മഹാഭാരതം മൂലം/വിരാടപർവം/അധ്യായം15

മഹാഭാരതം മൂലം/വിരാടപർവം
രചന:വ്യാസൻ
അധ്യായം15

1 [കീചക]
     സ്വാഗതം തേ സുകേശാന്തേ സുവ്യുഷ്ടാ രജനീ മമ
     സ്വാമിനീ ത്വം അനുപ്രാപ്താ പ്രകുരുഷ്വ മമ പ്രിയം
2 സുവർണമാലാഃ കംബൂശ് ച കുണ്ഡലേ പരിഹാടകേ
     ആഹരന്തു ച വസ്ത്രാണി കൗശികാന്യ് അജിനാനി ച
3 അസ്തി മേ ശയനം ശുഭ്രം ത്വദർഥം ഉപകൽപിതം
     ഏഹി തത്ര മയാ സാർധം പിബസ്വ മധുമാധവീം
4 [ദ്രൗ]
     അപ്രൈഷീദ് രാജപുത്രീ മാം സുരാ ഹാരീം തവാന്തികം
     പാനം ആനയ മേ ക്ഷിപ്രം പിപാസാ മേതി ചാബ്രവീത്
5 [കീചക]
     അന്യാ ഭദ്രേ നയിഷ്യന്തി രാജപുത്ര്യാഃ പരിസ്രുതം
6 [വൈ]
     ഇത്യ് ഏനാം ദക്ഷിണേ പാണൗ സൂതപുത്രഃ പരാമൃശത്
     സാ ഗൃഹീതാ വിധുന്വാനാ ഭൂമാവ് ആക്ഷിപ്യ കീചകം
     സഭാം ശരണം ആധാവദ് യത്ര രാജാ യുധിഷ്ഠിരഃ
7 താം കീചകഃ പ്രധാവന്തീം കേശപക്ഷേ പരാമൃശത്
     അഥൈനാം പശ്യതോ രാജ്ഞഃ പാതയിത്വാ പദാവധീത്
8 തതോ യോ ഽസൗ തദാർകേണ രാക്ഷസഃ സംനിയോജിതഃ
     സ കീചകം അപോവാഹ വാതവേഗേന ഭാരത
9 സ പപാത തതോ ഭൂമൗ രക്ഷോബലസമാഹതഃ
     വിഘൂർണമാനോ നിശ്ചേഷ്ടശ് ഛിന്നമൂല ഇവ ദ്രുമഃ
10 താം ചാസീനൗ ദദൃശതുർ ഭീമസേന യുധിഷ്ഠിരൗ
    അമൃഷ്യമാണൗ കൃഷ്ണായാഃ കീചകേന പദാ വധം
11 തസ്യ ഭീമോ വധപ്രേപ്സുഃ കീചകസ്യ ദുരാത്മനഃ
    ദന്തൈർ ദന്താംസ് തദാ രോഷാൻ നിസ്പിപേഷ മഹാമനഃ
12 അഥാംഗുഷ്ഠേനാവമൃദ്നാദ് അംഗുഷ്ഠം തസ്യ ധർമരാജ്
    പ്രബോധനഭയാദ് രാജൻ ഭീമസ്യ പ്രത്യഷേധയത്
13 സാ സഹാ ദ്വാരം ആസാദ്യ രുദതീ മത്സ്യം അബ്രവീത്
    അവേക്ഷമാണാ സുശ്രോണീ പതീംസ് താൻ ദീനചേതസഃ
14 ആകാരം അഭിരക്ഷന്തീ പ്രതിജ്ഞാം ധർമസംഹിതാം
    ദഹ്യമാനേവ രൗദ്രേണ ചക്ഷുർ ആ ദ്രുപദാത്മജാ
15 [ദ്രൗ]
    യേഷാം വൈരീ ന സ്വപിതി പദാ ഭൂമിം ഉപസ്പൃശൻ
    തേഷാം മാം മാനിനീം ഭാര്യാം സൂതപുത്രഃ പദാവധീത്
16 യേ ദദ്യുർ ന ച യാചേയുർ ബ്രഹ്മണ്യാഃ സത്യവാദിനഃ
    തേഷാം മാം മാനിനീം ഭാര്യാം സൂതപുത്രഃ പദാവധീത്
17 യേഷാം ദുന്ദുഭിനിർഘോഷോ ജ്യാഘോഷഃ ശ്രൂയതേ ഽനിശം
    തേഷാം മാം മാനിനീം ഭാര്യാം സൂതപുത്രഃ പദാവധീത്
18 യേ തേ തേജസ്വിനോ ദാന്താ ബലവന്തോ ഽഭിമാനിനഃ
    തേഷാം മാം മാനിനീം ഭാര്യാം സൂതപുത്രഃ പദാവധീത്
19 സർവലോകം ഇമം ഹന്യുർ ധർമപാശസിതാസ് തു യേ
    തേഷാം മാം മാനിനീം ഭാര്യാം സൂതപുത്രഃ പദാവധീത്
20 ശരണം യേ പ്രപന്നാനാം ഭവന്തി ശരണാർഥിനാം
    ചരന്തി ലോകേ പ്രച്ഛന്നാഃ ക്വ നു തേ ഽദ്യ മഹാരഥാഃ
21 കഥം തേ സൂതപുത്രേണ വധ്യമാനാം പ്രിയാം സതീം
    മർഷയന്തി യഥാ ക്ലീബാ ബലവന്തോ ഽമിതൗജസഃ
