മഹാഭാരതം മൂലം/വനപർവം/അധ്യായം260

മഹാഭാരതം മൂലം/വനപർവം
രചന:വ്യാസൻ
അധ്യായം260

1 [മാർക്]
     തതോ ബ്രഹ്മർഷയഃ സിദ്ധാ ദേവരാജർഷയസ് തഥാ
     ഹവ്യവാഹം പുരസ്കൃത്യ ബ്രാഹ്മണം ശരണം ഗതാഃ
2 [അഗ്നി]
     യഃ സ വിശ്രവസഃ പുത്രോ ദശഗ്രീവോ മഹാബലഃ
     അവധ്യോ വരദാനേന കൃതോ ഭഗവതാ പുരാ
3 സ ബാധതേ പ്രജാ സർവാ വിപ്രകാരൈർ മഹാബലഃ
     തതോ നസ് ത്രാതുഭഗവൻ നാന്യസ് ത്രാതാ ഹി വിദ്യതേ
4 [ബ്രഹ്മാ]
     ന സ ദേവാസുരൈഃ ശക്യോ യുദ്ധേ ജേതും വിഭാവസോ
     വിഹിതം തത്ര യത് കാര്യം അഭിതസ് തസ്യ നിഗ്രഹേ
5 തദർഥം അവതീർണോ ഽസൗ മന്നിയോഗാച് ചതുർഭുജഃ
     വിഷ്ണുഃ പ്രഹരതാം ശ്രേഷ്ഠഃ സ കർമൈതത് കരിഷ്യതി
6 [മാർക്]
     പിതാമഹസ് തതസ് തേഷാം സംനിധൗ വാക്യം അബ്രവീത്
     സർവൈർ ദേവഗണൈഃ സാർധം സംഭവധ്വം മഹീതലേ
7 വിഷ്ണോഃ സഹായാൻ ഋക്ഷീഷു വാനരീഷു ച സർവശഃ
     ജനയധ്വം സുതാൻ വീരാൻ കാമരൂപബലാന്വിതാൻ
8 തതോ ഭാഗാനുഭാഗേന ദേവഗന്ധർവദാനവാഃ
     അവതർതും മഹീം സർവേ രഞ്ജയാം ആസുർ അഞ്ജസാ
9 തേഷാം സമക്ഷം ഗന്ധർവീം ദുന്ദുഭീം നാമ നാമതഃ
     ശശാസ വരദോ ദേവോ ദേവകാര്യാർഥ സിദ്ധയേ
10 പിതാമഹവചോ ശ്രുത്വാ ഗന്ധർവീ ദുന്ദുഭീ തതഃ
    മന്ഥരാ മാനുഷേ ലോകേ കുബ്ജാ സമഭവത് തദാ
11 ശക്രപ്രഭൃതയശ് ചൈവ സർവേ തേ സുരസത്തമാഃ
    വാനരർക്ഷ വരസ്ത്രീഷു ജനയാം ആസുർ ആത്മജാൻ
    തേ ഽന്വവർതൻ പിതൄൻ സർവേ യശസാ ച ബലേന ച
12 ഭേത്താരോ ഗിരിശൃംഗാണാം ശാലതാലശിലായുധാഃ
    വജ്രസംഹനനാഃ സർവേ സർവേ ചൗഘബലാസ് തഥാ
13 കാമവീര്യധരാശ് ചൈവ സർവേ യുദ്ധവിശാരദാഃ
    നാഗായുത സമപ്രാണാ വായുവേഗസമാ ജവേ
    യത്രേച്ഛക നിവാസാശ് ച കേ ചിദ് അത്ര വനൗകസഃ
14 ഏവംവിധായ തത് സർവം ഭഗവാംൽ ലോകഭാവനഃ
    മന്ഥരാം ബോധയാം ആസ യദ് യത് കാര്യം യഥാ യഥാ
15 സാ തദ്വചനം ആജ്ഞായ തഥാ ചക്രേ മനോജവാ
    ഇതോ ചേതശ് ച ഗച്ഛന്തീ വൈരസന്ധുക്ഷണേ രതാ