മഹാഭാരതം മൂലം/വനപർവം/അധ്യായം248
| ←അധ്യായം247 | മഹാഭാരതം മൂലം/വനപർവം രചന: അധ്യായം248 |
അധ്യായം249→ |
1 [വൈ]
തസ്മിൻ ബഹുമൃഗേ ഽരണ്യേ രമമാണാ മഹാരഥാഃ
കാമ്യകേ ഭരതശ്രേഷ്ഠാ വിജഹ്രുസ് തേ യഥാമരാഃ
2 പ്രേക്ഷമാണാ ബഹുവിധാൻ വനോദ്ദേശാൻ സമന്തതഃ
യഥർതുകാലരമ്യാശ് ച വനരാജീഃ സുപുഷ്പിതാഃ
3 പാണ്ഡവാ മൃഗയാ ശീലാശ് ചരന്തസ് തൻ മഹാവനം
വിജഹ്രുർ ഇന്ദ്ര പ്രതിമാഃ കം ചിത് കാലം അരിന്ദമാഃ
4 തതസ് തേ യൗഗപദ്യേന യയുഃ സർവേ ചതുർദിശം
മൃഗയാം പുരുഷവ്യാഘ്രാ ബ്രാഹ്മണാർഥേ പരന്തപാഃ
5 ദ്രൗപദീം ആശ്രമേ ന്യസ്യ തൃണബിന്ദോർ അനുജ്ഞയാ
മഹർഷേർ ദീപ്തതപസോ ധൗമ്യസ്യ ച പുരോധസഃ
6 തതസ് തു രാജാ സുന്ധൂനാം വാർദ്ധക്ഷത്രിർ മയാ യശാഃ
വിവാഹ കാമഃ ശാല്വേയാൻ പ്രയാതഃ സോ ഽഭവത് തദാ
7 മഹതാ പരിബർഹേണ രാജയോഗ്യേന സംവൃതഃ
രാജഭിർ ബഹുഭിഃ സാർധം ഉപായാത് കാമ്യകം ച സഃ
8 തത്രാപശ്യത് പ്രിയാം ഭാര്യാം പാണ്ഡവാനാം യശസ്വിനാം
തിഷ്ഠന്തീം ആശ്രമദ്വാരി ദ്രൗപദീം നിർജനേ വനേ
9 വിഭ്രാജമാനാം വപുഷാ ബിഭ്രതീം രൂപം ഉത്തമം
ഭ്രാജയന്തീം വനോദ്ദേശം നീലാഭ്രം ഇവ വിദ്യുതം
10 അപ്സരാ ദേവകന്യാ വാ മായാ വാ ദേവനിർമിതാ
ഇതി കൃത്വാഞ്ജലിം സർവേ ദദൃശുസ് താം അനിന്ദിതാം
11 തതഃ സരാജാ സിന്ധൂനാം വാർദ്ധക്ഷത്രിർ ജയദ്രഥഃ
വിസ്മിതസ് താം അനിന്ദ്യാംഗീം ദൃഷ്ട്വാസീദ് ധൃഷ്ടമാനസഃ
12 സ കോടികാശ്യം രാജാനം അബ്രവീത് കാമമോഹിതഃ
കസ്യ ത്വ് ഏഷാനവദ്യാംഗീ യദി വാപി ന മാനുഷീ
13 വിവാഹാർഥോ ന മേ കശ് ചിദ് ഇമാം ദൃഷ്ട്വാതിസുന്ദരീം
ഏതാം ഏവാഹം ആദായ ഗമിഷ്യാമി സ്വം ആലയം
14 ഗച്ഛ ജാനീഹി സൗമ്യൈനാം കസ്യ കാ ച കുതോ ഽപി വാ
കിമർഥം ആഗതാ സുഭ്രൂർ ഇദം കണ്ടകിതം വനം
15 അപി നാമ വരാരോഹാ മാം ഏഷാ ലോകസുന്ദരീ
ഭജേദ് അദ്യായതാപാംഗീ സുദതീ തനുമധ്യമാ
16 അപ്യ് അഹം കൃതകാമഃ സ്യാം ഇമാം പ്രാപ്യ വരസ്ത്രിയം
ഗച്ഛ ജാനീഹി കോ ന്വ് അസ്യാ നാഥ ഇത്യ് ഏവ കോടിക
17 സ കോടികാശ്യസ് തച് ഛ്രുത്വാ രഥാത് പ്രസ്കന്ദ്യ കുണ്ഡലീ
ഉപേത്യ പപ്രച്ഛ തദാ ക്രോഷ്ടാ വ്യാഘ്രവധൂം ഇവ