിയാ
7 ഏകസ്മിന്ന് ഏവ തേ സർവേ സുസമിദ്ധേ ഹുതാശനേ
ദഹ്യന്താം കീചകാഃ ശീഘ്രം രത്നൈർ ഗന്ധൈശ് ച സർവശഃ
8 സുദേഷ്ണാം ചാബ്രവീദ് രാജാ മഹിഷീം ജാതസാധ്വസഃ
സൈരന്ധ്രീം ആഗതാം ബ്രൂയാ മമൈവ വചനാദ് ഇദം
9 ഗച്ഛ സൈരന്ധ്രി ഭദ്രം തേ യഥാകാമം ചരാബലേ
ബിഭേതി രാജാ സുശ്രോണി ഗന്ധർവേഭ്യഃ പരാഭവാത്
10 ന ഹി താം ഉത്സഹേ വക്തും സ്വയം ഗന്ധർവരക്ഷിതാം
സ്ത്രിയസ് ത്വ് അദോഷാസ് താം വക്തും അതസ് ത്വാം പ്രബ്രവീമ്യ് അഹം
11 അഥ മുക്താ ഭയാത് കൃഷ്ണാ സൂതപുത്രാൻ നിരസ്യ ച
മോക്ഷിതാ ഭീമസേനേന ജഗാമ നഗരം പ്രതി
12 ത്രാസിതേവ മൃഗീ ബാലാ ശാർദൂലേന മനസ്വിനീ
ഗാത്രാണി വാസസീ ചൈവ പ്രക്ഷാല്യ സലിലേന സാ
13 താം ദൃഷ്ട്വാ പുരുഷാ രാജൻ പ്രാദ്രവന്ത ദിശോ ദശ
ഗന്ധർവാണാം ഭയത്രസ്താഃ കേ ചിദ് ദൃഷ്ടീർ ന്യമീലയൻ
14 തതോ മഹാനസ ദ്വാരി ഭീമസേനം അവസ്ഥിതം
ദദർശ രാജൻ പാഞ്ചാലീ യഥാമത്തം മഹാദ്വിപം
15 തം വിസ്മയന്തീ ശനകൈഃ സഞ്ജ്ഞാഭിർ ഇദം അബ്രവീത്
ഗന്ധർവരാജായ നമോ യേനാസ്മി പരിമോചിതാ
16 [ഭീമസ്]
യേ യസ്യാ വിചരന്തീഹ പുരുഷാ വശവർതിനഃ
തസ്യാസ് തേ വചനം ശ്രുത്വാ അനൃണാ വിചരന്ത്യ് ഉത
17 [വൈ]
തതഃ സാ നർതനാഗാരേ ധനഞ്ജയം അപശ്യത
രാജ്ഞഃ കന്യാ വിരാടസ്യ നർതയാനം മഹാഭുജം
18 തതസ് താ നർതനാഗാരാദ് വിനിശ്ക്രമ്യ സഹാർജുനാഃ
കന്യാ ദദൃശുർ ആയാന്തീം കൃഷ്ണാം ക്ലിഷ്ടാം അനാഗസം
19 [കന്യാഹ്]
ദിഷ്ട്യാ സൈരന്ധ്രി മുക്താസി ദിഷ്ട്യാസി പുനരാഗതാ
ദിഷ്ട്യാ വിനിഹതാഃ സൂതാ യേ ത്വാം ക്ലിശ്യന്ത്യ് അനാഗസം
20 [ബൃഹൻ]
കഥം സൈരന്ധ്രി മുക്താസി കഥം പാപാശ് ച തേ ഹതാഃ
ഇച്ഛാമി വൈ തവ ശ്രോതും സർവം ഏവ യഥാതഥം
21 [സൈർ]
ബൃഹന്നഡേ കിം നു തവ സൈരന്ധ്ര്യാ കാര്യം അദ്യ വൈ
യാ ത്വം വസസി കല്യാണി സദാ കന്യാ പുരേ സുഖം
22 ന ഹി ദുഃഖം സമാപ്നോഷി സൈരന്ധ്രീ യദ് ഉപാശ്നുതേ
തേന മാം ദുഃഖിതാം ഏവം പൃച്ഛസേ പ്രഹസന്ന് ഇവ
23 [ബൃഹൻ]
ബൃഹന്നഡാപി കല്യാണി ദുഃഖം ആപ്നോത്യ് അനുത്തമം
തിര്യഗ്യോനിഗതാ ബാലേ ന ചൈനാം അവബുധ്യസേ
24 [വൈ]
തതഃ സഹൈവ കന്യാഭിർ ദ്രൗപദീ രാജവേശ്മ തത്
പ്രവിവേശ സുദേഷ്ണായാഃ സമീപം അപലായിനീ
25 താം അബ്രവീദ് രാജപുത്രീ വിരാട വചനാദ് ഇദം
സൈരന്ധ്രി ഗമ്യതാം ശീഘ്രം യത്ര കാമയസേ ഗതിം
26 രാജാ ബിഭേതി ഭദ്രം തേ ഗന്ധർവേഭ്യഃ പരാഭവാത്
ത്വം ചാപി തരുണീ സുഭ്രു രൂപേണാപ്രതിമാ ഭുവി
27 [സൈർ]
ത്രയോദശാഹ മാത്രം മേ രാജാ ക്ഷമതു ഭാമിനി
കൃതകൃത്യാ ഭവിഷ്യന്തി ഗന്ധർവാസ് തേ ന സംശയഃ
28 തതോ മാം തേ ഽപനേഷ്യന്തി കരിഷ്യന്തി ച തേ പ്രിയം
ധ്രുവം ച ശ്രേയസാ രാജാ യോഷ്ക്യതേ സഹ ബാന്ധവൈഃ