മഹാഭാരതം മൂലം/വനപർവം/അധ്യായം232

മഹാഭാരതം മൂലം/വനപർവം
രചന:വ്യാസൻ
അധ്യായം232

1 [യ്]
     അസ്മാൻ അഭിഗതാംസ് താത ഭയാർതാഞ് ശരണൈഷിണഃ
     കൗരവാൻ വിഷമപ്രാപ്താൻ കഥം ബ്രൂയാസ് തം ഈദൃശം
2 ഭവന്തി ഭേദാ ജ്ഞാതീനാം കലഹാശ് ച വൃകോദര
     പ്രസക്താനി ച വൈരാണി ജ്ഞാതിധർമോ ന നശ്യതി
3 യദാ തു കശ് ചിജ് ജ്ഞാതീനാം ബാഹ്യഃ പ്രാർഥയതേ കുലം
     ന മർഷയന്തി തത് സന്തോ ബാഹ്യേനാഭിപ്രമർഷണം
4 ജാനാതി ഹ്യ് ഏഷ ദുർബുദ്ധിർ അസ്മാൻ ഇഹ ചിരോഷിതാൻ
     സ ഏഷ പരിഭൂയാസ്മാൻ അകാർഷീദ് ഇദം അപ്രിയം
5 ദുര്യോധനസ്യ ഗ്രഹണാദ് ഗന്ധർവേണ ബലാദ് രണേ
     സ്ത്രീണാം ബാഹ്യാഭിമർശാച് ച ഹതം ഭവതി നഃ കുലം
6 ശരണം ച പ്രപന്നാനാം ത്രാണാർഥം ച കുലസ്യ നഃ
     ഉത്തിഷ്ഠധ്വം നരവ്യാഘ്രാഃ സജ്ജീഭവത മാചിരം
7 അർജുനശ് ച യമൗ ചൈവ ത്വം ച ഭീമാപരാജിതഃ
     മോക്ഷയധ്വം ധാർതരാഷ്ട്രം ഹ്രിയമാണം സുയോധനം
8 ഏതേ രഥാ നരവ്യാഘ്രാഃ സർവശസ്ത്രസമന്വിതാഃ
     ഇന്ദ്രസേനാദിഭിഃ സൂതൈഃ സംയതാഃ കനകധ്വജാഃ
9 ഏതാൻ ആസ്ഥായ വൈ താത ഗന്ധർവാൻ യോദ്ധും ആഹവേ
     സുയോധനസ്യ മോക്ഷായ പ്രയതധ്വം അതന്ദ്രിതാഃ
10 യ ഏവ കശ് ചിദ് രാജന്യഃ ശരണാർഥം ഇഹാഗതം
    പരം ശക്ത്യാഭിരക്ഷേത കിം പുനസ് ത്വം വൃകോദര
11 ക ഇഹാന്യോ ഭവേത് ത്രാണം അഭിധാവേതി ചോദിതഃ
    പ്രാഞ്ജലിം ശരണാപന്നം ദൃഷ്ട്വാ ശത്രും അപി ധ്രുവം
12 വരപ്രദാനം രാജ്യം ച പുത്ര ജന്മ ച പാണ്ഡവ
    ശത്രോശ് ച മോക്ഷണം ക്ലേശാത് ത്രീണി ചൈകം ച തത് സമം
13 കിം ഹ്യ് അഭ്യധികം ഏതസ്മാദ് യദ് ആപന്നഃ സുയോധനഃ
    ത്വദ് ബാഹുബലം ആശ്രിത്യ ജീവിതം പരിമാർഗതി
14 സ്വയം ഏവ പ്രധാവേയം യദി ന സ്യാദ് വൃകോദര
    വിതതോ ഽയം ക്രതുർ വീര ന ഹി മേ ഽത്ര വിചാരണാ
15 സാമ്നൈവ തു യഥാ ഭീമ മോക്ഷയേഥാഃ സുയോധനം
    തഥാ സർവൈർ ഉപായൈസ് ത്വം യതേഥാഃ കുരുനന്ദന
16 ന സാമ്നാ പ്രതിപദ്യേത യദി ഗന്ധർവരാഡ് അസൗ
    പരാക്രമേണ മൃദുനാ മോക്ഷയേഥാഃ സുയോധനം
17 അഥാസൗ മൃദു യുദ്ധേന ന മുഞ്ചേദ് ഭീമകൗരവാൻ
    സർവോപായൈർ വിമോച്യാസ് തേ നിഗൃഹ്യ പരിപന്ഥിനഃ
18 ഏതാവദ് ധി മയാ ശക്യം സന്ദേഷ്ടും വൈ വൃകോദര
    വൈതാനേ കർമണി തതേ വർതമാനേ ച ഭാരത
19 [വൈ]
    അജാതശത്രോർ വചനം തച് ഛ്രുത്വാ തു ധനഞ്ജയഃ
    പ്രതിജജ്ഞേ ഗുരോർ വാക്യം കൗരവാണാം വിമോക്ഷണം
20 [അർജ്]
    യദി സാമ്നാ ന മോക്ഷ്യന്തി ഗന്ധവാ ധൃതരാഷ്ട്രജാൻ
    അദ്യ ഗന്ധർവരാജസ്യ ഭൂമിഃ പാസ്യതി ശോണിതം
21 [വൈ]
    അർജുനസ്യ തു താം ശ്രുത്വാ പ്രതിജ്ഞാം സത്യവാദിനഃ
    കൗരവാണാം തദാ രാജൻ പുനഃ പ്രത്യാഗതം മനഃ