22 ക്വ നു തേഷാം അമർഷശ് ച വീര്യം തേജശ് ച വർതതേ
    ന പരീപ്സന്തി യേ ഭാര്യാം വധ്യമാനാം ദുരാത്മനാ
23 മയാത്ര ശക്യം കിം കർതും വിരാടേ ധർമദൂഷണം
    യഃ പശ്യൻ മാം മർഷയതി വധ്യമാനം അനാഗസം
24 ന രാജൻ രാജവത് കിം ചിത് സമാചരസി കീചകേ
    ദസ്യൂനാം ഇവ ധർമസ് തേ ന ഹി സംസദി ശോഭതേ
25 ന കീചകഃ സ്വധർമസ്ഥോ ന ച മത്സ്യഃ കഥം ചന
    സഭാ സദോ ഽപ്യ് അധർമജ്ഞാ യ ഇമം പര്യുപാസതേ
26 നോപാലഭേ ത്വാം നൃപതൗ വിരാട ജനസംസദി
    നാഹം ഏതേന യുക്താ വൈ ഹന്തും മത്സ്യതവാന്തികേ
    സഭാ സദസ് തു പശ്യന്തു കീചകസ്യ വ്യതിക്രമം
27 [വിരാട]
    പരോക്ഷം നാഭിജാനാമി വിഗ്രഹം യുവയോർ അഹം
    അർഥതത്ത്വം അവിജ്ഞായ കിം നു സ്യാത് കുശലം മമ
28 [വൈ]
    തതസ് തു സഭ്യാ വിജ്ഞായ കൃഷ്ണാം ഭൂയോ ഽഭ്യപൂജയൻ
    സാധു സാധ്വ് ഇതി ചാപ്യ് ആഹുഃ കീചകം ച വ്യഗർഹയൻ
29 [സഭ്യാ]
    യസ്യേയം ചാരുസർവാംഗീ ഭാര്യാ സ്യാദ് ആയതേക്ഷണാ
    പരോ ലാഭശ് ച തസ്യ സ്യാൻ ന സ ശോചേത് കദാ ചന
30 [വൈ]
    ഏവം സമ്പൂജയംസ് തത്ര കൃഷ്ണാം പ്രേക്ഷ്യ സഭാ സദഃ
    യുധിഷ്ഠിരസ്യ കോപാത് തു ലലാടേ സ്വേദ ആസജത്
31 അഥാബ്രവീദ് രാജപുത്രീം കൗരവ്യോ മഹിഷീം പ്രിയാം
    ഗച്ഛ സൈരന്ധ്രി മാത്രസ്ഥാഃ സുദേഷ്ണായാ നിവേശനം
32 ഭർതാരം അനുരുധ്യന്ത്യഃ ക്ലിശ്യന്തേ വീര പത്നയഃ
    ശുശ്രൂഷയാ ക്ലിശ്യമാനാഃ പതിലോകം ജയന്ത്യ് ഉത
33 മന്യേ ന കാലം ക്രോധസ്യ പശ്യന്തി പതയസ് തവ
    തേന ത്വാം നാഭിധാവന്തി ഗന്ധർവാഃ സൂര്യവർചസഃ
34 അകാലജ്ഞാസി സൈരന്ധ്രി ശൈലൂഷീവ വിധാവസി
    വിഘ്നം കരോഷി മത്സ്യാനാം ദീവ്യതാം രാജസംസദി
    ഗച്ഛ സൈരന്ധ്രി ഗന്ധർവാഃ കരിഷ്യന്തി തവ പ്രിയം
35 [ദ്രൗ]
    അതീവ തേഷാം ഘൃണിനാം അർഥേ ഽഹം ധർമചാരിണീ
    തസ്യ തസ്യേഹ തേ വധ്യാ യേഷാം ജ്യേഷ്ഠോ ഽക്ഷദേവിതാ
36 [വൈ]
    ഇത്യ് ഉക്ത്വാ പ്രാദ്രവത് കൃഷ്ണാ സുദേഷ്ണായാ നിവേശനം
    കേശാൻ മുക്ത്വാ തു സുശ്രോണീ സംരംഭാൽ ലോഹിതേക്ഷണാ
37 ശുശുഭേ വദനം തസ്യാ രുദന്ത്യാ വിരതം തദാ
    മേഘലോഖാ വിനിർമുക്തം ദിവീവ ശശിമണ്ഡലം
38 [സുദേസ്ണാ]
    കസ് ത്വാവധീദ് വരാരോഹേ കസ്മാദ് രോദിഷി ശോഭനേ
    കസ്മാദ് യ ന സുഖം ഭദ്രേ കേന തേ വിപ്രിയം കൃതം
39 [ദ്രൗ]
    കീചകോ മാവധീത് തത്ര സുരാ ഹാരീം ഗതാം തവ
    സഭായാം പശ്യതോ രാജ്ഞോ യഥൈവ വിജനേ തഥാ
40 [സുദേസ്ണാ]
    ഘാതയാമി സുകേശാന്തേ കീചകം യദി മന്യസേ
    യോ സൗ ത്വാം കാമസംമത്തോ ദുർലഭാം അഭിമന്യതേ
41 [ദ്രൗ]
    അന്യേ വൈ തം വധിഷ്യന്തി യേഷാം ആഗഃ കരോതി സഃ
    മന്യേ ചാദ്യൈവ സുവ്യക്തം പരലോകം ഗമിഷ്യതി